Wožiwjeć a zwjazować
We Wojerecach dźěła nětko nowy management za stare a nowe město
Wojerecy (SiR/SN). Dwurěčny region swójbow wožiwjeć kaž tež Wojerowske stare a nowe město intensiwnišo zwjazać je cil noweho centrumoweho managementa. Tón su minjeny pjatk na Złokomorowskej dróze oficialnje wotewrěli. Při tym su wopytowarjam hižo prěnje dohlady do swojeho dźěła zmóžnili. „Chcemy na dotalne nazhonjenja nawjazać a na jich zakładźe nowe ideje wuwiwać. Dale je nam wažne, wobydlerjow za to zahorić a jich do tohole procesa zapřijeć“, praji nawodnica managementa Madeleine Matschke, kotraž so tohorunja w marketingowym towarstwje angažuje. Jako přikład mjenuje meble k posydnjenju, kotrež běchu we wobłuku staroměšćanskeho bulwara w měsće nastajene. Su je znowa wobarbili, tak zo móža je we wšelakich wobłukach zaso wužiwać.
Běrow ma jako wotewrjena dźěłarnička fungować, kotraž ma transparentny proces wotbłyšćować. Tak chcedźa wokna tak wuhotować, zo móže kóždy nimoducy widźeć, što so w rumnosćach stawa. Klětu chcedźa nimo toho wotewrjenske časy za zjawnosć poskićeć.
Policija (21.12.22)
Bjez zymskich wobručow jěła
Wojerecy. Poprawom najpozdźišo w jězbnej šuli wuknješ, zo maš při zymskich poměrach na puću swoje awto ze zymskimi wobručemi wuhotować. Fachowcy stajnje zaso zasadu poručeja, zymske wobruče najlěpje wot oktobra hač do jutrow na kolesach měć. 26lětnej žonje we Wojerecach bě to předwčerawšim dopołdnja po wšěm zdaću wšojedne. Na Heinowej bě wona ze swojim Toyota do směra na Brětnju po puću, jako so na hładkej dróze suwać započa a do płotu ležownosće zrazy. Žona so na zbožo njezrani. Na awće a na płoće nasta dohromady 2 500 eurow škody. Policisća zwěsćichu, zo bě Toyota z lěćnymi wobručemi po puću.
Sekretarku dale pytaja
Pančicy-Kukow (MDź/SN). Poprawom chcychu čłonojo gmejnskeje rady Pančicy-Kukow na swojim posedźenju minjeny štwórtk wobzamknyć nadawk k přepodaću nastajenja plana za hašensku wodu za wjacore wsy gmejny Pančicy-Kukow. Dnjowy dypk pak bu přestorčeny. Spočatnje je wjesnjanosta Markus Kreuz (CDU) radźićelam poskitk za nastajenje tajkeho plana předstajił. Dźe wo to, zo so w jednotliwych wsach přepruwuje, hdźe poprawom kotre hydranty steja, kajki ćišć w nich je abo tež wo prašenje, kak wunošne su wjesne hašenske haty. To su wažne informacije za wohnjowu woboru. A runje wobornicy wo to proša, zo so dotalny plan aktualizuje. Je mjenujcy mjeztym starši hač 15 lět.
Žiwa adwentna protyka za dźěći
Pytaja nuznje domjacych lěkarjow
Aktualne połoženje lěkarskeho zastaranja we Wojerecach je wčera čłonow tamnišeje měšćanskeje rady zaběrało. Tuchwilny staw smě so bjeze wšeho jako napjaty pomjenować.
Wojerecy (AK/SN). Zo by přichodne lěkarske zastaranje w měsće zaručene było, pytaja we Wojerecach nuznje nowych domjacych lěkarjow. Tole rjekny jednaćelka Wojerowskeho jězoroweho klinikuma Juliane Kirfe wčera na posedźenju měšćanskeje rady. „W měsće je tuchwilu 41 domjacych lěkarjow. Stopjeń zastaranja wučinja 88,6 procentow, štož woznamjenja njedosahace zastaranje“, wona rozłoži. „Zjednoćenstwo kasowych lěkarjow je na tónle njedostatk hižo w juliju 2020 pokazało. Tuchwilu mamy w měsće dźesać njewobsadźenych městnow za domjacych lěkarjow. Štóž so wo tajke městno prócuje, dóstanje hač do 60 000 eurow spěchowanja“, tak Kirfe.
Krótkopowěsće (21.12.22)
Wusud podpěry mordarstwa dla
Itzehoe. 97 lětna Irmgard F., něhdyša sekretarka koncentraciskeho lěhwa Stutthof pola Gdańska, bu podpěry mordarstwa dla na dwulětne chłostanje z pruwowanskim časom zasudźena. Krajne sudnistwo Itzehoe dóńdźe k wusudej na zakładźe młodźinskeho chłostanskeho prawa, dokelž běše wobskoržena za čas njeskutka hakle mjez 18 a 19 lětami stara.
SMiLE-studije wozjewjene
Washington. Smithsonian institut we Washingtonje je nětko wšitke studije projekta SMiLE wo rěčnej rewitalizaciji w sydom europskich mjeńšinach wozjewił. Mjez nimi je tež nastawk wo hornjo- a delnjoserbšćinje dr. Cordule Ratajczakoweje (Budyšin) a prof. dr. Nicole Dołowy-Rybińskeje (Waršawa). Wozjewjenje bu na Budyskej SMiLE-konferency w juniju 2019 připowědźene.
Prěni Leopard w Čěskej
Policija (20.12.22)
Škody dźěry dla
Budyšin. Włóžnoty a zmjerzka dla je so předwčerawšim popołdnju awtodróha A 4 mjez wotbóčkomaj Wóspork a Budyšin wuchod roztorhnyła. Kaž Zhorjelska policajska direkcija zdźěli, je so znajmjeńša dwanaće jězdźidłow wobškodźiło, jako přez dźěru zajědźechu. Při tym nasta dohromady něhdźe 12 000 eurow škody.
Šmóratce a telefon fuk
Krušwica. Do jednoswójbneho domu w Krušwicy su so njeznaći předwčerawšim rano zadobyli. Jako wobydlerjo to pytnychu, so skućićeljo zminychu. Sobu wzali su šmóratce a móšnju. Škoda wučinja něhdźe 800 eurow.
Serbske JuLeiCa-wukubłanje
Worklecy. W januarje přewjedźe so po cyłej němskej płaćiwe wukubłanje JuLeiCa (Jugendleitercard) w serbskej rěči. Wone měri so na młodostnych wot 15 lět a na młodych dorosćenych, kotřiž su w młodźinskim dźěle aktiwni abo kiž chcyli so za młodźinu angažować. Přizjewjenje je hač do jutře, 21. decembra online pod internetnej adresu móžne.
Poskićuja dźěłowe městna
Budyšin. Přehlad dźěłowych městnow w Budyskim wokrjesu skići fachowa bursa „wiederda“ 27. decembra wot 10 do 14 hodź. w Budyskim dwórnišću. Tam móža zajimcy regionalne předewzaća wšelakich branšow zeznać a so z jich zastupjerjemi rozmołwjeć. Poskitk měri so předewšěm na tych zwonka Łužicy bydlacych, kotřiž hody swojich přiwuznych w Budyskim wokrjesu wopytaja a kotřiž wo tym rozmysluja, so w starej domiznje za nowym dźěłom rozhladować. Z tym zwjazuja organizatorojo próstwu, zo wobydlerjo swojich přiwuznych wo poskitku dźěłoweje bursy informuja.
Čehodla hodowny štom faluje?
Přewšo atraktiwna hodowna pycha pyši nawjes w Slepom. Swěčkaty wobłuk z metala běchu krótko do prěnjeho adwenta stajili. Nimale tři metry dołhi wobłuk waži na 200 kilogramow.
Slepo (CK/SN). Do wulkeho swjedźenskeho kónca tydźenja w juniju bě energijowe předewzaće LEAG Slepjanskej gmejnje zdźěliło, zo chce składnostnje 750. jubileja wsy swěčkaty wobłuk darić. „Ideja je nas tola chětro překwapiła“, powěda wjesnjanosta Jörg Funda (CDU). Njejsu pak scyła dołho přemyslowali. Tež w njedalokim Jabłońcu wšak maja tajki wulki wobłuk.
Dohodowna atmosfera we wowčerni
Stróža (CS/SN). Adwentne popołdnjo we wowčerni zarjada biosferoweho rezerwata Stróža bě so lěta 2018 zahajiło jako małke zarjadowanje. Tehdy bě hłowny zaměr, poskićić składnosć zetkanja sobudźěłaćerjow z jich wokolnymi partnerami a zmóžnić rozmołwu w přitulnym kole. Potom dyrbješe zarjadowanje korony dla dwójce wupadnyć. Tola minjeny pjatk bě skónčnje zaso tak daloko – a tónraz zeńdźechu so we wjetšim kruhu. Organizatorojo su sej někotrych wikowarjow a rjemjeslnikow přeprosyli, a tež dalši publikum bě witany. Štóž nalětnje a nazymske wiki w Stróži znaje, sej wotputanu a přećelnu atmosferu tule waži.
