Budyšin (SN). Dźeń wotewrjeneho pomnika je w Budyšinje kóžde lěto wulki podawk. Tón dźeń je nahladna ličba hewak zawrjenych domow a zarjadnišćow přistupna. Nimo toho organizuja wobšěrny kulturny poskitk. Zasadnje je program za dźeń pomnikow 8. septembra 2019 hižo zestajany.
Próstwu přećelow „Króny“, přednjesenu na zašłym posedźenju Budyskeje měšćanskeje rady, dom do dnja wotewrjeneho pomnika zapřijeć, je wyši měšćanosta Alexander Ahrens (SPD) najprjedy wotpokazał. Kaž měšćanske zarjadnistwo nětko zdźěla, su so po wjacorych rozmołwach dojednali, zo móže Budyska bydlenjotwarska towaršnosć (BWB) „Krónu“ nětko tola wočinić. Formalnje wona žadyn samostatny dźěl programa njeje, rěka w nowinskim wozjewjenju. Ale wobydlerjam ma so přiwšěm zmóžnić sej rumnosće „Króny“ wobhladać. K tomu praji Alexander Ahrens: „Tema ‚Krónu‘ za wobhladanje wočinić njeje žanoho wulkeho rozestajenjahódne. BWB a wobydlerska iniciatiwa móžetej ju tón dźeń wočinić, dokelž nochcemy wobhladanju areala naprěki stać.“
Maja noweho wobhospodarjerja
Raduš. Słowjanske hrodźišćo w Radušu ma wot 1. julija noweho wobhospodarjerja. Zamołwitosć za archeologiski muzej je město Wětošow z měšćanskej firmu wot dotalneho nošerja towarstwa Słowjański grod Raduš z.t. přewzało. Z nošerstwom zwjazane su tež wšitke kóšty, wosebje za personal. Přichodnje chcedźa hrodźišćo bóle z dalšimi turistiskimi poskitkami regiona zwjazać.
Frakcija CDU skonstituowana
Budyšin. Frakcija CDU noweho Budyskeho wokrjesneho sejmika je so předwčerawšim skonstituowała. Dotalny předsyda Matthias Grahl z Wachauwa bu w zastojnstwje wobkrućeny, Radworčan Wincenc Baberška a Thomas Martolock z Kumwałda staj jeho zastupjerjej. Dawida Statnika z Ralbic, předsydu Domowiny, wuzwolichu za jednoho z dweju přisydnikow, kaž frakcija informowaše.
Winu přiznał
Budyšin (SN/pdź). Šulski dwór połny awtow, hiphop-hudźba, kotraž klinči z hoberskich boksow, a gril, na kotrymž kołbaski a steaki pražachu. Njewšědny to wobraz minjenu sobotu při Budyskim Serbskim gymnaziju. Na tamniše sportnišćo běše sej towarstwo MSV Budyšin 04 mjenujcy přećelow basketballa na tak mjenowany streetball-turněr přeprosyło. Tu nastupitej stajnje dwě mustwje z třomi hrajerjemi přećiwo sebi. Njehraja pak po cyłym basketballowym hrajnišću na dwaj košej, ale jenož na jedyn. Tež regule njejsu tak krute. Hra je skerje na ćělne wuměnjenja hač na techniku wusměrjena.
Kradnjene motorske namakali
Zhorjelc. Při kontroli transportera na parkowanišću při awtodróze A 4 pola Zhorjelca namakachu policisća minjenu sobotu pokradnjene motorske typa Kawasaki. Třoch sobujěducych nachwilnje zajachu. Motorske w hódnoće 7 000 eurow bu w nocy do toho w Drježdźanach pokradnjene. 49lětna wobsedźerka hakle wot policije zhoni, zo bě jeje mašina fuk. Po wotzamknjenju kriminalnotechniskich dźěłow jej motorske zaso wróćichu. Na próstwu statneho rěčnistwa so zawčerawšim jatbowy sudnik z třomi mužemi w starobje 22 do 28 lět zaběraše. Wón rozsudźi, zo přińdu woni do přepytowanskeje jatby. Samsny dźeń jich tuž tam dowjezechu.
Pančicy-Kukow. Nowy slěd zarjadowanjow pod hesłom „Zetkanišćo strowota“ zahaja jutře, srjedu, w 19 hodź. w zežiwjenskim a zelowym centrumje klóštra Marijineje hwězdy w Pančicach-Kukowje. Z nim zwjazuja medicinski fachowy dźěl z praktiskimi zežiwjenskowědomostnymi dopóznaćemi. Jutře posrědkuje lěkarka za nutřkownu medicinu Sabine Mickel najnowše dopóznaća wo diabetes. K tomu poda Kerstin Mickan pokiwy k prawemu zežiwjenju při tejle chorosći.
Lětnja bara zaso wočini
Budyšin. Lětnja bara Sundowner na zahrodźe Serbskeho ludoweho ansambla budźe wot 4. julija hač do 1. septembra zaso přistupna, a to stajnje wot srjedy hač do njedźele wot 17 hodź.
Wojerecy (AK/SN). Spočatk šulskeho lěta 2020/2021 ma we Wojerecach nowy wyši šulski centrum hotowy być. Tónle zaměr wobkrući nawoda twarskeho wotrjada měšćanskeho zarjadnistwa Dietmar Wolf na zašłym posedźenju měšćanskeje rady. „Dotal smy 29 twarskich nadawkow firmam přepodali. To je 93 procentow cyłkowneho twarskeho wobjima. Nastupajo ryzy twarski wotběh smy w planje“, Wolf rozłoži. W lěta 1958 twarjenym a dźensa pod pomnikoškitom stejacym bywšim Konrada Zusowym gymnaziju nowa wyša šula nastawa. Wobstejace twarjenje saněruja, při nim nastanje moderny nowotwar.
W starym twarjenju su třěchikryjerjo a třěšni klempnarjo dodźěłali. Tež wonkowny wobmjetk a suchotwar stej hotowej. Tuchwilu dom nutřka wobmjetuja a zatwarjeja elektriku, tepjenje, přewětrjenje a sanitarne připrawy. Tež nadawk za blidarske dźěła je mjeztym přepodaty. Paralelnje rosće nowotwar. Tež tam su třěchikryjerjo swoje dźěła wotzamknyli. Po słowach Dietmara Wolfa je hruby twar tak daloko hotowy. Nětko móža so na nutřkowny wutwar měrić.
Před něšto wjace hač třomi lětdźesatkami je so wjesny wobraz Ralbic napřećo tamnišej farje dospołnje změnił. Tam su 1987 bywšu Brězanec-Čornakec korčmu spotorhali. Bě to nahladne, poměrnje dołhe domske, do kotrehož wjedźechu dwoje durje. Z tymi na prawej stronje sy do wochěže zastupił. Wottam sy so dóstał do bydlenskich rumnosćow, ale tež do hosćenca. Wonkowne durje lěweje strony wjedźechu do klamarstwa. Tam narodźi so 1906 Jurij Brězan, kiž dósta po studiju teologije 7. apryla 1935 nišu měšnisku swjećiznu. Lěto pozdźišo bu na klóšterskeho měšnika wuswjećeny.