Wulke mjelčenje njewšědneje namakanki dla zbudźa hněw Polakow

Waršawa. Spodźiwna namakanka w lěsu njedaloko Bydgoszcza na sewjeru Pólskeje a zasakłe mjelčenje zamołwitych pólsku zjawnosć a medije kraja chětro zaběratej. Wočiwidnje jedna so wo šěsć metrow dołhu raketu typa Ch-55 z ruskeje produkcije. Lětacy objekt je so štyri metry hłuboko do zemje zaštapił, jenož dwaj metraj dołhi zadni dźěl ze zemje saha. Jěchar na konju bě projektil připadnje namakał a policiju informował. Z tym pak zahaji so zdobom wulke hódanje wokoło njewšědneje namakanki, dokelž so spěšnje wukopa, zo „nichtó ničo njewě“, kaž medije pisaja. Pólske wójsko zdźěli, zo tajke rakety docyła nima. Ukrainska armeja tohorunja prěje, zo ma něšto ­z objektom w lěsu činić.

Brno (dpa/SN). Při zahubnym wohenju we wjacorych bydlenskich kontejnerach je w Čěskej wosom ludźi zahinyło. Woheń bě w nocy na štwórtk wudyrił a je so spěšnje rozpřestrěł, rěčnik wohnjoweje wobory w Brnje zdźěli. Nichtó w kontejnerach njeje přežiwił. „Njemóžachmy nikomu wjace pomhać“, wón rjekny. Policija z toho wuchadźe, zo jedna so pola mortwych wo bjezdomnych, kotřiž su we wopušćenych a rozpadanych kontejnerach žiworili. Po prěnich dopóznaćach jedna so wo dwě žonje a šěsć muži. Čěski ministerski prezident Petr Piala je přiwuznym woporow swoje sobužarowanje wuprajił. Wyša měšćanostka Brna Markéta Vaňková rěčeše wo „wulkej čłowjeskej tragediji“. Opozicija žada sej wjace pomocnych poskitkow za bjezdomnych. Wohnjowa wobora wojowaše cyłu nóc přećiwo płonjenjam. Konstrukciju dwanaće mjez sobu zwjazanych kontejnerow dyrbjachu najprjedy raz rozebrać. Na wobrazach běchu lěsycy před woknami widźeć, kotrež ćěkanje po tutym puću znjemóžnjachu. Policija je přepytowanja zahajiła. Při tym chcedźa tež wujasnić, hač njejedna so na kóncu wo zapalerstwo.

Praha (SN/MiR). Čěska republika ma noweho ministra za kubłanje. Čěski prezident Petr Pavel je wčera po rozmołwje z čěskim premierom Petrom Fialu (wobydlerscy demokraća) wozjewił, zo chce dźensa do zastojnstwa dotalneho ministra za naležnosće Europskeje unije Mikuláša Beka (Stan) powołać. Serbam je Mikuláš Bek znaty jako čłon Towarstwa přećelow Serbow (SPL) w Praze. Šefredaktor Česko-lužickeho věstnika Radek Čermák rjekny na naprašowanje SN: „Po dorěčenju z předsydu SPL Lukášom Novosadom chcemoj so z Mikulášom Bekom zetkać. Njewěmy hišće, hdy rozmołwa budźe.“ Novosad a Čermák staj sej toho wědomaj, zo njeje so designěrowany politikar dotal politisce za naležnosće Serbow angažował. „Na zetkanju chcemoj jemu rozjasnić hódnotu poćahow Čechow k Serbam. Chcemoj tež wo podpěru prosyć, myslo na to, hač a na kotre wašnje móhło so čěske ministerstwo za kubłanje přichodnje na polu serbskeho šulstwa angažować“, tak Radek Čermák.

Zastojnstwo Beka přewozmje dotalny statny sekretar čěskeho wonkowneho ministerstwa Martin Dvořák.

Marek Krawc rozprawja wo aktualnje rozjimanych temach w Čěskej

Praha. Tež w susodnym kraju wjeselachu so ludźo nad dlěšim kóncom tydźenja. Nic jenož symboliske chodojty, palace so we wulkich wohenjach, wabjachu Čechow won na wsy, tež muzej Vysočina w Havličkowym Brodźe witaše zajimowanych do swojeje noweje wustajeńcy. „Člověk míní, hospoda mění“ („Čłowjek mys­li, hospoda wodźi“) je moto zajimaweje přehladki, w kotrejž steji typiski čěski hosćenc w srjedźišću. Nastork za wustajeńcu dachu 140. narodniny spisowaćela Jaroslava Hašeka, awtora znateho romana „Dyrdomdeje dušneho wojaka Švejka“. Hašek bě wjele swojich woblubowanych powědančkow w korčmach napisał a tam runje tež swojeho Švejka stworił. Hašekowi potomnicy a „Swětowe towarstwo ­Jaroslava Hašeka“ wotměchu wot minjeneho pjatka hač do zašłeje njedźele w Lipnicach, hdźež awtor bydleše a tež zemrě, sympozij wo jeho žiwjenju a skutkowanju. Hašek, kiž narodźi so 30. jutrownika w Praze, je po měnjenju wjele wědomostnikow najznaćiši čěski humorista.