Nětko nutřkownje měrniša
Wosebity koncert na spočatku lěta z Heidemarju Wiesnerec
Kóždolětnje wjedźe z Barta pochadźaca, w Berlinje bydlaca a po cyłej Němskej kaž tež we wukraju skutkowaca 48lětna pianistka Heidemarja Wiesnerec rjad „Wosebity koncert na spočatku lěta“ dale. Koncerty běchu tónraz w Berlinje, Choćebuzu, Budyšinje, we Wojerecach a w Lipsku. Chrysta Meškankowa je so z wuměłču rozmołwjała.
Dopominam so derje na swoje prěnje zetkanje z Wami. Běšće tehdy studentka na wysokej šuli za hudźbu „Felix Mendelssohn-Bartholdy“ w Lipsku. Za tónle drje prěni wustup w Budyšinje w koncerće młodych talentow 1989 běše so Jan Pawoł Nagel zasadźił. Někotre lěta pozdźišo sće swój rjad nowolětnych koncertow we Łužicy zahajiła. Što wjedźe Was stajnje znowa na koncertowanje do domizny?
Krabatowy młyn nětko towaršnosć
Wot spočatka lěta wjedźe nowozałožena powšitkownowužitna towaršnosć Čornochołmčanski Krabatowy młyn. Jako jeje jednaćel skutkuje wot dźensnišeho dotalny předsyda tamnišeho towarstwa Tobias Čižik.
Čorny Chołmc (SN/CoR). Swójski běrow nowy jednaćel na terenje Krabatoweho młyna hišće nima. „Tam, hdźež moje dźěłowe městno přichodnje budźe, je hišće běrow za dźěło z dźěćimi a młodźinu“, praji Tobias Čižik Serbskim Nowinam. Po wotewrjenju Brězanoweho doma w nalěću pak je přeměstnjenje planowane.
Kak són swět změni
Julius E. Wjelan
Něhdźe 150 wopytowarjow je minjeny pjatk w Radworskej ...
Hłosy ze zašłosće warnuja
Prěnje čitanje k wopominanju woporow nacijow wulki wothłós žnjał
Budyšin (SN/CoR). Njewočakowano wulki bě wothłós na prěnje čitanje składnostnje dnja wopominanja woporow nacionalsocializma pjatk w Budyskim Serbskim domje. Na połojcu pomjeńšena žurla bě z wjace hač sto přitomnymi, mjez nimi tež zapósłanc Sakskeho krajneho sejma Hajko Kozel (Lěwica), přepjelnjena. „Smy žiwi w času, w kotrymž so mysle prawicarskeho populizma rozšěrjeja. Ćim wažniše je, woporam nacijow hłós dawać“, witaše iniciatorkaorganizatorka wječora, sobudźěłaćerka Serbskeho instituta dr. Annalena Schmidt, publikum. „Njebudźemy prawicarskim populistam polo přewostajić“, praješe Budyski wyši měšćanosta Alexander Ahrens (njestronjan), a předsyda Domowiny Dawid Statnik skedźbni w swojich postrownych słowach na aktualne podawki w sprjewinym měsće: „Mje nastróža, zo bywaja ludźo, kotřiž so za druhich zasadźeja, zjawnje wohrožene.“
Čitajće w nowym rozhledźe (27.01.17)
Za zašłe wudaće Rozhlada běch so z kanadiskim politologu Martinom Normandom wo aktiwnym poskićowanju posłužbow w mjeńšinowych rěčach rozmołwjała. Je to jedna z naprawow, kotruž tež Walizojo wužiwaja, zo bychu nałožowanje walizišćiny spěchowali. Wo prócowanjach we Waliziskej rozprawja w februarskim čisle Jan Budar, kiž poby loni z dalšimi Serbami pola tamnišeje mjeńšiny.
Jara snadnje zastupjena je w serbskim wuměłstwje filmowa sparta. Serbski filmowc a sobuzałožer Serbskeje dźěłoweje skupiny za film a telewiziju 1971, kiž jako wudawaćel tež mjezynarodnje skutkowaše, je Alfred Krawc. Z nim je so Jurij Łušćanski rozmołwjał.
Serbske dźiwadło by hinaše było, njeby-li so Beno Šram stał z dźiwadźelnikom a režiserom. Směrodajnje je wón němske a serbske dźiwadło w Budyšinje wobwliwował. Na loni zemrěteho wurjadneho hrajerja spomina Michał Lorenc.
Swědčenje delnjoserbskeho basnistwa
Prěnje zarjadowanje tohole lěta w Budyskej Smolerjec kniharni bě wčera delnjoserbske čitanje z dr. Frycom Libom. Do toho su so čłonojo towarstwa Přećeljo Smolerjec kniharnje na hłownej zhromadźiznje na lětuše předewzaća dojednali.
Budyšin (SN/CoR). Schorjeneho předsydu Kita Lorenca zastupowaca městopředsydka dr. Ruth Thiemannowa njepředstaji sobustawam wčera jenož dobru bilancu dźěławosće, ale tež nowe ideje. Tak chcedźa přichodnje šule ze serbskimi knihami spěchować. Kak ma to konkretnje wupadać, njeje hišće cyle jasne. Wěste pak je, zo wěnuja zjawny čitanski wječor towarstwa lětsa temje spisowaćel w cuzbje a Smolerjowy dźeń Jurjej Chěžce (1917–1944). Wuprawa ma tuž čłonow a dalšich zajimcow 17. junija do wotnožki Praskeho Bedřicha Smetanoweho muzeja, do hajnkownje w Jabkenicach, wjesć, hdźež bě rodźeny Hórčan jako student chwilu přebywał a basnił.
600 filmow zapodatych
Großhennersdorf (SN/CoR). Hač do poslednjeho termina wotedaća 15. januara je dohromady 600 přinoškow w kategorijach hrajny, dokumentarny a krótkofilm za Nysowy filmowy festiwal zapodatych – telko kaž hišće ženje, zarjadowarjo zdźěleja. Mjez přinoškami su nimo produkcijow z Němskeje, Pólskeje a Čěskeje a wšelakorych wysokich šulow za film tež koprodukcije tudyšich filmowcow z partnerami zdalenych krajow, kaž su to Georgiska, Moldawska, Kazachstan, Syriska, USA, Chile, Južna Koreja, Myanmar, Pakistan, Indiska, Awstralska a Ferejske kupy. Filmy za program chcedźa hač do srjedź měrca wuzwolić. Přiwzate přinoški wubědźuja so wo wosom mytow a 10 000 eurow.
14. nysowy filmowy festiwal wotměje so wot 9. do 14. meje w třikrajowym róžku Němskeje, Pólskeje a Čěskeje. K wjerškam słuša nimo něhdźe 120 filmowych předstajenjow mjez druhim zahajenski koncert ze šwicarskim gitaristom Attilu Vuralom 9. meje w Žitawskim Gerharta Hauptmannowym dźiwadle.
