New York (SN). Berlinska hudźbnica Carolina Eyckec je nowu single „Northern lights“ wozjewiła, kotraž je na wšitkich streamowych platformach přistupna. K tomu słuša z polarneje swětliny inspirowane widejo.

Wosom mjeńšin trajacy kruch za teremin a elektroniske instrumenty je prěni oficialny z binauralnej technologiju, kotruž wuměłča hižo wot lěta 2019 na koncertach a we widejach wužiwa.

„Nadźijam so, zo tale hudźba tróšku barby a swětła do ćmowych zymskich dnjow přinjese, kotrež na nas čakaja“, ­Carolina ­Eyckec wuzběhny.

Sakske dźiwadła su so srjedu ze zjawnym listom na ministerskeho prezidenta Michaela Kretschmera (CDU) zawrjenja swojich domow wot 2. nowembra dla wobroćili. Wčera je Kretschmer ­kulturnikow na rozmołwu přeprosył.

Na samsnej runinje, kaž němske awtowe firmy abo Lufthansa z knježerstwom wo podpěrje w pandemiji jednaja, so rozmołwy ze swobodnje skutkowacymi wuměłcami dotal njewotměwaja. Woni słušeja do druheje klasy, wšako maja politikarjo „kulturu za ryzy zabawu we wólnym času“, kotruž móžeš „prosće bjez wurunanja wotšaltować“, kaž w lisće kulturnikow Sakskeje rěka. Při tym tež njepomha, zo je we wustawje swobodneho stata zapisane, zo ma so „wobdźělenje na kulturje w jeje wšelakorosći a na sporće wšemu ludej zmóžnić“. Kultura njepłaći jako systemrelewantna, dokelž ju k hospodarstwu njepřiličeja. To je ­hižo hladajo na ličbu na tym polu skutkowacych, kotřiž su potencielni bjezdźěłni přichoda, njezmysł. Rjenje, zo poda so sakski ministerski prezident skónčnje do dialoga z kulturnikami. Škoda je, zo dźiwadła z jednym hłosom njerěča. Tež tu knježi princip dweju klasow – ći jedni su priwilego­wani, tamni dyrbja wo swoju eksistencu wo­-jować. Cordula Ratajczakowa

Nowa kniha rysuje wobraz časa towaršnostneho přewróta w Serbach z wosobinskeho wida časowych swědkow

„Nowa swoboda – Dopomnjenki na přewrót 1989/90“ rěka nowa, w Lu­dowym nakładnistwje Domowina wušła kniha dr. Cordule Ratajczakoweje. ­Bosćan Nawka je so z awtorku wo přihotach, pozadkach a wo procesu na­staća publikacije rozmołwjał.

Knjeni Ratajczakowa – maće nowostku skónčnje w rukomaj. Kniha wšak njeje Waša prěnja, je to přiwšěm wosebite začuće?

C. Ratajczakowa: Nimam hišće dosć wulkeho wotstawka, zo móhła naležnosć prawje hódnoćić. Štož móžu rjec, je, zo tójšto dźěła za mnu leži. Na jednym boku je kniha wuslědk projekta, kotryž sym wotzamknyła, abo hinak prajene: kotryž je z blida. Na tamnym boku so wězo wjese­lu, zo je kniha nětko hotowa. Tajke „dźěćo“ potom woprawdźe w rukomaj dźeržeć móc je cyle wosebite začuće.

Dźens tydźenja planowana knižna premjera bu tuchwilu płaćiwych strowotniskich předpisow korony dla wotprajena. Pobrachuje Wam tajke něšto kaž „oficialne“ zakónčenje projekta?