Zhromadnje w adwenće hudźili
Krótkopowěsće (15.12.22)
Debata wo etaće
Drježdźany. Sakski krajny sejm je dźensa štyridnjowske wuradźowanja wo dwójnym etaće swobodneho stata 2023/2024 zahajił. Tón chcedźa zapósłanče a zapósłancy w rekordnym cyłkownym wobjimje wjace hač 49 miliardow eurow přichodny wutoru popołdnju schwalić. Dźensa, jutře, póndźelu a wutoru budźa wo budgetach jednotliwych ministerstwow k debatować.
Incidenca na podobnym niwowje
Drježdźany. Oficialna incidenca korony dla w Sakskej je na podobnym niwowje kaž tydźenja. Ličba přizjewjenych nowonatyknjenjow na 100 000 wobydlerjow w běhu sydom dnjow wučinješe po Roberta Kochowym instituće dźensa 179,1. Minjeny štwórtk běše tale hódnota 175,8, před dwěmaj tydźenjomaj 201,9. Incidenca po cyłym Zwjazku je aktualnje 239,6.
Wukubłaja ukrainskich wojakow
Zwotkel wodu za jězor brać?
Wobydlerjo Prožymja su znaći za swoje spjećowanje přećiwo wšemu, štož někak z wudobywanjom brunicy we wokolinje a z wohroženjom domizny zwisuje. Jich wjes bu přelutowana. Nětko pak su nadměrnje překwapjeni, što ma so jako sćěh toho, zo energijowe předewzaće LEAG brunicu z druheho dźělneho wotrězka jamy Wjelcej-juh njewudobywa, w jich susodstwje stać.
Za dźensa su krajni planowarjo Berlina a Braniborskeje zastupjerjow zarjadow, wobswětowych zwjazkow a komunalnych zarjadnistwow na tak mjenowany scoping přeprosyli. To zjawne zarjadowanje njeje. Skerje tam najprjedy wo to dźe, ćežišća za zahajacu so proceduru změny brunicoweho plana za jamu Wjelcej-juh zdźěłać.
Pomhaja w digitalnym swěće
Pósłancy techniki přewodźeja we Wojerecach seniorow do moderneho swěta techniki a přez njón
Wojerecy (SiR/SN). Rěčne powěsće a fotowe appy tworić, abo cyle jednorje na wnučka zazwonić – mnozy starši dorosćeni čuja so z tabletom abo smartfonom spěšnje přežadani. Přez Center for Digital Innovation and Participation Drježdźanskeje Techniskeje uniwersity nastawa w zhromadnym dźěle z towarstwami a organizacijemi tuchwilu po cyłej Sakskej wupřestrěwaca so syć podpěry, zo bychu runje tajkim problemam zadźěwać móhli, rozłožuje Niklas Weinhold, wědomostny sobudźěłaćer Drježdźanskeje TU.
Ponowjena nawjes přepodata
Serbska stwa w Nowym měsće
Wojerecy (SN/MWj). Mjeztym zo maja we Wojerowskim starym měsće hižo 20 lět žiwy adwentny kalender, wuhotuja jón lětsa prěni raz tež na tamnym brjoze Čorneho Halštrowa, potajkim w Nowym měsće. Jedne z woknješkow wočini so sobotu, 17. decembra, we 18 hodź. w bydlenskim kompleksu 1 na Zusowej čo. 5. Wulka stwa prózdneho bydlenja změni so na tymle wječoru do serbskeje hodowneje stwy, kaž je snano něhdy mějachu, jako tu hišće chójny stejachu a Wojerecy běchu małe burske městačko. Na tónle čas chcedźa dopominać a we wupyšenym bydlenju serbske bajki čitać. Na kóncu wočakuja tohorunja Wojerowske dźěćatko.
„Wonkownje zda so to napřećiwk być, wšako je so z industrializaciju Wojerec serbske žiwjenje w dalokej měrje z města wutłóčiło“, rozłoži bywša zamołwita za serbske naležnosće města Gabriela Linakowa. Přiwšěm chcedźa takrjec serbsku zašłosć w dźensnišim žiwjenju wožiwić, a snano wšak so dźěćom serbske dźěćatko lěpje lubi hač rumpodich.
Radźićeljo wuradźuja
Róžant. Poslednje lětuše posedźenje gmejnskeje rady Ralbicy-Róžant wotměje so jutře, štwórtk, we 18 hodź. w Róžeńčanskim towarstwowym domje. Mjez druhim póńdźe wo twarske wustawki za Nowoslicy a wo wuhódnoćenje lěta 2022.
Pančicy-Kukow. W samsnym času zetkaja so čłonojo gmejnskeje rady Pančicy-Kukow w awli Šule Ćišinskeho. Radźićeljo zaběraja so mjez druhim z nadawkom za wobstaranje drasty za wohnjowu woboru.
Chrósćicy. Tohorunja jutře we 18 hodź. zeńdźe so Chróšćanska gmejnska rada w sydarni. Mjez druhim zaběraja so z twarskim stawom Chróšćanskeje nawsy.
Zhromadnje serbować
Wojerecy. Přichodne zetkanje serbskeho rozmołwneho koła „Swětłownja“ wotměje so jutře, štwórtk, w 16 hodź. w kulturnej bróžni při Wojerowskim Domowinskim domje. Wobdźělnicy chcedźa tam bjesadujo serbować a so w serbšćinje wukmanjeć. Z hosćom budźe Angela Šusterowa, kotraž wo tym porěči, kak je jeje krótkofilm „Z njebjes wyšin“ nastał a čehodla je wona jón zhotowiła.
ZSW bilancuje a swjeći
Policija (14.12.22)
Wjacore delikty naraz
Budyšin. 31lětneho wodźerja Škody su zastojnicy předwčerawšim wječor na Budyskej Cyhelskej hasy kontrolowali. Policisća so njemało dźiwachu, jako hnydom wjacore delikty zwěsćichu. Tak młody muž scyła žanu jězbnu dowolnosć njewobsedźeše. Nimo toho jeho wosobowe awto zawěsćene njebě. A skónčnje bě wuslědk přewjedźeneho drogoweho testa pozitiwny, dokelž bě 31lětny čěski staćan konop brał. Dale jěć wón wězo njesmědźeše, za to pak dyrbješe za dalše přepytowanja krej „darić“.
Wotpočnišća lěpje wuhotuja
Bjerwałdski jězor: Za twarske dźěła gmejna nadawk přepodała
Hamor (AK/SN). Za ludźi z handikapom chce Hamorska gmejna Bjerwałdski jězor lěpje spřistupnić. Gmejnscy radźićeljo na swojim zašłym posedźenju wotpowědny twarski nadawk we wobjimje 27 000 eurow fachowej firmje přepodachu. Na Hamorskim pobrjohu jězora ma při wuhladnišću blisko promenady wotpočnišćo bjez zadźěwkow nastać. Dale chcedźa při Klětnjanskim a Delnjowujězdźanskim pobrjohu městnosći zarjadować, hdźež móža so tež ludźo w chorobnym stole přidružić, kotřiž hewak za blidom sedźeć njemóža.
Na kotrych městnach maja nowe wotpočnišća nastać, je gmejna ze społnomócnjenej za zbrašenych Zhorjelskeho wokrjesa wothłosowała. Naprawy dóstanje gmejna ze sakskeho programa za twarjenje bjez zadźěwkow z 19 000 eurami spěchowane. Zbytk zapłaći komuna ze swójskeje kasy.
Wulki narodk z nowosću
Prjedy hač patoržicu w cyrkwjach a njeličomnych domjacnosćach Boži narodk natwarja, něchtóžkuli hižo nětko za tym hlada, hač je z nim wšo w porjadku. Tež w Smochćicach je tole tele dny wažna tema.
Smochćicy (SN/MWj). Runja zašłymaj lětomaj natwarja tež lětsa patoržicu na dworje Smochčanskeho kubłanišća swjateho Bena wulki Boži narodk. Lětsa pak njewuhladaja wopytowarjo w nim ze słomu wutykanej klance jako swjateju Mariju a Józefa, ale z drjewa rězbarjenej figurje, kotrejž stej nimale tak wulkej kaž čłowjek. Stworił je figurje Žurčanski rězbar Alojs Šołta, kaž Smochčanske kubłanišćo w nowinskim wozjewjenju zdźěli. Projekt financuja z wunoška darowanskeje akcije, ke kotrejž bě Towarstwo přećelow a spěchowarjow Smochčanskeho kubłanišća namołwjało. Hač do 2. februara budu wšitcy přeprošeni, před narodkom k wosobinskemu rozpominanju pozastać. Nimo toho budźe wšědnje wot 8 do 17 hodź. móžno, sej Bethlehemsku měrowu swěcu sobu wzać, kotraž budźe w cyrkwi přistupna.
