Wojerowsku župu šěsć lět aktiwnje nawjedował

štwórtk, 15. septembera 2016 spisane wot:

Tyšna powěsć je nas docpěła, zo je wučer a bywši župan župy „Handrij Zejler“ Jurij Nuk po ćežkej chorosći 2. septembra we Wojerowskej chorowni zemrěł. 20. oktobra 1926 bě so wón w Dobrošicach pola Njeswačidła małoratarskej swójbje narodźił. Po nawróće z jendźelskeje wójnskeje jatby poda so 1947 na Serbski wučerski wustaw w Radworju.

Jurij Nuk wučerješe najprjedy na wšelakich šulach Budyskeho wokrjesa, kaž w Bolborcach a Koblicach. 1952 přińdźe jako wučer do Brětnje a podawaše tam tež serbšćinu. Kaž hižo dotal je wón tohorunja w Brětni aktiwnje w Domowinskej skupinje skutkował, na čož wuzwolichu jeho za předsydu. Lětdźesatki zwjazowaše rodźeneho Dobroščana wuska zhromadnosć z Brětnju, hačkuli bě tam jeno tři lěta wučerił.

Podpěruja skupinu Ćisk

wutora, 13. septembera 2016 spisane wot:

Leppersdorf (SN). Serbska ludowa rejwanska skupina Ćisk je mjez tymi dźesać projektami, kotrež je firma Sachsenmilch we wobłuku zhromadnje z rozhłosowym sćelakom Hitradio RTL wotměwaceje so akcije „Sylnje za Saksku/Stark für Sachsen“ wuzwoliła. Sachsenmilch podpěruje 5. dworowy swjedźeń w Ćisku přichodnu sobotu mjez druhim z wulkej porciju twaroha, zo by skupina na jednym z wuzwolenych statokow typisku łužisku jědź, twaroh z lanym wolijom, přihotować móhła. Pokładnik Ćišćanskich rejwarjow Wolfgang Finger je dobropis za to dóstał.

„Chcemy angažowanym ludźom móžnosć dać, swoje projekty šěršemu publikumej předstajić. To płaći wosebje za projekty, kotrež hewak wulce wobkedźbowane njejsu. Z akciju chcemy angažowanym ludźom swoje připóznaće zwuraznić a so prosće dźakować, wšako njeje jich zasadźenje samozrozumliwe“, rozłožuje marketingowa nawodnica Leppersdorfskeje firmy Sachsenmilch Annett Stang w zdźělence.

Wjace towarstwow w župje

pjatk, 09. septembera 2016 spisane wot:

Před 70 lětami su Domowinu za Delnju Łužicu załožili. Dokładnje na historiskim dnju 8. septembra zetkachu so wčera Domowinjenjo a dalši w Choćebuskim Serbskim domje, zo bychu na wažny podawk dopominali.

Choćebuz (HA/SN). Historikar Serbskeho instituta dr. Pětš Šurman přednošowaše wo tym, kak bě k załoženju delnjołužiskeje Domowiny pola Lažkojc we Wjerbnje přišło. 30 dowěrnikow ze wšelakich wsow so tam tehdy zetka a je demokratisce prěnje předsydstwo wuzwoliło. Hornjoserbski prawiznik Jurij Rjenč załoženje sobu podpěrowaše, a Choćebuska sowjetska komandanturu to dowoli. Hakle 1949 dósta Domowina w Delnjej Łužicy wot braniborskeho knježerstwa oficialnu dowolnosć, zo smě skutkować. Spočatk bě njesměrnje ćežki, jeničce 140 z tehdy něhdźe 20 000 Domowinjanow bě z Delnjeje Łužicy, dwě lěće pozdźišo bě jich hižo 1 065 čłonow mjez 14 600.

Z přikładami referent pokaza, kak bě Domowina w Delnjej Łužicy wot wšeho započatka sobu wobwliwowała, zo su narodnostnu politiku w Braniborskej a pozdźišo we wobwodźe Choćebuz zwoprawdźili. Často njebě to runjewon lochko.

Zajimawu a powučnu ekskursiju dožiwili

štwórtk, 08. septembera 2016 spisane wot:

Sobustawojo Spěchowanskeho towarstwa­ Serbskeho muzeja a Maćicy Serbskeje su w europskej kulturnej stolicy Wrócławje byli.

Do lětušeje kulturneje stolicy Europy Wrócławja w susodnej Pólskej poda so sobotu, 27. awgusta, skupina 17 zajimcow – mjez nimi pjeć dźěći. Na ekskursiju běštej Spěchowanske towarstwo Serbskeho muzeja a Maćica Serbska, sekciji ludowěda/muzejownistwo a literatura/wuměłstwo, swojich čłonow přeprosyłoj.

Z młodym mjezynarodnym widom na Krabata

wutora, 06. septembera 2016 spisane wot:

Budyšin (SN/MiR). Zajimcy wšitkich generacijow běchu sej na wotewrjenje wustajeńcy „Krabat between us“ wčera popołdnju do Budyskeho Kamjentneho domu dóšli. Tam pokazuja nětko wuměłske twórby 27 do projekta zapřijatych serbskich, němskich a čěskich młodostnych kaž tež młodych ćěkancow z Afghanistana a Syriskeje. Woni běchu so w zańdźenymaj měsacomaj na kreatiwne wašnje z figuru Krabata-ćěkanca a z wiziju za zhromadnu Hornju Łužicu rozestajeli, wužiwajo za to načasne wuměłske stile kaž urban- abo street-art. „Při tym pak njeje jenož wo to šło, so wuměłsce z temu zaběrać. Zhonili smy tež wo dóńće ćěkancow, kotřiž běchu na projekće wobdźěleni. A to je naše tworjenje sylnje wobwliwowało“, rjekny serbska gymnaziastka Lucretia Brězanec. Walburga Wałdźic čitaše k zahajenju wustajeńcy a k rozmyslowanju wurězki z literarnych twórbow Jurja Brězana a Měrćina Nowaka-Njechorńskeho. Kubłanska referentka Domowiny Rejzka Wałdźic dźakowaše so wulkej ličbje sobuskutkowacych a podpěraćelow.

Znowa jeničcy serbscy zastupjerjo

póndźela, 05. septembera 2016 spisane wot:
24. króć je so Serbski muski chór Delany na Dnju Saksow wobdźělił. Lětsa bě cyłk w Limbachu-Oberfrohnje, hdźež předstaji so wčera jako jenički zastupjer Serbow pod nawodom dirigenta Handrija Henčla dwójce na jubilejnym 25. najwjetšim ludowym swjedźenju Sakskeje. Při prěnim wustupje na jewišću Sakskeho krajneho sejma běchu sej přihladowarjo dešća dla do stanow wućeknyli. Ale tež tam móžachu poskićene serbske, němske, čěske a słowakske pěsnje derje sćěhować. Při druhim wustupje na jewišću Envia žnějachu delanscy mužojo připóznaće wjacorych dźesatkow hosći­, byrnjež bjez pomocy techniki spěwać dyrbjeli. Foto: Ramona Wowčerjowa

Přihotuja wulět

pjatk, 02. septembera 2016 spisane wot:

Budyšin (SN/mwe). 16. septembra chcedźa so Domowinjenjo Budyskeje župy „Jan Arnošt Smoler“ na kubłansku wuprawu do Pirny podać. Wo tym je wčera pjeć ze sydom čłonow župneho předsydstwa – dwaj běštaj zamołwjenaj – wuradźowało. Wšako maja so hišće někotre maličkosće nastupajo wopyt čěsko-němskeho gymnazija, wopomnišća „Sonnenstein“ a jězby z parnikom zrjadować. Hač do přichodneje srjedy smědźa so zajimcy hišće přizjewić.

Jako přichodne wusměrja Budyska župa swoju dźěławosć na přihot swójbneho popołdnja, kotrež ma so 12. nowembra na Rakečanskej Pawołskej šuli wotměć. W srjedźišću při tym jenož njesteji, zo župa­ dom za zarjadowanje wužiwa. „We wobłuku­ projektowych dnjow zaběraja so šulerjo we wšelakich předmjetach ze serbskimi stawiznami Rakec a su tuž wobsahowje do našeho swójbneho popołdnja integrowani“, wuzběhny regionalna rěčnica Sonja Hrjehorjowa.

Wu­čerjo móža so tohorunja na župu „Jan Arnošt Smoler“ wobroćić, trjebaja-li pomoc za stawiznisku wučbu a při zestajenju materiala za projekty.

István Kobjela zaso w funkciji předsydy ZSW

pjatk, 02. septembera 2016 spisane wot:

Budyšin (AW/SN). Wot 1. septembra wukonja István Kobjela zaso aktiwnje dźěło předsydy Zwjazka serbskich wuměłcow. Čłonojo předsydstwa su tomu na swojim wčerawšim wuradźowanju jednohłósnje přihłosowali. Priwatnych přičin dla bě wón 24. meje wo nachwilne wuswobodźenje ze zastojnstwa prosył.

Zdobom zaběraše so předsydstwo ZSW z tym, zawěsćić dalše krute přistajenje swojeje projektoweje managerki. Wone­ kónc lěta pobrachowacych srědkow dla wuběži. Tak staja nětko Załožbje za serbski lud pisomnu próstwu wo połne, stoprocentowske financne zaručenje tohole za dalše wobstaće ZSW wažneho koordinaciskeho dźěłoweho městna. Dotal­ měješe je zwjazk po 40 procentach sam financować a dyrbješe so stajnje z wulkim napinanjom wo sponsorow starać. Tući pak klětu wjace k dispoziciji njebudu. Wotpokaza-li załožba próstwu, chce so předsydstwo na wotpowědnych zapósłancow zwjazkoweho a krajneju sejmow Sakskeje a Braniborskeje wobroćić.

Šulski rap hordosć budźi

štwórtk, 01. septembera 2016 spisane wot:

Dźěći Handrija Zejlerjoweje šule hosći swójbneho popołdnja zawjeselili

Wojerecy. Wopytowarjo lětušeho swójbneho popołdnja župy „Handrij Zejler“ zańdźenu sobotu so njemało dźiwachu. Na ležownosći Domowinskeho domu na Drježdźanskej dróze zasłyšachu woni njewšědne zynki w serbskej rěči. „Sym Lilli. Sym Nieke. Mimi to sym ja“, rapowachu­ šulerjo 3. a 4. lětnika Wojerowskeje Handrija Zejlerjoweje zakładneje šule.

Serbšćinu chcetej dale wuknyć

štwórtk, 01. septembera 2016 spisane wot:

Jónu wob tydźeń, stajnje pjatk, trenujetej Katharina Steuer a Bonnie Niemz w rejwanskej skupinje Łužičanka Serbskeho ludoweho­ ansambla. Alexandra Wagner a Jan Kozelnický wuwučujetaj jej a dalše dźěći w rytmiskim pohibowanju na parkeće. „To namaj wulke wjeselo wobradźa. Smój hižo jako lutkaj na swjedźenju k při- wzaću šulskich nowačkow na našej šuli wustupiłoj a na wjesnym swjedźenju w Brětni“, powědatej Katharina (9) z Němcow a Bonnie (10) z Wojerec. Wobě stej šulerce rjadownje 4 A Wojerowskeje Handrija Zejlerjoweje zakładneje šule.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND