Widźał, słyšał, napisał (11.02.19)
Awtor dźensa
André Strelow
Tež na kopanišćach skónčnje zaso za bulom honja. Druha połserija je so započała, a nětko tež w zwjazkowej koparskej lize zaso napjatosć knježi. Rekordny němski mišter z Mnichowa steji pak jenož na druhim městnje tabulki, a to ze zastatkom pjeć dypkow k načolnikej Dortmundej. Lochkosć, kotruž Bayerojo w minjenych lětach wuprudźachu, jim dotal faluje. Přiwšěm hišće ničo rozsudźene njeje. Wosobinsce so nadźijam, zo napjatosć hač k poslednjemu hrajnemu dnjej traje. Rjenje by było, bychu-li so načolnym cyłkam BVB, FCB a Borussiji z Mönchengladbacha hišće dalše zastupnistwa přibližili. To by atraktiwitu na dalši wyši stopjeń přinjesło. Zajimawe tohorunja budźe, kak Mnichowčenjo z champions league, ze zwjazkowej ligu kaž tež z pokalnym kołom DFB trójne poćežowanje znjesu.
Widźał, słyšał, napisał (04.02.19)
Awtor dźensa
Tadej Cyž
Tež w regionalnej lize sewjerowuchod so zymska přestawka nachila. Za hornjołužiske mustwa FC Hornja Łužica Neugersdorf, Budissa Budyšin a Biskopičanske KT liči w zestupnym boju kóždy dypk. Tak je so w cyłkach tež personelnje tójšto změniło. Najwjetše změny w kadrje měješe cyłk FC Hornja Łužica Neugersdorf. Po tym zo wjacori hrajerjo mustwo wopušćichu, prezentowaše sportowe wjednistwo krótko do kónca transferoweho woknješka hišće pjeć nowopřichadow. Hač pak móža a budu nowi koparjo mustwo woprawdźe zesylnić, budźe so pokazać. Po wjetšim nowowusměrjenju w lětnej přestawce dyrbi trenar Karsten Hutwelker nětko mustwo zaso k prawej jednotce formować.
Widźał, słyšał, napisał (28.01.19)
Awtor dźensa
Beno Šołta
Budźe formula E naslědnik formule 1? Z tymle prašenjom započa so njedawny interview z Nicom Rosbergom, kiž je něhdyši swětowy mišter formule 1. Poprawom mje woboje wulce njezaběra. Formulu 1 sym jako młodostny rady hladał, mjeztym sym lóšt na njej zhubił, dokelž je mi tróšku přewostudła. Po interviewje z Rosbergom pak pohladach raz do formule E.
Widźał, słyšał, napisał (21.01.19)
Awtor dźensa
Stefan Šmit
Kajke běše to zaso dožiwjenje, jako so tydźenja swětowa elita w spěšnosněhakowanju wosrjedź Drježdźan wubědźowaše. Mjeztym druhi raz staj sportowaj redaktoraj René Kindermann a Torsten Püschel, wobaj z Drježdźan, tutón wulkotny event na nohi stajiłoj. Dohromady wubědźowachu so sobotu a njedźelu na nowej a porno lońšemu přeměnjenej a podlěšenej čarje sportowcy z 20 krajow. Škoda jeničce bě, zo je po zdaću hač na saksku stolicu tón kónc tydźenja wosebje w bliskej Sakskej Šwicy wjele sněha ležało. Tak ćehnješe so znowa wubědźowanska čara kaž běła smuha po krajinje při Łobju. A tola, wobrazy, kotrež su mjezynarodne telewizijne sćelaki wusyłali, běchu znowa přewšo spektakularne. Dohromady 3,3 miliony ludźi su jeničce sobotu sydom mjeńšin trajace zjeće dnja w ZDF sćěhowali. K tomu su chinski narodny sćelak kaž tež NBC a Eurosport wubědźowanja před swětoznatej barokowej kulisu Drježdźanskeho stareho města přenjesli.
Widźał, słyšał, napisał (14.01.19)
Awtor dźensa
Toni Ryćer
W našim dźensnišim hektiskim žiwjenju wažu sebi měr a ćišinu w delanskej domiznje. Štó dźě dyrbjał so do Šunowa zabłudźić? Nimo derje hladanych statokow nimaš tu žadyn wobchod, ani šulu, pěstowarnju abo lěkarja. A internet dračuje so ze směšnymi 800 bitami. Jenički wšědny přemysłowy serwis poskića Langec frizerka. Powěda so, zo dóstanješ tam w čakarni tež šalku kofeja. Chceš-li pak k frizerej, trjebaš włosy za třihanje, a te ja nimam. Narunać pak njeda so měr w našej wsy, tež hdyž wobkedźbuju rosćacy wobchad wosebje kónc tydźenja na dróhach. Bohužel su to zwjetša awta hladanskich słužbow.
Widźał, słyšał, napisał (07.01.19)
Awtor dźensa
Tomaš Faska
Byrnjež tež lětsa prěni awtor tuteje tradicionalneje kolumny w našim serbskim dźeniku njebył – po tym zo je so nowačka Tereza Wićazowa zašłu srjedu tu trochu bliže předstajiła –, chcu Wam, waženi čitarjo a přećeljo sporta, ze swojimi prěnimi słowami wosobinsce hišće wupřeć strowe a wuspěšne lěto 2019. A pokuknu dźensa zdobom za Was a z Wami zhromadnje, prěnju póndźelu noweho lěta, na protyku lětušich sportowych wjerškow. Na čo směmy so wjeselić?
Widźał, słyšał, napisał (02.01.19)
Awtorka dźensa
Tereza Wićazowa
Tereza Wićazowa z Budyšina pisa dźensa prěni raz za rubriku Widźał(a), słyšał(a) – napisał(a) a je tak w stawiznach sportoweje kolumny nimo Ralbičanki Haleny Jancyneje druha žona. Rodźena Kukowčanka Tereza Wićazowa dźěła w Budyskim šulskim a zetkawanskim centrumje na Serbskim gymnaziju jako sportowa wučerka. Nimo toho je wolejbulistka Hrajneho zjednoćenstwa Pančicy-Worklecy we wobwodnej lize. Nětko w lěće 2019 je wona jedna z dweju WSN-nowačkow.
Wulki sportowski dźak wupraja sportowa redakcija Serbskich Nowin na tutym městnje Budyšanej Jurjej Nukej, kiž je swój WSN-pisak po wjac hač 100 přinoškach złožił.
Dźesać lět sym w Chrósćicach najprjedy w holčim, pozdźišo w žónskim koparskim mustwje za bulom honiła. Lěpje prajene, sym bule popadnyła abo wotwobarała, zo bych přećiwniskim wrotam zadźěwała. Moje dźěło běše našu klětku čistu dźeržeć. Dokładnu bilancu žanu nimam, ale myslu sej, zo sym swoje dźěło derje dosć wukonjała.
Widźał, słyšał, napisał (27.12.18)
Awtor dźensa
Jan Hrjehor
Bratraj-lodohokejistaj hrajetaj w narodnym mustwje za Němsku, třećemu synej małeho ratarja ze Slepjanskeje kónčiny, kiž ma doma stadło wowcow, rasowe nukle a někotre wosebite kokoše, pak so skok k najlěpšim dorostowym lodohokejistam Němskeje hišće poradźił njeje. A potom je tam tež hišće sportowy wučer, kiž dyrbi chětro krutemu nanej wo zadźerženju swojeho syna rozprawjeć ...
Widźał, słyšał, napisał (17.12.18)
Awtorka dźensa
Halena Jancyna
Widźał, słyšał, napisał (10.12.18)
„Hej, pój, to njesměmoj na žadyn pad skomdźić“, wona rjekny, torhny mje do taksy, a po někotrych kilometrach stejachmoj při starće. Bjez rěčnych kmanosćow, něhdźe 8 000 km zdalenaj wot Łužicy. Sportowu drastu njemějachmoj, ani prawe běhanske črije. Za mjenje hač wosom hodźin dźěše hižo lět wróćo do Němskeje. Běše to posledni wječor naju jězby po kupje Sri Lanka. Tři njedźele połne impresijow ležachu za namaj. Tři njedźele, w kotrychž běchmoj so nimale wšědnje do noweho regiona podałoj a sej kóždy druhi dźeń hinaši nóclěh pytałoj. Pomału ze swojej partnerku ani předźěłać njemóžachmoj, što wšo běchmoj dožiwiłoj. A nětko? A nětko wobdźělichmoj so spontanje na nócnym běhu „Colombo night run“ w stolicy Sri Lanki. Hodźinu do toho bě moja přećelka zarjadowanje w socialnej syći namakała, wačoki běchmoj w hospodźe wostajiłoj. A što dyrbju rjec? Akcija běše idealne zakónčenje naju jězby. Njebě tak, zo mějach přebywanje w cuzbje syte, ale kusk mučny běch přiwšěm.
