Dalše ćěło blisko mjezy našli
Waršawa (dpa/SN). W pomjeznej kónčinje Pólskeje k Běłoruskej su wojacy dalšeho mortweho našli. Ćěło muža kaž tež nachribjetnik a nigeriski wupokaz běchu w lěsu pola wsy Olchówka wuhladali, kaž rěčnik policije powěsćerni PAP zdźěli. Mortwy ležeše něhdźe dźewjeć kilometrow wot pólsko-běłoruskeje mjezy zdaleny. Jeho identitu chcedźa hišće zwěsćić. Njeje wěste, hač bě wón tež wobsedźer namakaneho wupokaza.
Hižo tydźenje dołho spytaja so ćěkancy z Běłoruskeje přez wonkownu mjezu EU do Pólskeje a baltiskich krajow dóstać. Pólski namjezny škit registrowaše wčera 51 pospytow ilegalneho překročenja. Njedaloko wsy Czeremcha přełama skupina 35 migrantow namjeznu zawěru a předoby so wjacore metry na pólski teritorij. Zastojnikow slepjachu woni z laserowymi swětłomjetakami a mjetachu na nich kamjenje. Ćěkancow zajachu a dowjezechu jich wróćo na mjezu. Wčera je w Minsku lětadło z migrantami do Syriskeje wotlećało. Po běłoruskich informacijach bě 96 wosobow w mašinje typa Airbus A320. Mjeztym su wjace hač 2 000 ludźi do jich domizny wróćo słali.
Pokazuja staročěske nałožki
Marek Krawc rozprawja wo aktualnje rozjimanych temach w Čěskej
Praha. Dźeń a wjac tukrajnych a wukrajnych turistow storněruje tuchwilu swoje skazane stwy w hotelach čěskeje stolicy. „Wot 30 připowědźenych hosći za kónc tydźenja chce jenož hišće 19 pola nas přenocować“, skoržeše minjeny pjatk mějićelka jednoho z hotelow blisko Staroměšćanskeho naměsta. Václav Stárka, prezident zwjazka hotelow a hosćencow Čěskeje, praji: „Dale a wjace wopytowarjow swój dowol w Praze wotpraja, dokelž so tež lětsa tu žane hodowne wiki njewotměwaja.“
Žiwjenski niwow dale přibył
Praha (ČŽ/K/SN). Žiwjenski standard je w Čěskej tež w minjenym leće njedźiwajcy koronapandemije znowa dale přibył. Z 92 procentow 2019 zwyši so wón na 94 procentow přerězka krajow Europskeje unije. To wuchadźa z wotpowědnych datow Čěskeho statistiskeho zarjada. W susodnym kraju je žiwjenski niwow nětko tuž tak wysoki kaž w Italskej, ale wyši hač w Španiskej a Portugalskej. Najwyši žiwjenski standard maja Luxemburgčenjo, najniši porno tomu Bołharčenjo.
Čěska ekonomija pak bě loni wo 5,6 procentow spadła a tak najbóle za čas wobstaća samostatnosće kraja. Spad hospodarstwa pod poměrami koronapandemije potrjechi wšak tež a zwjetša sylnišo wšě dalše europske staty z wuwzaćom Irskeje. To wobradźi Čěskej w konsekwency přibytk socialneho bruttoprodukta we wobjimje 5,4 procentow. Nimo toho měješe Čěska loni pjate lěto za sobu najnišu kwotu bjezdźěłnosće, wučinjacu jeno 2,6 procentow. Přerězk w Europskej uniji bě w tym nastupanju 7,9 proc. Rata inflacije 2020 z runje 3,5 procentami přinošowaše tohorunja k spomóženju žiwjenskeho niwowa.
Młodostni so wotwobroćeja
Problemy pólskeje cyrkwje koronapandemije dla chětro přiběrali
Waršawa. Pólska cyrkej bědźi so z dale woteběracymi ličbami wěriwych a kemšerjow, wosebje mjez młodostnymi. Při tym njejsu wuskutki koronapandemije ani hišće přepytowane. Statistiski zarjad pólskeje katolskeje cyrkwje prawidłownje jónu wob lěto ličby kemšerjow a woprawjenjow wozjewja. Lońše ličby nastupajo institut tónkróć mjelči. Tuž znate njeje, kajke sćěhi je koronakriza loni w cyrkwjach měła. Nawoda statistiskeho zarjada Wojciech Sadłoń na naprašowanje medijow diplomatisce zwurazni, zo je „institucionalny wobłuk cyrkwje wosłabnył“. Před tydźenjemi drje su kemšerjow w cyrkwjach zaso raz ličili, na wuslědki pak budu ludźo hač do klětušeho čakać dyrbjeć.
Medijam zwostawaja tuž jenož ličby statneho statistiskeho zarjada. Te pokazuja, zo dźeń a mjenje ludźi kemši chodźi. Najhórje je na sewjeru a na zapadźe Pólskeje, hdźež registruja runje hišće 34 procentow wěriwych na Božich mšach. Na wuchodźe a na juhu kraja porno tomu hač do 80 procentow wěriwych prawidłownje kemše wopytuje.
Hody bjez hodownych wikow
Marek Krawc rozprawja wo aktualnje rozjimanych temach w Čěskej
Praha. Po 46 dnjach je čěski prezident Miloš Zeman minjeny štwórtk wojersku chorownju w Praze wopušćił. Něhdźe štyri hodźiny pozdźišo pak so tam zaso nawróći, natyknjenja z koronawirusom dla. Dokelž měješe hłowa stata jeno snadne symptomy, wěnowaše so dwaj dnjej pozdźišo zaso swojim winowatosćam a powoła Petra Fialu za noweho ministerskeho prezidenta Čěskeje republiki. Wosebita swjatočnosć, kotraž wotmě so na hrodźe Lány, bě cyle njewšědna. Fiala złoži hamtsku přisahu w přitomnosći Zemana, kiž sedźeše w škleńčanej, na akwarij podobnej konstrukciji. Předpisy płaća za kóždeho Čecha, tež načolni politikarjo dyrbja postajenu karantenu dodźeržeć, wopodstatni nawodnica hłowneho hygieniskeho zarjada krute naprawy.
Medije: Hdy směmy k mjezy?
Politika pólskeho knježerstwa korony dla a ćěkancam napřećo kritiku zbudźa
Waršawa. Postupowanje Pólskeje přećiwo koronawirusej zbudźa tele dny raznu kritiku opozicije w kraju. Jeje nawoda, předsyda Wobydlerskeje platformy Donald Tusk, je knježerstwu na nowinarskej konferency – widźomnje rozhorjeny – dospołne zaprajenje wumjetował. Wosebje wón šwikaše, zo knježerstwo poručenja poradźowanskeje komisije koronakrizu nastupajo ignoruje a tak dalšemu rozšěrjenju wirusa polěkuje.
Fachowcy běchu mjez druhim namjetowali strowotniski personal a wučerjow winowatostnje přećiwo wirusej šćěpić dać, dokelž matej tutej powołanskej skupinje k ludźom najwjace stykow. Minister za strowotnistwo Adam Niedzielski porno tomu rjekny, zo wobstejace naprawy dosahaja a zo měli so ludźo šćěpić dać, nahubniki wužiwać a so testować. Strategija je: kedźbować a wočaknyć.
Dwaj milionaj natyknjenjow
Praha (ČŽ/K/SN). Wot spočatka wudyrjenja koronapandemije w Čěskej je so hač do sameje přitomnosće w susodnym kraju wjace hač dwaj milionaj ludźi z koronawirusom natyknyło. Zemrěło je w tym času na wone wirusowe schorjenje covid-19 abo w jeho zwisku dotal 32 123 wosobow. To publikuja čěske medije, kiž powołuja so na Praske ministerstwo strowotnistwa.
Prěnje tři pady schorjenja na covid-19 běchu w Čěskej loni 1. měrca zwěsćili. Hač do kónca lěta 2020 rozrosće ličba natyknjenjow na 732 000 padow. Hranicu jednoho miliona docpěchu lětsa 2. februara, a njedźelu, 21. nowembra wozjewi centralny hygieniski institut cyłkownu sumu 2 005 561 natyknjenjow. Dźiwajo na to, zo ma Čěska něhdźe 9,5 milionow wobydlerjow, woznamjenja to, zo je so donětka hižo cyła pjećina inficěrowała.
Najhórša je epidemiska situacija na Morawje a w šleskich kónčinach kraja. W Olomoucskim wobwodźe je zašły tydźeń na 100 000 ludźi k 1 426 nowonatyknjenjam dóšło, w Zlínskim wobwodźe k 1 227 padam. Porno tomu měješe Karlovarski wobwod jeno 341 natyknjenjow.
Seniorow šćěpić nuzować?
Praha (dpa/SN). W Čěskej wo tym diskutuja, hač njeměli seniorow nad 60 lětami nuzować, zo bychu so pře koronawirus šćěpić dali. „Přičina toho je, zo je tale starobna skupina najbóle wohrožena“, rjekny amtěrowacy ministerski prezident Andrej Babiš w Praze. Poradźowanski gremij knježerstwa bě nastupajo strowotniske strachi tajku kročel poručił. Strowotniske ministerstwo dźěła nimo toho na naćisku za winowatostne šćěpjenje za wěste powołanske skupiny, kaž su to strowotniski a hladanski personal, policisća, wojacy a wohnjowi wobornicy.
Hrožace wukazanje nuzoweho stawa koronapandemije dla je porno tomu najprjedy raz z blida. Za to by oficialna próstwa prezidentow wšitkich zarjadniskich regionow trěbna była, Andrej Babiš rozłoži. Wón po poražce při wólbach parlamenta w oktobru zastojnstwo jenož hišće jednaćelsce wukonja.
Konserwatiwny wólbny dobyćer a přichodny ministerski prezident Petr Fiala bě so minjeny čas wospjet přećiwo nuzowemu stawej a winowatostnemu šćěpjenju wuprajił. W přećeženych chorownjach pak mjeztym wojacy wupomhaja.
Mała sensacija w zwěrjencu
Marek Krawc rozprawja wo aktualnje rozjimanych temach w Čěskej
Praha. Tež tutón tydźeń infekcije z koronawirusom w susodnym kraju pospochi přiběraja. Tak drje zličichu strowotniske zarjady po katastrofalnym pjatku z 22 936 nowonatyknjenjemi minjenu póndźelu „jenož hišće“ 14 480 padow, přiwšěm 3 000 wjace hač tydźeń do toho. W chorownjach lěkuja mjeztym 5 434 pacientow. Incidenca je hódnotu 1 000 hižo dawno překročiła a wučinja tuchwilu 1 029. Najchutniše je połoženje w Olomoucskim wobwodźe, hdźež bliži so wona hódnoće 1 500. Tohodla su sej politikarjo a lěkarjo přezjedni a žadaja sej po nětko hižo płaćiwym krutym prawidle 2G dalše wobmjezowanja kontaktow mjez ludźimi.
Čěska lěkarska komora wupraja so za to, pomjeńšić časowy wotstawk mjez druhej a třećej injekciju. Tak maja potrjecheni hižo po pjeć měsacach swoje posylnjowace šćěpjenje dóstać a nic hakle po poł lěće. Dotal škita drohotny serum wjace hač šěsć milionow wobydlerjow Čěskeje před natyknjenjom, 621 000 ludźi je šćěpiwo mjeztym třeći króć dóstało.
W słužbje stata tež wukrajnicy
Praha (ČŽ/K/SN). W statnych zarjadach kaž tež w zjawnostnym sektorje Čěskeje republiki – na přikład w komunalnych chorownjach – dźěła dale a wjace wukrajnikow. Na kóncu prěnjeho połlěta 2021 bě w nich tež wjace hač 8 000 nječěskich ludźi přistajenych, štož je 5 239 wjace hač před dźesać lětami. Mjeztym zo smědźa so wobydlerjo z krajow Europskeje unije wo dźěłowe městno prócować kaž Češa, trjebaja zajimcy z krajow zwonka EU za to wosebitu dowolnosć.
W prěnim połlěće 2021 skićeštej čěski stat a jeho zjawnostny sektor dźěło a tak zasłužbu něhdźe 5 300 ludźom ze słowakskim staćanstwom a 1 500 wosobam z ukrainskej statnej přisłušnosću. Dobrych 200 tajkich wukrajnych sobudźěłaćerjow ma ruski pas, a samsna ličba pólski a 100 bołharski dokument. Połojca Słowakow a Słowačkow zasłuža měsačnje přibližnje 55 000 krónow (ca. 2 150 eurow). Ukrainske dźěłowe mocy toho razu polěpšichu so w prěnim połlěće na 39 400 krónow (1 545 eurow). Ruske dóstachu 43 300 krónow (něhdźe 1 700 eurow). Rozdźěl zwisuje z rozdźělnej fachowosću a kwalifikaciju.
