Prózdninski poskitk
Smjerdźaca. Za dźěći w starobje sydom do dźesać lět poskići Serbske šulske towarstwo prózdninske dny wot 14. do 17. februara w kubłanskim srjedźišću LIPA w Smjerdźacej a to wšědnje wot 9 do 15 hodź. Na šulerjow čakaja zabawa w sněze, wopyt w muzeju, rejwanje, zaběra ze skludnym psom, wotputanje z jogu, wuspytanje dźěła jako pjekar, hudźenje a paslenje. A wězo chcedźa zhromadnje hry hrać a wjesołe a zajimawe prózdninske dny dožiwić. Tež swójske ideje su prašane a witane. Přizjewjenja přijimuja hač do 9. februara pod projekte-ssv@sorben.com abo pod telefonowym čisłom 0 35 91 / 55 02 07. Poskitk płaći na šulerja 40 eurow inkl. zastaranje.
Za projekt so přizjewić
Chrósćicy. Za nowu serbsku spěwohru „Z TOBU – Bohu swjećene lěto“ su dźěći do wulkeho chóra prošene. Spěwohra nawjazuje na CD, kotruž běše Towarstwo Cyrila a Metoda z.t. zhromadnje ze Załožbu za serbski lud w lěće 2000 wudało. Předstajić chcedźa ju w oktobru w Chróšćanskej „Jednoće“. Nadrobnje wopisany je projekt w Katolskim Posole.
Stawizny wobornikow a wsy napisać
Drěwcy (AK/SN). Hnydom wjacore chroniki pisaja tuchwilu a přichodnje w Drěwcach (Driewitz) we Łazowskej gmejnje. Wo to stara so chronist Werner Bunk. Nimale 30 lět bě wón nawoda wjesneje wohnjoweje wobory. Wot 1993 přisłuša wjesnej radźe. 1999 je domizniske towarstwo sobu załožił.
Najprjedy nastawa w dwěmaj zwjazkomaj chronika domizniskeho towarstwa. Prěni dźěl zaběra so z časom wot 1999 do 2008, druhi dźěl wěnuje so dobje wot 2009 hač do 2019. „Zakład chroniki su rozprawy, dźěłowe plany a protokole towarstwa“, praji Werner Bunk. Nimo toho so wón ludźi za dopomnjenkami praša a pyta fota. Zo je chronika trěbna, wě tež předsyda domizniskeho towarstwa Andreas Trell. Přiběrajcy pobrachuje dorost. „Ćim wažniše je, stawizny towarstwa napisać, zo njebychu je zabyli.“ Nimo dweju zwjazkow chroniki zestaja Werner Bunk brošurce wo koronowymaj lětomaj 2020 a 2021. Prěnja mjeztym předleži. Hač na někotre małe přidźěła je tež druhi zešiwk nimale hotowy, so wjesny chronist wjeseli.
Karnewal budźe – ćahaj nic
Kulow (SN/MWj). Póstniskej přećahaj 316. Kulowskeje karnewaloweje sezony – žonjacy póstnisku sobotu a róžowopóndźelny – so lětsa njewotmějetej. To stej předsydstwje žonjaceho póstniskeho towarstwa a karnewaloweho towarstwa minjene dny rozsudźiłoj. „Hladajo na njewěste wuwiće pandemije njejsu přihoty a přewjedźenje wobeju ćahow z tysacami ludźimi móžne“, zdźěli prezident karnewaloweho towarstwa Mathias Glaab. Tež karnewalowej ćahaj na přikład do lěća přepołožić njeje žana opcija, dokelž maja póstnicy po starodawnym wašnju swoje krute městno w běhu lěta.
Přiwšěm ma Kulowski karnewal swoju wažnu towaršnostnu funkciju wobchować a so w mjeńšim ramiku wotměć. Kaž Mathias Glaab zdźěli, přihotuja jako zazběh norskeho kónca tydźenja za pjatk, 25. februar, wot 19.30 hodź. póstniske zarjadowanje, kotrež chcedźa na swojej internetnej stronje wusyłać. Kak budu nory online-karnewal sćěhować móc, chcedźa bórze na stronje wozjewić. Na kóždy pad ma přistup darmotny być. K zarunanju wudawkow proša wo dary.
Šćežku dyrbi sporjadkować
Dźěl kolesowanskeje šćežki na slědach mórskeho worjoła je wobsedźer tak zwohidźił, zo njemóžeš ju hižo wužiwać. Sudnistwo je nětko rozsudźiło, zo to tak wostać njemóže.
Delnja Hórka (UM/SN). W prawniskim rozestajenju z wobsedźerjom hatneje kónčiny pola Delnjeje Hórki je Malešanska gmejna dźělny wuspěch žnjała. Budyske wyše zarjadniske sudnistwo je rozsudźiło, zo ma wón něhdźe sto metrow dołhi skóncowany dźěl kolesowanskeje šćežki blisko Dobrošec zaso do porjadka přinjesć. Přećiwo samsnemu wusudej Drježdźanskeho zarjadniskeho sudnistwa bě wobsedźer znapřećiwjenje zapodał. Te je wyše zarjadniske sudnistwo jako najwyša přisłušna instanca nětko wotpokazało.
Za domicil so gratu přimali
Wjesne towarstwo a spěwarjo chcedźa bursku stwu wobnowić
Konjecy (JK/SN). W Konječanskej burskej stwě su so hižo mnohe najwšelakoriše zarjadowanja wotměli a mnozy wjesnjenjo su w njej z hosćimi tójšto rjanych zabawnych hodźin dožiwili. Tydźensce zetkawaja so tam čłonojo Serbskeho muskeho chóra Delany k swojim zwučowanjam. Po wjele lětach pak njewotpowědujetej wuhotowanje kaž tež cyłkowny staw rumnosće hižo žadanjam časa a zaměram wužiwarjow. Wjesna rada je so tuž wo pomoc gmejny za wobnowjenje burskeje stwy prócowała a gmejna je pjenježnu podpěru přizwoliła. Tuta dosaha najprjedy raz za prěnje kroki k nowemu wuhotowanju domicila rady a delanskich spěwarjow.
Přećiwo demonstrantam zakročili
Z rozumom jednać
Krótkopowěsće (01.02.22)
Kwota pod sydom procentami
Budyšin. We wuchodnej Sakskej bě w januarje 17 929 bjezdźěłnych, 1 033 wjace hač w decembrje. Kwota bjezdźěłnosće 6,5 procentow je w regionje prěni raz spočatk lěta pod sydom procentami, kaž Budyska wotnožka Zwjazkoweje agentury za dźěło dźensa wozjewi. Wuchodosakske předewzaća zaso sylnišo dźěłowe mocy pytaja.
Incidenca woteběrała
Budyšin. Wo 428 natyknjenjach z koronawirusom wot minjeneho pjatka je Budyski wokrjes wčera rozprawjał. W Zhorjelskim běchu to w samsnym času 503 infekcije a jedyn smjertny pad. Incidenca po Roberta Kochowym instituće je dźensa we wokrjesu Budyšin 469,8 a we wokrjesu Zhorjelc 530,4 a tak niša hač wčera. 63 na koronu schorjenych z wobeju wokrjesow w chorowni lěkuja.
Pytaja přewodnikow
Wichor wulki buk powalił
Žadny hósć so w našej kónčinje hižo doma čuje
Bronjo. Jěducy po našich wjeskach móžeš nětko w zymje na wotžnjatych polach kołpje wobkedźbować. Při dokładnišim hladanju widźiš znate horbate kołpje z jich zhibnjenej šiju a oranžobarbnym pyskom. Hinaša družina kołpjow naćahuje swoju šiju runje dowysoka, ma žołty pysk z čornym kónčkom a skedźbnja na so ze spěwatymi zwukami kaž wot trompety. To su spěwate kołpje.
Často wuhladaš spěwate kołpje hromadźe ze žorawjemi a tysacami wšelakich dźiwich husow. Pola husow jedna so wo pólne huso (Saatgans) z Tajgi, tundrowske huso (Tundrasaatgans), mały łysak (Zwerggans), islandske pólne huso (Kurzschnabelgans) a wulki łysak (Blässgans). Tež znate dźiwje huso (Graugans) tu je. Druhdy wuhladamy tež mniškowe huso (Nonnengans). Wone wšitke pola nas pozastawaja, zo bychu tudyši wulki poskitk picy wužiwali. Ratarjow to hakle potom mjerza, hdyž so husy do nazymskeho wusywa dadźa. Při ćmičkanju najprjedy žorawje pola wopušća, pozdźišo tež husy a spěwate kołpje, a leća na nóclěh k hatam, hdźež su škitane, předewšěm před lišku.
