Za nowy diskurs wabić
Armin Mueller-Stahl w Kamjencu był
Kamjenc (BG/SN). Hač na poslednje městno pjelnjene bě srjedu wječor Kamjenske měšćanske dźiwadło. Wšako wočakowachu wurjadny wopyt. We wobłuku zarjadowanjow składnostnje Lessingowych akcentow 2020 su tam wustajeńcu swětoznateho dźiwadźelnika a molerja Armina Muellera-Stahla wotewrěli. Wona je pod hesłom „Armin Mueller-Stahl – lět swobody“ w Słodarni natwarjena. Lawdaciju na wuměłca dźeržeše Björn Engholm, bywši ministerski prezident Schleswigsko-Holsteinskeje. Do toho dóńdźe k rozmołwje z Drježdźanskim žurnalistom Oliverom Reinhardtom. Při tym dźěše wo połoženje Němskeje 30 lět po zjednoćenju. Engholm rozprawješe, zo bě spočatk 90tych lět Serbow w Hórkach wopytał. Wón přizna, zo drje je tójšto politikarjow hoberski nadawk zjednoćenja Němskeje wopak posudźowało. Mnozy na zapadźe su tak a tak z předsudkami na ludźi w NDR zhladowali, z čehož bu pozdźišo wothódnoćenje. „Tak su wuchodnym Němcam dźěl jich identity rubili“, měnješe 80lětny bywši politikar.
Škoda!
Fryco Latk
Narodna zhromadźizna Delnjeje Łužicy so schadźowała
2. februara 1990 je so Serbska narodna zhromadźizna Delnjeje Łužicy w Choćebuskej Serbskej rozšěrjenej wyšej šuli „Marjana Domaškojc“ (SRWŠ) prěni raz schadźowała, a to ze zastupnikami narodneje zhromadźizny z Budyšina. Nimale 50 Serbow bě so zhromadźiło, zo bychu wo kročelach za zaručenje přichoda serbstwa po politiskim přewróće a wo zhromadnych zaměrach narodneju zhromadźiznow wobeju Łužicow wuradźowali. We wjace hač třihodźinskej diskusiji běchu sej wšitcy přezjedni, zo maja so Serbja – wšojedne, hdźe bydla, kotry swětonahlad a kotru politisku poziciju maja – zhromadnje za swój lud, za zachowanje a dalše wuwiće serbskeje rěče a kultury zasadźić.
Wo Łužicy
Do delnjoserbšćiny so zalubowała
Jako bě dwaceći lět stara, wobdźěli so Jill-Francis Ketlicojc prěni raz na literarnym wubědźowanju LND a Załožby za serbski lud, tehdy bjez wuznamjenjenja. Lětsa je sej z basnjomaj a krótkopowědančkomaj dwójce třeće myto zawěsćiła. Wosom lět je mjeztym zašło, a w nich njeje absolwentka Delnjoserbskeho gymnazija w Choćebuzu jenož tójšto wuknyła, ale je tež swój puć do swěta serbskich pisacych namakała. W Serbskej pratyji, w Rozhledźe, Płomjenju a w Stogu je wozjewjała, a wot decembra je rodźena Žylowčanka redaktorka Noweho Casnika. W Lipsku je wona sorabistiku studowała, je pólšćinu wuknyła a dwaj semestraj na Poznańskej uniwersiće była, rěčne kursy walizišćiny a iršćiny pola prof. Edwarda Wornarja wopytała. „Mjeńšinowe rěče mje fascinuja, a w keltiskich rěčach wosebje gramatika.“ Masterski studij komparatistiki a pólskich studijow je na Halleskej uniwersiće zakónčiła.
3. filmowa zyma
Berlin (SN/CoR). Do mjezynarodneho filmoweho festiwala Berlinale wotměje so 15. februara wječor 3. serbska filmowa zyma w Berlinje. Zarjadowar je znowa tamniše kino Krokodil z podpěru Domowinskeje župy Delnja Łužica.
W Bukecach tež cyle młodźi byli
Dwójce maksimum dypkow na hudźbnym wurisanju
Wojerecy (SiR/SN). Regionalne wubědźowanje „Młodźina hudźi“ je zakónčene. Z dohromady 123 wobdźělnikow w cyłkownje sydom kategorijach je 67 prěnje městno wobsadźiło, kwalifikowacych so za sakske krajne wurisanje kónc měrca w Zwickauwje. Maksimalnje móžnych 25 dypkow zdobyštaj sej smyčkowe duwo Annika Jannasch a Nicole Schwaar z Wopakeje resp. Noweho Jiwowa (Neueibau) kaž tež spěwar Fabian Schulze z Wojerec. Bratromaj Valentinej a Adrianej Simon z Pančic-Kukowa přizna jury 24 dypkow za klawěrnej soli.
Wubědźowanje organizowace towarstwo Młodźina hudźi je minjenu sobotu tradicionalny mytowanski koncert w awli Wojerowskeho Lessingoweho gymnazija wuhotowało. „Lěpšeho městna za to njebychmy nańć móhli“, wuzběhny předsyda towarstwa Dietmar Wolf. Wšako „ambicioněrowany, talentowany hudźbny dorost kubłanišćo z jeho specielnym muziskim profilowym poskitkom jara lubuje. Talent samy přiwšěm njedosaha – trěbne su předewšěm pilnosć, disciplina a wutrajnosć.“
