Pokiwy (30.04.26)
Oldtimery a čaporowe wiki
Sepicy. Muzej NDR w Sepicach přeproša jutře, pjatk, wot 10 do 16 hodź. na dalše zetkanje oldtimerow. Nimo toho změja wopytowarjo składnosć, priwatne čaporowe wiki překramosćić. Zastup je darmotny.
Dujerjo woswjeća jubilej
Budyšin. We wobłuku rjadu Duchowna hudźba w tachantskej cyrkwi wuhotujetej chóraj blachowych dujerjow Heinde a Mały Wjelkow njedźelu, 3. meje, zhromadny koncert w najwjetšim Božim domje Budyšina. Na te wašnje woswjećitej cyłkaj z Delnjeje Sakskeje a Hornjeje Łužicy swoje mjeztym 20 lět wobstejace partnerstwo. Program wopřijima twórby z doby baroka – mjez druhim zrědka zahrate kruchi Budyskeho komponista Johanna Pezeliusa – hač k načasnemu jazzej. Wo přidatnu hudźbnu barbu postara so tachantski kantor Maksymilian Kulawik na Kohlowych pišćelach. Zarjadowanje započnje so w 17 hodź., zastup je darmotny.
Wustajeńca wo wobchodach
Rozhłós (30.04.26)
Njedźelu hornjoserbsce
11:00 Łužica tutón tydźeń
11:20 Tematiske wusyłanje: „Bjez brody, brjucha a nawoči“ – Reportaža z lěta 2009 a zhladowanje z dźensnišeho wida na nju
12:00 Nabožne wusyłanje
(Pětr Mróz)
po tym zbožopřeća
delnjoserbsce
12:30 Aktualny magacin, mjez druhim z přinoškom wo Swětowym dnju swobody nowinarstwa
13:00 Tematiske wusyłanje: Serbske mjena rostlinow (1.)
13:40 Nabožne wusyłanje
(Katharina Köhlerowa)
po tym zbožopřeća
Šok, woheń, meja a kurs
Ćežišćo mejskeho wudaća telewizijneho magacina Wuhladko je zawrjenje porodneje stacije Kamjenskeje chorownje. Mjez druhim wobswětluja přičiny mnohim njezrozumliweho kroka a sposrědkuja reakcije na njón. Dalše přinoški wěnuja wot wohenja wobškodźenemu wětrnikej w Chrósćicach, pozadkam stajenja a mjetanja meje kaž tež ferialnemu kursej serbšćiny z wida dźěćaceho reportera.
Telewizija MDR wusyła Wuhladko zajutřišim, sobotu, w 12 hodź. Wospjetowanje na samsnym sćelaku slěduje póndźelu, 4. meje, w 6.45 hodź. Telewizija RBB pokaza magacin sobotu, 9. meje, w 13.15 hodź. W mediatece ARD je aktualne Wuhladko wot zajutřišeho cyłe lěto kóždy čas přistupne.
Do kina (29.04.26)
30.4. –6.5.2026
Budyski filmowy palast:
Pokiwy (24.04.26)
Bjezpłatne čaporowe wiki
Budyšin. We wobłuku wosebitych čaporowych wikow móža so zajimcy jutře, sobotu, mjez druhim mjez domjacej nadobu, drastu a črijemi rozhladować a sej twory bjezpłatnje sobu wzać. Poskitki su dźěl wěcnych darow, kotrež buchu Budyskemu Thespis-centrumej minjene lěta přewostajene. Socio-dźiwadłowe zetkawanišćo na Hošic hasy je jako městnosć wikow wot 11 do 16 hodź. wotewrjene.
Wopominaja Grólmusec a Kubašec
Budyšin. Składnostnje 130. posmjertnych narodnin Marje Grólmusec kaž tež 50. posmjertninow Marje Kubašec wotměje so jutře wopomnjeće w Budyskim Serbskim domje. Marka Cyžowa a Axel Thielmann čitataj z knihi Kubašec „Hwězdy nad bjezdnom“, k tomu zahudźi jazzowe trijo Sotry wjesela. Zarjadowanje započnje so w 16 hodź., zastup je darmotny.
PoŠtyrjoch koncertuja w bróžni
„Between us – Mjez namaj“ rěka wuslědk „projekta za wuměnu ...
Małej křižowce (24.04.26)
Rozhłós (24.04.26)
Njedźelu hornjoserbsce
11:00 Łužica tutón tydźeń z přehladom powěsćow a pokiwami
11:20 Tematiske wusyłanje: 100. posmjertniny serbskeho komponista Jurja Pilka
12:00 Nabožne wusyłanje
(Jan Malink)
po tym zbožopřeća
delnjoserbsce
12:30 Aktualny magacin, mjez druhim z kolumnu „Tak ja to wiźim“
13:00 Tematiske wusyłanje: „Łužyske wódy wokoło Chóśebuza“
13:40 Nabožne wusyłanje
(Christiana Piniekowa)
po tym zbožopřeća
Do kina (23.04.26)
23.4. –29.4.2026
Budyski filmowy palast:
Pokiwy (17.04.26)
Třidnjowske wuměłstwowe wiki
Drježdźany. Němski hygienowy muzej je wot dźensnišeho pjatka z hosćićelom 10. Drježdźanskich wuměłstwowych wikow. Mjez dohromady něhdźe sto wustajerjemi su na přikład Susanne Bartel, Uwe Hempel, Biliana Vardjieva-Winkler, Sunyoung Kang, Anna Moroz a Maja Nagelowa. Přistupne su wiki dźensa wot 19 do 22 hodź., jutře wot 11 do 20 hodź. a njedźelu wot 11 do 18 hodź. Zastup na dźeń płaći 10 resp. potuńšeny 6 eurow, tiket za swójby je za 25 eurow na předań.
Fantasy, sciencefiction a wjace
Budyšin. Pod hesłom „Literariski potpurij“ wotměje so dźensa, pjatk, prěni raz čitanski wječor Łužiskeho awtorskeho koła we wjelbje na Bohatej 9 w Budyšinje. Wot 19 hodź. sposrědkuja mjez druhim Ariane Rücker, Stefanie Domašcyna, Stefan Kühne a Christopher Abendroth dohlad do swojeho tworjenja. Wjetšina sobuskutkowacych wěnuje so předewšěm žanromaj fantasy a sciencefiction, ale tež lyrika a (swójbne) stawizny so jewja. Mała wustajeńca „Fantastiske swěty“ z wobrazami Konstanze Maii bjezpłatne zarjadowanje skulojći.
Čaporowe wiki za dźěći w Slepom
