„Prosće fyzikaa nic magija“
Serbska tereministka Carolina Eyckec je we wobłuku 7. sinfoniskeho koncerta Württembergskeje filharmonije twórbu „Wosom počasow“ předstajiła. Něhdźe 1 500 ludźi je koncert online sćěhowało.
Reutlingen (SN/bn). Württembergska filharmonija je ćěleso, kotrež bě na aktualne wuměnjenja dosć derje přihotowane. Format live w interneće wusyłaneho koncerta su hižo před třomi lětami zahajili, w prěnim rjedźe tohodla, zo bychu publikumej zwonka města hudźbu zbližili. Njezadźiwa tuž, zo bě kwalita wčerawšeho 7. sinfoniskeho koncerta institucije zwuk a wobraz nastupajo nadpřerězna. Tež wuměłski wukon móžeše so widźeć dać. Program wopřiješe sinfoniju čo. 3 A-dur Franza Schuberta, sinfonisku baseń „Tapiola op. 112“ Jeana Sibeliusa kaž tež koncert za teremin a orchester „Wosom počasow“ Kalevija Aha. Finski komponist bě twórbu w lěće 2012 za Carolinu Eyckec spisał. W Reutlingenje je jón serbska wirtuozka jako solistka zhromadnje z tamnišej filharmoniju předstajiła. Wosebitosć impresionistisce wobwliwowaneho krucha su pasaže, w kotrychž teremin ćičolenje ptačkow napodobnja.
Powědančka wo zwěrjatach
Budyšin (SN). Za młodych serbskich staršich a jich najmłódšich pjerachow je w LND nětko dalši nakład dawno wupředateje knižki z twjerdeho papjerca „Moje najlubše powědančka wo zwěrjatach“ wušoł. Dwanaće krótkich powědančkow, spisane wot Christy Kempter, je wjelelětna Witaj-pěstowarka Jadwiga Wejšina do hornjoserbšćiny přełožiła.
Što zwěrjata takle wšitko činja, to zhonja najmłódši w dwanaće krótkich powědančkach. W jich srjedźišću stejitej přećelstwo a mjezsobna pomoc. Knižka, přezcyłnje wot Antje Flad barbnje ilustrowana, je za dźěći wot dweju lět.
Za nastawacu interdisciplinarnu produkciju DOMIZNA je hudźbnik a ...
Z posměwkom do swětnišća
Před 60 lětami je Jurij Gagarin jako prěni čłowjek zemju z kosmosa wuhladał
„Поехали!“ Z tymle wosudnym słowom poda so dźensa před 60 lětami Jurij Aleksejewič Gagarin jako prěni čłowjek do swětnišća. Tehdy 27lětny major powětrowych wobrónjenych mocow Sowjetskeho zwjazka je z pioněrskim skutkom miliony wobydlerjow na cyłym swěće zahorił a w swojej generaciji přeće za do toho časa hišće njeznatym powołanjom kosmonawta zbudźił. Štož ludźom wothladajo wot fachowcow wědome njebě: Wuspěch misije bě wšo druhe hač wěsty. Nošna raketa Wostok, dale wuwita warianta prěnjotnje wojerskeho typa R-7, kotraž bě 1957 satelit Sputnik I jako prěni kumštny objekt do orbita donjesła a tak pozdźišo „napřemoběh do swětnišća“ mjenowanu konkurencu ZSSR a USA na polu slědźenja a technologiskeho postupa wuskutkowała, wopokaza su runja swětnišćowej łódźi samsneho mjena jako chětro njespušćomna; wědomostnicy w kosmodromje Bajkonur běchu wuličili, zo je prawdźepodobnosć zešlachćenja lěta niša hač 50 procentow.
Muzej w Ramnowje zaso přistupny
Swoju brodu sej chwalić
„Z rěčnikom so jenož stanješ z wutroby“
Interview z dr. Joannu Chojnickej z projekta wo rěčnej rewitalizaciji bretonšćiny a delnjoserbšćiny bjez maćernorěčnych
„Rěčna rewitalizacija bjez maćernorěčnych – padaj bretonšćiny w Hornjej Bretonskej a serbšćiny w Delnjej Łužicy“ rěka projekt Srjedźišća za keltiske studije na Adama Mickiewiczowej uniwersiće w Póznanju (hlej na internetnu stronu https://newspeakersinthecity.blogspot.com/). Čłonka wědomostneho teama dr. Joanna Chojnicka (nimo prof. dr. Michaela Hornsbyja, prof. dr. Nicole Dołowy-Rybińskeje a Jeanne Toutous) bě loni połdra měsaca w Choćebuzu, zo by na městnje slědźiła. Cordula Ratajczakowa je so z linguistku wo prěnich wuslědkach rozmołwjała.
Kajke metody nałožujeće we studiji?
Koncepty křižerjow dalšim pomoc
Hygienowe koncepty serbskich křižerskich procesionow su mjeztym tež dalšim křesćanskim a jěchanskim procesionam po wšej Němskej pomocne.
Budyšin/Bad Kötzting (SN/JaW). Hygienowe koncepty hornjołužiskich křižerskich procesionow maja jako zakład za kóždolětne swjatkowne jěchanje w bayerskim měće Bad Kötzting słužić. Kaž Serbske Nowiny zhonichu, je Budyska Serbska kulturna informacija (SKI) wčera popołdnju wotpowědne naprašowanje za konceptami dóstała. Badkötztingski kurowy direktor Sepp Barth bě próstwu z e-mailku pósłał. „Jako kurowy direktor a zamołwity organizator Badkötztingskeho swjatkowneho jěchanja so wón prašeše, hač njemóhł hygienowe koncepty našich křižerjow dóstać“, zdźěli sobudźěłaćer SKI Beno Šołta. Po krótkim dorěčenju z někotrymi křižerskimi zamołwitymi je Šołta trěbne podłožki do města w Bayerskim lěsu pósłał w nadźiji, zo tamnišim jěcharjam tež woprawdźe pomhaja.
Tradicije dale wuwiwać: „Wo tym smě a ma so rěčeć“
Drježdźany (SN/bn). „Jutrowne jěchanje a ptači kwas – serbska kultura mjez modusom pandemije a eksistencnymi starosćemi“ bě hesło wčerawšeho druheho zarjadowanja rjadu „Wysokoněmsce, saksce – serbsce? Rěč a identita we Łužicy“, wospjet digitalnje wuhotowane wot Politiskeho kubłanskeho foruma Sakskeje Konrada Adenaueroweje załožby. Hosćićelej a moderatoraj Johanna Hohaus a Benedikt Bierbaum witaštaj dohromady 75 zajimcow, něhdźe połojca z nich znowa Serbja. Wosebitaj, wobdźělnikam přednošowacej hosćej běštaj farar Chróšćanskeje wosady Měrćin Deleńk a jednaćel Ludoweho nakładnistwa Domowina Syman Pětr Cyž.
Wirtuelne koncerty ze wšěch kutow
Choćebuz (SN/bn). „Haj, we Łužicy so swěca hišće swěći, zmóžnjaca wid na festiwal wosebiteho razu: 360stopnjowy livestreaming jako wirtuelna jězba po hudźbje a wizuelne dožiwjenje, so wě w tučnym soundźe!“ Tak witaštej předewzaćelska towaršnosć Scandale a zjednoćenstwo Pisane dwórnišćo wopytowarjow ćichi pjatk a ćichu sobotu na stronje bunterbahnhof.de, hdźež so dohromady wosom hudźbnych cyłkow we wobłuku 360°-festiwala přerěznje 2 500 zajimcam prezentowaše. Mjez druhim předstaji Choćebuska skupina Svperfvtvre prěni raz docyła zjawnje swoje indierockowe a funkowe zynki. Wustup Randale Orchestra, po swójskim podaću „towaršnosće za wudobrjenje dawno zabytych a podhódnoćenych B-stronow“, wobrubi rejwarski porik w serbskej narodnej drasće. Berlinske duwo Hara Crash zahori fanow z wjacorymi serbskimi štučkami, kaž na přikład „Mak“ a „Tu a tam“. Spěwarka Uta Šwejdźic přizna, zo „je njezwučene, bjez bjezposrědnjeho publikuma hrać“ a namołwja na kóncu koncerta: „Dajće so šćěpić!“
