Gmejnska rada Ralbicy-Róžant žada sej dokładniši přihot předłohow

Róžant (JK/SN). Samo na sebi wotběža wobzamknjenja gmejnskich radow stajnje po samsnym porjedźe. Přez předmjet wobzamknjenja a wěcny staw hač k namjetej za wobzamknjenja je wšitko jasnje formulowane a z faktami a ličbami podkładźene. Tomu je tež na posedźenjach gmejnskeje rady Ralbicy-Róžant tak – hač na minjene posedźenje. Tam předstaji wjesnjanosta Hubertus Ryćer (CDU) namjet za wobzamknjenje k nakupej drasty za wohnjowu woboru we wob­jimje 6 300 eurow. Radźićelam pak falowaše dokładne wopisanje naležnosće kaž mnóstwo drasty, wo čo so konkretnje jedna a čehodla ma so drasta kupić.

Na zhromadnu adwentničku je so njedawno něhdźe 25 čłonow Budyskeje ­župy „Jan Arnošt Smoler“ w Budyskim Serbskim domje zetkało. Witała je jich čłonka župneho předsydstwa Hilža Mehrowa. Hosćom předstajištaj so rěčnaj motiwatoraj Lucian Kaulfürst a Raphaela Wićazowa. Wonaj prócujetaj so wo wo­zrodźenje serbšćiny a podpěrujetaj w tutym zmysle serbske žiwjenje w kónčinach župy, hdźež je so serbšćina ze wšědneho dnja pozhubiła.

Při šalce kofeja a skibce wosuška njejsu čłonojo župy jenož adwentne pěsnje spěwali, ale zhladowachu tohorunja na projekty lěta 2022. Tójšto wjerškow kaž projektne dny „Zejler a Kocor“ w Stróžanskim šulskim muzeju, zhromadny wulět, prěnje „serbske kino“ w Budyskim filmowym palasće a wopomnjenske zarjadowanje składnostnje 200. narodnin Korle Awgusta Kocora w Zahorju stejachu při tym w srjedźišću. Tež wo přede­wzaćach 2023 župjenjo zhromadnje rozmyslowachu. Ćežišćo diskusije bě župna wólbna zhromadźizna a z tym zwisowace wabjenje nowych čłonow do župneho předsydstwa. Raphaela Wićazowa

Bóšicy (MiR/SN). Jedyn z dnjowych dypkow zašłeho posedźenja Bóščanskeje gmejnskeje rady zaběraše so z nakupom ležownosće we Łušću. Tam je trjeba rjadować jězdźenje busa. Zo by so tón móhł bjez problema we wsy zawróćić a zaso ze wsy won na hłownu dróhu jěć, dyrbja jězdnju wutwarić. Tuž je wjesnjanosta Stanij Ryćer (rjemjesło Bóšicy) z mějićelom ležownosće rěčał. Wobsedźer je gmejnje něšto kwadratnych metrow swojeho wobsydstwa předał. Gmejna ­běše swojeje winowatosće za wobchadnu wěstotu dla nuzowana, naležnosć rja­dować.

Před něšto tydźenjemi, dokładnje 8. oktobra, běše Bóščanska dobrowólna wohnjowa wobora wuhotowała wulki wjesny swjedźeń. Wšako swjećeše wjes 800. jubilej prěnjeho naspomnjenja. Při tej składnosći přepodachu wohnjowym wobornikam nowe hašenske awto. Wot toho časa steješe dotal wužiwane jězdźidło na ležownosći wjesnjanosty, hdźež na to čakaše, zo so něchtó za nje zajimuje a je kupi. Na njedawnym posedźenju gmejnskeje rady Stanij Ryćer zdźěli, zo je jězdźidło předate. Susodna gmejna Njeswačidło je awto za 8 000 ­eurow kupiła.

Na sakskej krajnej wustajeńcy nuklow minjeny kónc tydźenja w Lipsku je Achim Weclich z Pěskec z družinu dołhowłosačow prěnje městno wobsadźił. Z tym bu wón po lětach 2014, 2016 a 2018 hižo štwórty raz sakski mišter. 66lětny Weclich je tež hižo tydźeń do toho wuspěšny był. Jako čłon Njebjelčanskeho towarstwa plahowarjow nuklow wobdźěli so na wokrjesnej wustajeńcy w Lichtenbergu pola Połčnicy. Tam žnějachu plahowarjo z Njebjelčic dwójny wuspěch. Jako towarstwo wobsadźichu 3. městno, Achim Weclich ze swojimi dołhowłosačemi pak bu samo prěni a z tym wokrjesny mišter. Foto: Feliks Haza