Awtor dźensa

Jan Hrjehor

Stejach tydźenja w dospołnje přepjelnjenym sněhakowarskim busu čerwjeneje busoweje linije mjez čěskimaj sněhakowarskimaj arealomaj Pec pod Sněžku a Janske Laznje kaž jerij. W poslednim wokomiku bě so mi poradźiło, znajmjeńša jedne městno w starym Ikarusu dóstać. W jednej ruce mějach moje sněhaki, z tamnej spytach so při durjach busoweho šofera kruće dźeržeć. Wědźach tež, zo na busowych zastanišćach mjez najwjetšimaj sněhakowarskimaj arealomaj w Kyrkonošach wjele sobujěducych wulězć njebudźe. Tuž nastajich so na wosebitu jězbu, kiž měješe pozdźišo prěni dźěl dźensnišeje kolumny tworić. A njetraješe dołho, to skóncowachu so prědnje durje busa. Při spěšnosći 80km/h so wone wočinichu. Čěski snowboarder, kiž při nich steješe, měješe wulke zbožo, zo bě swoju desku a sebje samoho porjadnje kruće dźeržał. Wšo pikanje na knefle na armaturje busa ničo njepomhachu. Naš jězdźer dyrbješe po někotrych kilometrach jězby z wočinjenymi durjemi zastać a je reparować. Někak so jemu to tež poradźi.

,,Strowe nowe lěto a njech­ so wam wšike waše přeća a předewzaća spjel­nja“, to přeju wam, lubi čitarjo našeje póndźelnišeje sportoweje kolumny, w mjenje sobustawow Sportoweje jednotki Widźał-Słyšał-Napisał lěta 2023. A slubju wam, zo budźemy so stajnje prócować wěrjepodobne přinoški napisać, tež hdyž so pola někotrych hdys a hdys poslednje słowo druhdy ,,wuměni“. Potajkim žane fake news!

Wěrne nažel je, zo zemrě před něšto dnjemi drje najznaćiši swětowy kopar Pelè. W poslednich dnjach mnozy wo nim rozprawjachu a na njeho spominachu. Sym raz za tym pytał, čehodla rěkaše Pelè runje Pelè? Cyle jasne drje so to dopokazać njemóže, ale w swojej awtobiografiji pisa sam, zo bě wobdźiwar ,,Bilè“, wrotarja mustwa Vasco Sao Lorenco. Měješe pak ćeže při wurjekowanju mjena a tak nasta z ,,Pilè“ skónčnje ,,Pelè“. Připódla prajene, znaju serbskeho koparja z přimjenom ,,Pile“. Zwažu sebi prajić, zo z njeho žadyn Pelè njebudźe.