W Drježdźanach narodniny swjećili
Wjace pjenjez za sportownju w Barće
Indeks twarskich płaćiznow, twarske planowanje a archeologiske dźěła žadaja sej za twar noweje sportownje w Barće přidatne srědki. Wokrjesny sejmik Budyšin je 750 000 eurow přizwolił.
Budyšin/Bart (SN/at). Za nastawace wyšošulske stejnišćo Bart je twar noweje sportownje jako 1. twarski wotrězk wažny měznik. W přichodźe maja tam šulerki a šulerjo ze sewjerowuchodneho dźěla Budyskeho wokrjesa a předewšěm z Malešanskeje gmejny wot 5. hač do 10. lětnika wuknyć. Da su časej wotpowědowace wuměnjenja za šulski sport runje tak požadane kaž za wólnočasnu zaběru w sportowych towarstwach.
Najprjedy pak maja twarske dźěła na objekće dokónčić, kotrež buchu lětsa w meji zahajene. Za to su w aktualnym budgeće Budyskeho wokrjesa cyłkowne kóšty něhdźe 2,99 milionow eurow předwidźane. Tele srědki pak njedosahaja, měni Budyski wokrjes jako šulski nošer a twarski knjez. Wokrjesny sejmik měješe na posedźenju spočatk decembra wo přizwolenju přidatnych pjenjez rozsudźić.
Krótkopowěsće (29.12.21)
Incidenca dale nad přerězkom
Budyšin/Zhorjelc. We wokrjesu Budyšin zwěsćichu wčera 186 nowych infekcijow z koronawirusom, dohromady 123 pacientow lěkuja stacionarnje (+7). 16 schorjenych je zemrěło. Incidenca po Roberta Kochowym instituće je tu aktualnje 346,6. We wokrjesu Zhorjelc zličichu 144 nowych natyknjenjow a dalšich 11 smjertnych padow. 135 wobydlerjow hladaja tuchwilu w chorownjach (-5). Incidenca tam wučinja 237,5.
Teleskop smali po swětnišću
Paris. Štyri dny po starće swětnišćoweho teleskopa „James Webb“ je nastroj něhdźe 40 procentow dospołneje distancy zmištrował. Kónc januara ma kónčnu poziciju 1,5 milionow kilometrow zdaleny wot zemje docpěć. Zhromadny wědomostny projekt agenturow ESA, NASA a CSA je dotal najwobšěrniši a najdróši swojeho razu w stawiznach.
Heidelberg „najmłódše město“
Swój dołh wobstajnje wotpłaća
Kulow (AK/SN). Swójski zawod za wopłóčki města Kulowa zniža dale konsekwentnje a wobstajnje swój dołh. Z tym polěpšeja runočasnje lěto wob lěto swój wobstatk financow. Tole wuzběhny měšćanosta Markus Posch (CDU) na zašłym posedźenju měšćanskeje rady. Jeje čłonojo wobzamknychu jednohłósnje hospodarski plan 2022 měšćanskeho zawoda za wopłóčki. Tohorunja wobzamknychu jednohłósnje wotličenje lěta 2020 a wuswobodźenje nawody zawoda Jurja Brösana.
„W lěće 2020 je wopłóčkowy zawod kónčny wuslědk něhdźe 300 000 eurow nadźěłał. Tónle dobytk so wězo pozitiwnje na swójski kapital zawoda wuskutkuje. Po posudźowanju hospodarskich pruwowarjow njeje žaneje přičiny pohórškow abo znapřećiwjenjow“, měšćanosta radźićelam zdźěli.
Znowa narodk pod hołym njebjom
Wosebita twarska rewolucija
Prěni raz nowy móst dospołnje z karbonoweho betona nastał
Worcyn (UM/SN). Na prěni pohlad je nowy móst na statnej dróze S 111 we Worcynje cyle normalny. „Wosebitosć spóznaješ hakle, hdyž sej móst wotdeleka wobhladaš“, rozłoži Enrico Lorenz z Drježdźanskeho inženjerskeho běrowa. Bjezposrědnje nad Koporčanskej wodu mjenujcy widźiš, zo je móst trochu wjelbowany a wuprudźa tuž wěstu lochkosć. Normalny móst by runy był. Poprawna wosebitosć pak je wužiwany material. We Worcynje njejsu mjenujcy ryzy beton wužiwali, ale karbonowe pletwy.
Tójšto turistow přijěło
Budyšin. Statistika turistow za město Budyšin pokazuje, zo su w oktobrje plus jědnaće procentow při skazanju přenocowanjow zwěsćili. Lěta do toho njebě tón měsac wosebje atraktiwny był. Lětsa je sej dohromady 8 072 turistow a turistkow do sprjewineho města dojěło, mjez kotrymž běchu mnozy, kotřiž wužiwachu tež móžnosće campinga. W cyłku bu 20 486 přenocowanjow zličene. Přerěznje přebywachu ludźo dwaj a poł dnja w Budyšinje. Loni bě tu 6 381 turistow přerěznje 2,6 dnjow přebywało, štož wučinješe 16 619 přenocowanjow.
Smě ludźi wěrować
Budyšin. Budyski wyši měšćanosta Alexander Ahrens (SPD) je so ze swojim znapřećiwjenjom přesadźił. Dohladowanski zarjad je tudyšej měšćanskej radźe wumjetował, zo bě přećiwo prawu postupowała. Radźićeljo běchu wotpokazali, zo smě Ahrens přichodnje pory stawnisce wěrować. Po rozsudźe zarjada, zo bě postupowanje rady njeprawy zasah do organizaciskeje suwerenity a swobody při wukonjenju powołanja, to měšćanosta Ahrens nětko smě. Kaž wón zdźěli, dźěše jemu jeničce wo móžnosć, hdys a hdys wěrowanja přewjesć a stawnistwo w jeho dźěle wolóžić.
Policija (28.12.21)
Přepytuja zapalerstwa dla
Kamjenc. Wšo druhe hač měrny wukónc hodownych swjatych dnjow mějachu wohnjowi wobornicy předwčerawšim wječor w Kamjencu. Wobydler bě kameradow alarmował, dokelž so z pincy wjaceswójbneho domu na Schillerowej mócnje kurješe. Po tuchwilnych dopóznaćach bě něchtó spytał, styroporowu izolaciju w pincy bydlenskeho domu zapalić. Kur so po wšej pincy rozpřestrě, woheń pak so žadyn zapalił njeje, tak zo přichwatanych 30 wobornikow hadźicy zasadźić njetrjebaše. Woni jeničce pincu a prěni poschod twarjenja porjadnje přewětrichu. Wobydlerjo móžachu na to zaso do swojich bydlenjow. Byrnjež jenož něhdźe 50 eurow wěcneje škody nastało, kaž policija zdźěli, přepytuja tónle pad dla pospytneho ćežkeho zapalerstwa.
Městno za nowu pěstowarnju
Hdźež ma w Rownom nowa pěstowarnja nastać, su nětko pódlanske twarjenja wottorhali. Róžkowy dom ma so předać, zo hodźał so separatnje wužiwać.
Rowno (CK/SN). Wosrjedź Rownoho su nětko městno za nowu pěstowarnju stworili. Krótko do hód 2020 bě Slepjanska gmejna spěchowanske srědki přizwolene dóstała. Wuměnjenje bě, zo ma nowa pěstowarnja kónc lěta 2022 hotowa być. W tym času pak hišće nichtó wočakował njebě, zo móhł projekt wjele hłowybolenja načinić. Centralny dypk dźěćaceho přebywanišća měješe poprawom čerwjeny klinkerowy twar na róžku Gródkowska dróha/Młynski puć być. Bywši hosćenc „K přijomnemu róžkej“ pak steji swojeje charakteristiskeje fasady dla pod škitom pomnikow. „Bě nimale njemóžne, wysoke pomnikoškitne naroki z wužadanjemi za dźěćace hladanje zwjazać“, wjesnjanosta Jörg Funda (CDU) dilema wopisuje.
