Awtor dźensa

Jurij Bjeńš

„To móže zaso raz prawje napjata sezona być!“, słyšu nětko časćišo w Ralbičanskim Stadionje přećelstwa. Měnjena je w prěnim rjedźe 1. zwjazkowa koparska liga. RB Lipsk, Bayern Mnichow abo tola BVB? Tež ja móžu sej předstajić, zo Bayerojo lětsa přewulku wostudu njezměja.

Awtor dźensa

Křesćan Korjeńk

Musical ,,Quo vadis-dokal dźeš?“ drje su słowa, kotrež słušachu poslednje dny do wokabulara mnohich wobydlerjow kónčiny podłu Klóšterskeje wody. Wo wuspěchu tutoho projekta bu wšak hižo mnoho pisane – chwalo a připóznawajo. Wulka ličba wopytowarjow drje je argument sam za sebje. Někotryžkuli kasěrar sportoweho towarstwa by so nad telko přihladowarjemi zwjeselił. A k tomu hišće fairny, wustojny publikum. Sony su sony!

Njech je mi dowolene, zo so w swojim dźensnišim komentarje spočatnje zasłužbnemu serbskemu sportowcej-běharjej wěnuju, kiž je před měsacomaj 85. narodniny swjećił. Dobry znaty mi njedawno praji: „Tón Jurij, tón běha a běha a běha. Myslu sej, bjez běhanja njemóže žiwy być.“ Haj, hdyž je čłowjek z 85 lětami hišće strowy a čiły, móže so zbožowny čuć. A hdyž so w tej starobje hišće­ na wubědźowanjach w běhanju wobdźěla, da je to něšto njewšědne.

We Wutołčicach, w Baćońskej wosadźe rodźeny Jurij Nuk je tajki fenomen. Kóžde lěto wobdźěla so wón na mnohich běhach po cyłej Łužicy, ale tež zwonka njeje a wobsadźa w swojej starobnej klasy zwjetša jedne z načolnych městnow.

Awtor dźensa

Michał Nuk

Zašłe kóncy tydźenja stejachu zaso w znamjenju wutrajnostneho třiboja we Łužicy. Knappenman we Łazu je tež lětsa znowa syłu sportowcow přiwabił. Triatlon při Třižonjanskim jězoru je tak woblubowany, dokelž namaka kóždy zajimc, wšojedne hač dołholětny rutinjej abo započatkar, kmany poskitk. Přede­wšěm kolesowanska čara po dobrym asfalće je płona a spěšna, nichtó so dołhich horow bojeć njetrjeba. Kontrast k tomu mamy 80 km južnišo. Krótko do Knappenmana wotměwa so wokoło Olbersdorfa O-See-Challenge, kotraž słuša do swětoweje wubědźowanskeje serije XTERRA. Tu je hinaši material trěbny – po płuwanju dźe na mountainbiku přez kamjenje a korjenje Žitawskich horin, prjedy hač so naročny crossowy běh přizamknje. To wo­sebje na kolesu woznamjenja, zo trjebaš nimo wutrajnosće tež dobre techniske a koordinaciske zamóžnosće, njechaš-li přewjele mocow a časa zhubić.