Budyšin (SN/JaW). Cyłodnjowska literarna dźěłarnička pod nawodom Lubiny a Dušana Hajduk-Veljković minjenu sobotu w Budyšinje bě jara wuspěšna. To wobkrući w Lipsku bydlaca a skutkowaca Lubina Hajduk-Veljkovićowa na napra­šo­wanje. „Wobdźělenje bě idealne. Spokojom smój tež z wuslědkom. Tydźenje při­ho­ta su so wudanili“, spisowaćelka po­twjerdźi. Wobdźělnicy běchu nowe teksty na ćežišćo krótka proza lite­rarnymaj profijomaj přewostajili, tak zo móžeštaj je hižo do toho ana­lyzować. Při tym dźěše hłownje wo wobsah a wuwiće swójskeho stila kaž tež wo rěčne pokiwy.

Zaměr dźěłarnički je młodym awtoram pomhać, pokiwy dawać k dalewu­wiwanju swojich tekstow kaž tež k swójskemu dalewuwiwanju jako awtor/ka. „Smy dosć chwile měli na kóždym teksće intensiwnje dźěłać“, rozłoži Hajduk-Veljkovićowa. „Móžachmoj młodym pisacym konkretne namjety a impulsy nastupajo dalše skutkowanje na puć dać.“ Dalše ćežišćo běchu rěčne zwučowanja, kaž na přikład synonymy abo jasniše zwuraznjenje namakać.

Berlin (SN/JaW). Wčera a dźensa su fachowcy za wustajeńcy, muzejownistwo a zjawnostne dźěło štyrjoch awtochtonych narodnych mjeńšin Němskeje w Berlinje dźěłarničku přewjedli. Budyski Serbski muzej zastupowaše jeho direktorka Christina Boguszowa, zastupjerjej Choćebuskeho Serbskeho muzeja njemóžeštaj so chorosće dla wobdźělić. Při­tomni běchu tež zastupnicy mjeńšinoweje rady. Pozadk dźěłarnički bě, zhotowić zhromadnu interaktiwnu pućowansku wustajeńcu wo narodnych mjeńšinach w kraju, zdźěli Berlinski mjeńšinowy běrow. K zahajenju rozhladowachu so wobdźělnicy po wustajeńcy „99 x Neukölln“.

Dźěłarnička fachowcow słuži tomu, „hłuboke zrozumjenje za samopředstajenje narodnych mjeńšin w Němskej kaž tež regionalneje delnjoněmskeje rěče wuwi­wać“, rěka w medijowej zdźělence. Fachowcy běchu so w decembrje zetkali, zo bychu so bliže zeznali. Hižo tam běchu so jednohłósnje za to wuprajili, zhromadnu přehladku zdźěłać. Zaměr nětčišeho zetka­nja je, „z wosobinskimi dohladami a stawiznami zastupnikow mjeńšin zakładny raz wustajeńcy wuwić“.

Lipsk (SN/bn). Znowa su zarjadowarjo Lipšćanskich knižnych wikow rekordnu ličbu wopytowarjow zličili. Inkluziwnje wiki wobrubjaceho rjadu „Lipsk čita“ je so cyłkownje něhdźe 286 000 ludźi – to je 15 000 wjace hač loni – na wjace hač 3 500 zarjadowanjach, kaž na přikład awtor­skich čitanjach, podijowych diskusijach a awtogramowych hodźinach – wobdźěliło resp. wo poskitkach a nowostkach najwšelakorišich nakładnistwow wobhoniło. „Jara zwjeselacy“ bě po słowach direktora Lipšćanskich knižnych wikow „zajim na literaturje lětušeho hóstneho kraja Čěskeje“. Tež minister za kulturu Čěskeje republiki Antonín Staněk­ hódnoći prezentaciju swojeho kraja jako „njewšědnje wuspěšnu. Nam je so poradźiło, publikumej na wšě 70 no­wych přełožkow do němčiny před­sta­jić. Sym dobreje nadźije, zo polěpši to wuhlady za naše awtorki a našich awtorow na mjezynarodnej runinje“, rěka w zdźělence zarjadowarjow wikow.