Widźał, słyšał, napisał (08.03.21)
Nichtó njeby sej myslił, zo pandemija tak dołho traje. Hižo měsacy tež amaterski sport pod njej chětro ćerpi. Jenož indiwidualny sport je dowoleny. Što je potajkim hišće móžne? Tak zwostawa najprjedy raz jenož wosobinska fitnes doma abo běhanje na čerstwym powětře. Prašenje wšak je, kotre sportowe družiny směmy hdy zaso přewjesć a pod kotrymi wuměnjenjemi?
Swobodny stat Sakska je hruby plan wozjewił, kak chce krute postajenja w sporće wolóžić. Hižo nětko je jasne, zo budźe to jenož móžno pod wěstej incidencnej hódnotu a po negatiwnym tesće. Wostanje-li hódnota incidency pjeć dnjow dołho pod 100, potom je sport po dwěmaj wosobomaj hromadźe dowoleny. Tež skupiny móža hromadźe sportować, ale jenož dźěći pod 15 lětami, a jich smě maksimalnje 20 być – wězo jenož wonka. To płaći wot dźensnišeho, tuž mamy hódnotu we wokrjesu wobkedźbować. Dalše wolóženja su wot 22. měrca móžne. Tež tu płaćitej mjenowanej směrnicy: incidencna hódnata a koronatest. Što to za towarstwa dokładnje rěka, přiwšěm jasne njeje.
Widźał, słyšał, napisał (01.03.21)
Njeje wšeho hišće dosć? Abo kelko je dosć?
Pad trenarki Gabriele Frehse njepokazuje jenož powšitkowny dilema profijoweho sporta při spěchowanju swójskeho dorosta. Zdobom wotkrywa wón struchłe fasety, kotrež měli po měnjenju mnohich sportowych funkcionarow zjawnosći poprawom zakryte wostać. Dźe tu wo zasadne prašenje, kak jara smědźa nazwučowarjo swojich chowancow spěchować, haj, jich k lěpšim wukonam pohnuwać a wužadać.
W padźe Frehse njezaběra so jenož justica z wumjetowanjemi, ale wot zašłeho tydźenja tež politika. 14 atletkow wuměłskeho ćěłozwučowanja bě skoržiło, zo bě nazwučowarka na olympiskim zepěranišću w Kamjenicy Gabriele Frehse je pod bolosćemi trenować dała, bě je mentalnje ponižała, trašiła a samo k branju medikamentow nućiła. Wona wšak wumjetowanja hač do dźensnišeho wotpokazuje. Dźiwne je, zo Frehse w Kamjenicy dale trenuje. Přetož tež jeje tuchwilny dźěłodawar hišće kruće k njej steji.
Widźał, słyšał, napisał (22.02.21)
Po tójšto lětach běše to skónčnje zaso raz tajke prawe wjedro za zymski sport. A mnohim Serbam, kotřiž njemóžachu tónraz na zymski dowol, bě to znajmjeńša małe narunanje. Štóž njeje sankował, sněhakował abo na lodźe so smykał, bě sam wina.
Wosebje za twjerdu sportowu družinu lodohokej běchu wuměnjenja perfektne, štož sym tež ja skónčnje zaso raz runja druhim lubowarjam čorneje gumijoweje tačele wužiwał. Apropos twjerda sportowa družina: Ze swojimi kumplemi a fachowcami běch w minjenych lětach zas a zaso filozofował, kotra z njeličomnych sportowych družin drje je najćeša, najbolostniša, najekstremniša abo najbóle napinaca? Ženje so jednohłósnje na jednu jeničku dojednali njejsmy. Kak chceš to tež měrić abo po kotrych kriterijach wuzwolić? Namjety běchu stajnje jara wšelakoreho razu: diwersne bojowniske sportowe družiny, mjetańca, skakanje ze sněhakami, krosnowanje na najwyše horiny, wodobul abo samo šach?
Widźał, słyšał, napisał (15.02.21)
Kulow – helaw, WCV – helaw, Nowa Wjeska – helaw!
Předstajće sebi, je róžowa póndźela, a w Kulowje njeje ani jeničkeho swjedźenskeho woza ani jeničkeje póstniskeje skupiny ani jeničkeho přihladowarja – ně, to poprawom njeńdźe, ale dźensa tomu tak bě. Hózk 2021 woła spočatk septembra ,,ekstremnych sportowcow“ na wubědźowanje. Hač drje by so tón abo tamny w póstniskim ćahu tež lětsa do kotoła sydnył a so po měsće wjezć dał? K tomu słuša při tuchwilnych temperaturach wulka zmužitosć, runje tak, hdyž so na čaru w Hózku podaš a sebi předewzaš sobu mjez prěnimi być – respekt!
Widźał, słyšał, napisał (08.02.21)
Dźensa chcu tróšku wo tuchwilnym wšědnym treningu wutrajnostnych sportowcow we Łužicy rozprawjeć. Běharjo, kolesowarjo abo sněhakowarjo wot pandemije cyle tak wobmjezowani njejsu a wjedrowe wuměnjenja su runje chětro dobre. Wot spočatka januara wabi sněh w našich kónčinach do zymskeho sporta. Tak husto kaž lětsa njejsym hišće dyrbjał swoje běhanske „deski“ wóskować. Preparowarjo lojpow w Załomju a na Sokolniku pola Wjazońcy su sej wšu prócu dawali a telko kilometrow kaž móžno čarowali, tež zo bychu sej sněhakowarjo z puća hić móhli. A hdyž njechaš runje sobotu abo njedźelu připołdnju do sněha, da móžeš tež dosć sam a z wotstawkom po puću być – snano tež po wječorach, hdyž steji kmana lampa na čoło (Stirnlampe) k dispoziciji. Zo bychu so kóšty za hladanje lojpow znajmjeńša tróšku amortizowali, su při přistupje do někotrych lojpow małe pokładnje dowěry zarjadowane, hdźež móže sportowc/ča rady něšto eurow za swoju hewak bjezpłatnu zymsku zabawu zawostajić. Tak tež industrija za běhanske sněhaki runje skoržić njemóže.
Widźał, słyšał, napisał (01.02.21)
Zyma, tójšto sněha a niske temperatury su za susodne kraje kaž Čěsku, Pólsku abo Awstrisku samozrozumliwe. Nětko, po wjacorych lětach abstinency, mamy tež pola nas skónčnje zaso raz wjedro, kotrež je w mjenowanych kónčinach w zymje přeco móžne. A to wšo w času, hdyž blišu wokolinu wopušćić njemóžemy abo njesměmy. Štož móžemy jako tróšt hódnoćić, je wobsedźerjam prózdninskich domicilow w sněhowych arealach wězo wulka katastrofa. Turisća faluja a z nimi dochody, přichod je njewěsty. Wliw na dalše wuwiće pak nimamy. Na zbožo móžach knihowany dowol hišće storněrować.
Widźał, słyšał, napisał (25.01.21)
Nětko je jasne, Sakski koparski zwjazk kaž tež Zapadołužiski koparski zwjazk stej wobaj dypkowe hry hač do kónca februara wusadźiłoj. To rěka, zo so zymska přestawka na njewěsty čas podlěši. Tež dalše sportowe družiny wostanu bohužel dale w zymskim sparje.
Widźał, słyšał, napisał (18.01.21)
Ćežki čas to nětko w pandemiji, hdyž njehodźa so žane mustwowe sportowe družiny přewjesć a hdyž njemóžeš sej je live lubić dać. W telewiziji wšak atmosfera tajka njeje, kaž ju znaješ. Ale sym optimistiski, zo to zaso raz budźe, a snano sej to potom bóle česćimy, štož běše za nas hewak samozrozumliwe.
Tak dołho móžemy na přikład biatlonej přihladować. Napjaty je tón kaž kóžde lětoo. Tajku kombinaciju dźě zrědka maš: wulku strapacu wonka w kole, horu horje, horu dele. A potom dyrbiš cyle koncentrowany na třělnišću stać a mału čornu dźěrku trjechić. Kak rady bych to tež raz sam wuspytał! Na zbožo je kalender biatletow lětsa runje tak derje pjelnjeny kaž hewak. Jenička změna: Na wšěch stacijach su woni dwójce, za to maja mjenje stacijow.
Widźał, słyšał, napisał (11.01.21)
W swojej prěnjej kolumnje lěta 2020 rozprawjach hižo spočatk februara wo prěnich změnach mjezynarodneho motorsportoweho kalendra. Rozšěrjaceje koronapandemije w Chinje dla pak su tamniši běh formule E wotprajili, kotryž bě w měrcu planowany. Tehdy njemóžach sej předstajić, kajke hoberske sćěhi pandemija w dalšim wuwiću změje. Tak informowach wo dalšich motorsportowych terminach, wosebje wo tych, kotrež chcychu w našej bliskosći přewjesć. Nimale wšitke terminy dyrbjachu wotprajić abo přepołožić. Wosebje mjeńše zarjadnišća běchu ćežko potrjechene, dokelž pobrachowachu jim tak zdobom za dalše dźěło a wobstaće towarstwow nimoměry wažne dochody. Tak so na přikład we Wuhančicach-Koblicy, hdźež přewjeduja w normalnych lětach němske a europske mišterstwa w awtocrossu, žane koła njewjerćachu. Tež na motocrossowej čarje w Jaworje bě jara měrne. A samo MotoGP na Sakskim kole dyrbjachu w juniju wotprajić. Sym sej wěsty, zo so tale wurjadna sezona na aktualne lěto a dalše lěta wuskutkuje.
Widźał, słyšał, napisał (04.01.21)
Wulka překwapjenka nimale dospołnje wupadnjene sportowe hibanje wokoło hód a Noweho lěta njebě. Ale doma sedźo abo na kolesu do pedalow teptajo sym sej minjene dny hakle tak prawje wuwědomił, kelko sportowych zarjadowanjow je w tym času wupadnyć dyrbjało a hišće wupadnje. Tak na přikład tež dwaj dnjej do patoržicy mjeztym tradicionalny nócny wolejbulowy turněr serbskeje a němskeje młodźiny w Pančicach-Kukowje. Hižo w lěću běchu so zamołwići za turněr młodźinskeho towarstwa Pawk wjednistwo Serbskeho Sokoła prašeli, kak wone nachwatanje 38. sokołskeho wolejbuloweho turněra wo pokal Domowiny planuje, a što rěči přećiwo přewjedźenju. Tón bě mjenujcy za 16. meju w sportowym kalendrje zapisany. Hač do dźensnišeho pak njeje so pandemije dla nachwatać hodźał. Tež wo pokal Pawka njejsu so 22. decembra wubědźować směli.
