Z pohladnjenčkom do stawiznow lochkoatletiki chcu dźensa pokazać, što móže sportowy wukon woznamjenjeć a kotre dramatiske wokomiki móža z toho wurosć: Nazymu 1968 wotměchu so w Mexiku-měsće olympiske hry. Ze sensacionelnej dalokosću 8,90 metrow w prěnim pospyće wubědźowanja w da­lokoskoku zawěsći sej 22lětny Američan Bob Beamon hnydom złotu medalju a polěpši wuznamnje dotalny swětowy rekord. Haj, wšudźe rěčeše a pisaše so wo „skoku do 21. lětstotka“.

Hižo někotre razy so mje ludźo za tym prašachu, kak je poprawom móžno, zo hodźinu po wothwizdanju koparskeje hry – na přikład Budissy Budyšin w regionalnej lize – hižo pjeć- abo samo wosommjeńšinsku rozprawu wo samsnej partiji w telewiziji widźiš.