Awtor dźensa

Clemens Schmidt

So jónu čuć kaž Arjen Robben, to bě wčera móžno! W Lipsku mjenujcy. Tola prjed hač Wam powědam, što z tym měnju a kak je k tomu dóšło, chcu Wam wo nowych sportowych šćežkach rozprawjeć, kiž něhdyši hrajer Bayerow z Mnichowa tuchwilu kroči. Hižo jako koparski profi bě Arjen Robben znaty jako spěšny běhar na křidle. Dźensa drje Robben hižo do bula njekopa, aktiwny pak nadal je a to z chětro re­spektabelnymi wuslědkami. Nižozemjan Robben pak njeje z tym jenički kopar, kiž je so po karjerje druhemu sportej wě­nował.

Awtor dźensa

Křesćan Korjeńk

,,Raduj so njebjes kralowna, raduj so Marija ...“, takle klinčeše jutrońčku z erta křižerjow a mnohich wěriwych po cyłej katolskej Łužicy. Mjez křižerjemi běchu cyle wěsće tež mnozy, kotřiž so w swojim swobodnym času ze sportom zaběraja a to w najwšelakorišich sportowych družinach. Přihladowarjo njemóžachu spóznać, hač jedna so wo mustwoweho lěkarja, trenarja abo hrajerja, wšako jednotna drasta žane rozdźěle njepokaza. To jedne pak bě tež mjez křižerjemi jasne: Ći starši, nazhonićiši, pomhaja a kubłaja młódšich. Su jim w tej abo tamnej situaciji z dobrym přikładom, poradźowarjom a pomocnikom. A ći młódši dźakuja so ze zdwórliwosću, posłušnosću a respektom.

Awtor dźensa

Jan Hrjehor

„Prošu 11,50 eurow!“, rjekny mi njedawno přećelna młoda žona w małej budce před tunlom w Awstriskej, kiž wjedźe přez horu Aarlberg. „Hižo zaso popłatk? Sym tola předwčerawšim hakle za Awstrisku digitalnu wignetu za 9,90 eurow za dźesać dnjow kupił! A ta tu njepłaći?“, so Awstričanku přez wočinjene wokno mojeho awta přećelnje woprašam. Posměwk mi do Škodowki je hišće přećelniši a wotmołwa: „Bohužel to tak je, to je jenička móžnosć za tebje, jeli chceš sej bjezbóžny wokołopuć zalutować.“ Tuž wočinich swoju móšničku a wućahnych přichodnu bankowku. Hižo přez Čěsku sym na mojej lětušej zymskej dowolowej jězbje wokoło 13 eurow nadróžneho popłatka płaćił, nětko Awstriska. Hišće njejsym mój cil, wulku sewjernu sćěnu hory Eiger w Grindelwaldźe w Šwicarskej w Bernskim Hornim kraju, docpěł a hižo sym něhdźe 35 eurow popłatka za dróhi a tunl zapłaćił. Zo změju pozdźišo w Šwicarskej hišće dalšu „popłatkowu překwapjenku“ mi při jězbje wědome njebě.

Awtor dźensa

André Strelow

Carlo Ancelotti, Niko Kovac, Hansi Flick a nětko Julian Nagelsmann. Lisćina trenarjow pola FC Bayern Mnichow, kotřiž njeběchu ani dwě lěće w zastojnstwje, je so wo jedne mjeno po­dlěšiła. Ze sumu 25 milionow eurow, telko płaćachu Bayerojo do Lipska na RB za Nagelsmanna, bě jeho FCB jako dotal najdróšeho trenarja kupił. Jenož 21 měsacow pozdźišo wón swój job hižo zaso wotby.