Luby Helmuto Kohlo,

to šće běchu časy: Jako sće w lěću 1991 Ra­dwor wopytał, bě tam cyła wjes na nohach. Kaž tajkeho zbóžnika was witachu, samo w serbskej narodnej drasće. Wšitcy chcychu muža widźeć, kiž bě znowazjednoćenje Němskeje zwoprawdźił a kotryž lubješe kćějate krajiny. Nalada njemóžeše lěpša być. Po wobjedźe w hosćencu „Meja“ pola tehdyšeho korčmarja Měrćina Wagnera sće do swojeho helikoptera zalězł, kiž při puću do Bronja steješe. Sće ludźom hišće raz kiwał a wotlećał. Ludźo su hišće dołho wo podawku rěčeli, a starši Radworčenjo to hač do dźensnišeho činja.

Mjeztym pak je wjele lět zašło. Mamy generaciju młodych ludźi, kotřiž su Waše mjeno snano raz słyšeli, bjeztoho zo móhli wjele z nim započeć. A ta wěc z tymi kćěja­tymi krajinami wšak so tež tak prawje radźiła njeje. Znajmjeńša hodźi so wo tym diskutować.

měrc

Hłowna zhromadźizna Domowiny 30. měrca w Chróšćanskej „Jednoće“ wotměje so pod wosebje krutymi wěstotnymi na­prawami. Dokelž liča ze stron Serbskeho sejma z masiwnymi nadběhowanjemi, je so zarjadnistwo třěšneho zwjazka za runje tak njewšědne kaž zajimawe škitne za­dźěwki rozsudźiło. Podobnje kaž na Budyskich adwentnych wikach, hdźež nastaja betonowe štomiki, chcedźa wokoło „Jednoty“ betonowe chorhojčki w serb­skich barbach nastajić. Te móhł pozdźišo tohorunja Serbski sejm wužiwać.

februar

Po tym zo su twarske dźěła na křižowanišću před Radworskim kěrchowom za­hajili, wutworichu tam wobydlersku ini­ciatiwu. Jeje zaměr je, zo ma so po skón­čenju projekta zachować prowizoriska wobjězdka, kotraž za čas twarskich dźěłow nadróžny wobchad wokoło wsy wodźi. To by wobchadne połoženje we wsy chětro wolóžiło. Namjet su sej Radworčenjo takrjec wot wobydlerjow Pančic-Kukowa wot­hladali. Tam bychu tohorunja wobjězdku wokoło twarnišća noweho mosta zdźer­želi, štož pak so bohužel njeporadźi.

januar

Smy doooobyyyyyyyyyyliiiii! Nad Rujanami zmawuje zaso serb­ska chorhoj. Serbska ludowa armeja je prastare słowjanske sydlišćo wróćo zdobyła a tak starodawne žadanja wótčincow a słowjanskich přećelow we wukraju spjelniła.

Zakład historiskeho dobyća bě wukaz noweho Serbskeho sejma, zawjesć powšitkownu wobornu winowatosć za młodych serbskich pachołow. Tak móžeše prěnju bojowu jednotku z 15 wojakami na­stajić.

Cyła akcija by so bjezmała nimokuliła. Falowacych pjenjez dla dyrbjachu jenički pancer serbskeje armeje pola wikowarja šrota kupić. Hólcy w Rostockec awtowej porjedźerni w Chelnje motor přehladachu a staru karu wobarbichu. Chorhoje je Serbska kulturna informacija w Budyšinje sponserowała. Granatu, kotruž je serbski pancer sobu měł, bě něchtó na wotpadkowej deponiji w Rakecach njedaloko bywšeje municiskeje fabriki namakał. Ta wšak armeji­ tež dosahaše: Jenički wutřěl z kanony a hižo bě wšón FKK-pobrjóh wuprózdnjeny. Tak móžachu tam hnydom prěnju wojer­sku paradu přewjesć a z pancerom tróšku tam a sem jězdźić.