Drježdźany (SN/bn). Prof. dr. Nikolaus Joachim Lehmann, najpozdźišo wot lěta 2011 tež znaty pod serbskim mjenom Mikławš Joachim Wićaz, słuša k wusahowacym wizionaram informatiki. Wčera by rodźeny Kamjenjan stoćiny swjećił. Hižo minjenu njedźelu wuhotowaše Wojerowski Zusowy kompjuterowy muzej wirtuelne wodźenje „Anekdoty a wobrazy składnostnje 100. narodnin wuchodoněmskeho kompjuteroweho pioněra“. W Serbskim rozhłosu je Tomaš Faska Wićaza wopominał, skedźbnjejo mjez druhim na to, zo chowa archiw Němskeho muzeja w Mnichowje zawostajenstwo wědomostnika inkluziwnje kopicy dotal njewozjewjenych dokumentow. W samsnym wusyłanju dopominaše so Jurij Nuk na zhromadne dožiwjenja z Wićazom.

Münster (BD/SN). Ludowa uniwersita w Münsteru pokazuje wotsrjedź februara hač do kónca měrca filmy, z kotrymiž skedźbnjeja na wosud wohroženych ludow a jich rěčow w Europje a Aziskej. Pod hesłom „Mjeńšiny“ pokazachu w kooperaciji z Towaršnosću za wohrožene ludy a Münsterskim forumom „Jedyn swět“ mjez druhim hrajne filmy wo wosudźe Armenjanow, Samow kaž tež Sintow a Romow. Zajutřišim w 19.30 hodź. steja Serbja w srjedźišću małeho filmoweho swjatka. Wječork zahaja z reportažu telewizije RBB „Wjelike casowe drogowanje“, w kotrejž dźe wo stawizny a žiwjenje Serbow­ w Delnjej Łužicy. 30mjeńšinowej produkciji přizamknje so diskusija wo widźanym a wo połoženju najmjeńšeho słowjanskeho ludu w Němskej. Na njej chce so mjez druhim tež w filmje sobuskutkowaca Hanka Rjelcyna, zamołwita za serbske naležnosće we wokrjesu Hornje Błóta-Łužica, wobdźělić.

Knihowanje darmotneho poskitka je na www.stadt-muenster.de/vhs móžne. Zajimcy namakaja tam pod rajtarkom „program“ link za pytanje za kursami, hdźež měli čisło „105024“ zapodać.

Drježdźany/Žitawa (dpa/SN). Němski cen­trum za lětarstwo a astronawtiku (DLR) je w Žitawje dalšu wotnožku wotewrěł. Institut hłownje slědźi, kak hodźa so wjele­ energije přetrjebowace produkciske procesy tak wuhotować, zo wobswětej hižo tak jara nješkodźa. Wosebje dźe wo to, zo ­industrijne připrawy a mili­narnje při­chodnje mjenje wuhlikoweho dioksida wustorkuja. Wosebje płaći to za woclowu a aluminijowu industriju kaž tež za twornje, hdźež cement zhotowjeja. Dalša wotnožka ma w Choćebuzu nastać.

Žitawsku wotnožku DLR su hižo loni załožili. Dotal maja tam 20 sobudźěła­ćerjow, dołhodobnje ma jich 60 być. Tuchwilu je centrum na terenje Wysokeje šule Žitawa/Zhorjelc zaměstnjeny, w juniju přećehnje do Mandawskeho domu na Wonkownej Oybinskej. „Nowy institut ma k tomu přinošować, narodne zaměry klimoweho škita docpěć“, praji nawodnica předsydstwa DLR Anke Kaysser-Pyzalla.

Zwjazkowy sejm bě loni wobzamknył, přidatnje 57,4 miliony eurow za zaměstnjenje wjacorych wotnožkow Němskeho centruma za lětarstwo a astronawtiku we Łužicy nałožić.