Waršawa. Krawne atentaty w Parisu ze 129 mortwymi su tež w Pólskej wulki šok zawinowali. Wšitke nowiny so wobšěrnje tomu wěnuja, rěčo cyle jasnje wo „wójnje“ a wo „nadpadźe na Europu“. Pólski rozhłós słucharjam sobotu rano připowědźi, zo chcył z „dnjom ćišiny“ wopory wopominać a so rockoweje hudźby wzdać. Na zjawnych twarjenjach wisaja chorhoje tež w Pólskej poł wysoko. Na někotrych radnicach su samo francoske chorhoje jako znamjo solidarity wupowěsnyli. Před francoskim wulkopósłanstwom we Waršawje a konsulatom w Krakowje su kondolencne knihi wupołožene, zo móhli ludźo swoje sobužarowanje zwuraznić. Něhdyši wonkowny minister Grzegorz Schetyna rjekny: „Dźensa smy wšitcy Francozojo“.
PŘESYDLOWANJE je w Čěskej poměrnje njerědki zjaw, po wobwodach wšak chětro rozdźělny. Najwjace ludźi wopušća morawsko-šlesiski region, z kotrehož je loni nic mjenje hač 3 449 wobydlerjow do druhich kónčin republiki wotešło, najčasćišo do Olomoucskich stron, na južnu Morawu a do srjedźnych Čech. Karlovarski a Ústeski stej dalšej wobwodaj, z kotrejuž ludźo w nahladnej měrje wotchadźeja. Tole wuchadźa z přisłušnych datow Čěskeho statistiskeho zarjada (ČSÚ), kiž publikuje serwer iDnes. Wo stotki wobydlerjow stej so porno tomu južnočěski a Plzeński wobwod polěpšiłoj. Po statistice ČSÚ je so lěta 2014 dohromady 238 000 Čechow přesydliło, 40 000 wjace hač před pjeć lětami. Z wuwzaćom Prahi, kotraž je loni wo 594 čěskich staćanow zrostła, wšitke druhe wulkoměsta wobydlerjow zhubjeja. Zwjetša ćehnje jich do wjetšich wsow z přihódnej infrastrukturu njedaloko městow. Najčasćiši motiw, wopušćić ródnu domiznu, bywaja wyše mzdy w bóle wuwitych kónčinach, hdźež su husto dwójce, trójce tak wysoke kaž w njepřemysłowych regionach.
Waršawa. Pólska ma wot wčerawšeho nowe knježerstwo. Beata Szydło bu jako nowa ministerska prezidentka w parlamenće spřisahana. Do toho bě statny prezident Andrzej Duda stare knježerstwo oficialnje rozpušćił. Při wólbach 25. oktobra bě dotalna opoziciska narodnokonserwatiwna strona Prawo a sprawnosć (PiS) absolutnu wjetšinu zdobyła. Medije a wša zjawnosć prěnje kročele a wosebje tež personalne rozsudy noweho knježerstwa, wobstejace z 21 ministerstwow, jara dokładnje wobkedźbuja.
Nowy wonkowny minister je diplomat Witold Waszczykowski, z nutřkownym ministrom sta so dotalny frakciski šef PiS Mariusz Błaszczak. Najwjace debatow zbudźiło wšak je powołanje Antonija Macierewicza, kiž přewza zakitowanske ministerstwo. Wón bě w zwisku z přepytowanjom njezboža lětadła pólskeho prezidenta nad ruskim Smolenskom w aprylu 2010 spekulacije wo móžnym ruskim atentaće šěrił a je hač do dźensnišeho kruće wo tym přeswědčeny.
Praha (dpa/SN). Čěski prezident Miloš Zeman je w rozmołwje z nowinarjemi ćěkancow raznje kritizował. „Myslu sej, zo je to organizowana inwazija“, rjekny wón internetnemu portalej parlamentnilisty.cz. Po jeho słowach su 90 procentow wšěch migrantow na balkanskej čarje „młodźi, strowi mužojo a scyła nic bědni a špatnje wupadacy ćěkancy“. Zeman sej žadaše, migrantow z pomocu policije a wójska direktnje na mjezy wotpokazać. Jim njeměło so scyła dowolić, do kraja přińć. „Ćěkancy su poprawom złóstnicy, dokelž mjezy Čěskeje ranja“, rjekny 71lětny prezident.
Hłowa stata ma w Čěskej předewšěm reprezentatiwne nadawki. Najebać to bě Zeman hakle před dnjemi ćěkancow jako ludźi kritizował, kotřiž sej „žanu sobuželnosć njezasłužeja“. Mjeztym je aktualne woprašowanje slědźenskeho instituta STEM wunjesło, zo so 67 procentow wobydlerjow Čěskeje ćěkancow a požadarjow azyla boji. Hišće wjetša je ličba ludźi, kotřiž so islama boja. Jich podźěl wučinja 83 procentow.