Lubi čitarjo, poprawom wšak chcych so tule zaso raz na naš kuriozny koparski swět wusypać. Wosebje w času korony je wšak so wón a su so tež jeho zamołwići zaso raz wot najlěp­šeje stronki pokazali – kedźbu, ironija! Potom pak běše mój kolega Tomaš Faska dźens tydźenja spěšniši a je tu hižo wobšěrnje swoje mysle nastupajo tónle system zapodał. Pod smužku – telko chcył hišće dodać – njedźiwam so, zo su jako prěnje zaso kopańcu hrali – a to prjedy, hač su scyła wukazy zjawneho žiwje­nja zaso wolóžili.

Pokazało so tež je, hdyž wo pjenjezy a priwilegije dźe, su sej­ samo­ funkcio­narojo konkurěrowacych towarstwow přezjedni. Rummenige, Watzke a co. su dźě wšitcy zjawnje na restart­ kopańcy tłóčili a při tym swoje dobre­ zwiski k politice wužiwali.

Jutře by tak daloko było – połna Mnichowska Allianz­-arena a miliony ludźi před wobrazow­kami bychu sćěhowali, kak swětowej mištraj lětow­ 2014 a 2018, Němska a Francoska, do najwjetšeho europskeho koparskeho turněra startujetej. A sam bych so hižo wjeselił na swój dowol přichodny tydźeń w Korutanskej. Tu chcych sej hry serbskeje wubranki na europeadźe wobhladać a zdobom składnosć wužić, ze swojim najlubšim sportowym nastrojom, ko­lesom, sej wuchodne Alpy w Korutanskej a Słowjenskej wotkryć. Konjunktiw „bych“ a „chcych“ tele dny jara husto w zwisku ze sportowymi zarjadowanjemi wužiwamy. Fleksibelnosć je tuchwilu bjezdwěla jedna z najbóle prašanych kajkosćow pola sportowcow a organizatorow. Za mjezynarodny koparski wulkowjeršk – kaž je to za mnje jako­ Serba euro­peada – wopokaza so nětko jako lěpšina, zo přewjeduja ju jenož kóžde štyri lěta. Tak je poměrnje lochko móžno ju wo cyłe lěto přesunyć.

,,Štóž z was je bjez winy (hrěcha), njech ćisnje prěni kamjeń ...“ Tele wupra­jenje z biblije drje kóždy znaje, ale najmjenje na sebje samoho poćahuje. A w zwisku ze sportom cyle wěsće docyła nic. Na zbožo w našich regionach kamjenjowanje zasudźeneho/zasudźeneje njeznajemy, w někotrych krajach pak je dźensa hišće nałožuja. Smy tuž wo wjele lěpši, dokelž kamjenjowanje zasudźamy a njepraktikujemy? Ně, nažel nic! Smy nama­kali nowu formu ka­mje­njowanja, wotměwacu so w medijach, a to z jara wulkim wotmachom tež na polu sporta. Tuchwilu sobu najznaćiši wopor je Ralf Minge, kotremuž wumjetuja, zo je z pjenjezami wopak wobchadźał, njewudawajo za nakup nowych koparjow Dynama Drježdźany. Zabyli su někotři jeho zasłuž­by, jako wjedźeše přez lěta towarstwo z čerwjenych ličbow do solidneho dźensnišeho stawa. Sym wćipny, kak so wšitko wuwije, kak fanojo reaguja, kak mustwo reaguje, jeli to docyła smě.

Jako minjeny tydźeń pola přećela na zahrodźe kołbaski pražachmy a sej načolnu hru zwjazkoweje ligi mjez Dortmundom a Mnichowom wobhladachmy, běše nimale wšo perfektne: Słónčko rjenje swěćeše, kołbaska bě jara słódna a bjesada lóštna. Štož pak w telewizoru běžeše, bě zrudne. Z mojeho wida je wopačne mustwo dobyło. Dokelž přihladowarjo w stadionach njejsu, wupadaše wšo bóle za testowej hač za dypkowej hru. Njemějach w druhim połčasu scyła wjac přewulki lóšt, partiju dale sćěhować. Tež čorno-žołte derbyjowe dobyće 4:0 přećiwo módro-běłym susodam z Gelsenkirchena srjedź meje njeje mje wulce zwjeseliło. Bjez fanow nima za mnje lětuša sezona tajku hódnotu kaž hewak. Statistiki drje njełža a měnja, zo su hry podobnje intensiwne a spěšne kaž do korony. Dwubojow je po zdaću samo wjac a wuslědki su zdźěla tež jara překwapjace. Najebać to pak njemóžu so prosće z tučasnej kopańcu spřećelić, dokelž njewuwiwaja so we mni začuća, kajkež bych z realnymi přihladowarjemi w stadionje měł.