Dźěwin (AK/SN). Lětnu pawšalnu připokazanku Swobodneho stata Sakskeje we wobjimje 70 000 eurow chce Dźěwinska gmejna zmysłapołnje a zaměrnje zasadźić. Kaž gmejnscy radźićeljo na swojim zašłym posedźenju wobzamknychu, ma Dźěwin (Groß Düben) 38 000 eurow za nowowuhotowanje wjesneho srjedźišća dóstać. 32 000 eurow dóstanje Brězowka (Halbendorf) za wjesny towarstwowy dom. Kaž radźićel Oliver Peto rozprawješe, bě Brězowska wjesna rada cyłu lisćinu trěbnych naprawow zestajiła. Dźěl swojich pjenjez chcedźa tež za młodźinski klub wudać. „Jasne je, zo kóžda wjes samostatnje rozsudźi, za čo chce pjenjezy wudać. Tak su diskusije w gmejnskej radźe zbytne“, měnješe radźićelka Ires Ferscho, po tym zo bě mjez radźićelemi sčasami k njedorozumjenjam dóšło.
Hodźij. Na přednošk Georga princa zur Lippe přeproša Hodźijske domizniske towarstwo jutře, wutoru, we 18 hodź. do Hodźijskeho towarstwoweho domu. Referent porěči wo skutkowanju hrabjow zur Lippe. Z jich mjenom zwjazane su ryćerkubła w Barće, Ćichońcy, Debrikecach a druhdźe.
Na kolokwij wo njetopyrjach
Stróža. „Njetopyrje škitać“, rěka hesło 35. kolokwija biosferoweho rezerwata Hornjołužiska hola a haty, kotryž wotměje so zajutřišim, 10. apryla, wot 15.30 do 18.30 hodź. w Stróžanskim Domje tysac hatow. Předstajić chcedźa mjez druhim wuslědki aktualnych přepytowanjow wo njetopyrjach na wsach biosferoweho rezerwata a aktiwity k jich škitej w zwisku z wutwarom železniskeje čary Hórka– Hórnikecy. Na kolokwij su zajimcy wutrobnje přeprošeni, zastup je darmotny.
Póńdźe wo apoteki
Kamjenc. Kak je zastaranje z medikamentami z apotekow přichodnje zaručene, budźe tema přichodneho zjawneho zarjadowanja žónskeje unije Budyskeho wokrjesa srjedu w 19 hodź. w Kamjenskim hotelu „Złoty jeleń“. Jako hosća witaja tam předsydu sakskeho zwjazka apotekarjow Thomasa Dittricha.
Olympiada serbšćiny zahajena
Wodowe Hendrichecy. Třidnjowsku 53. centralnu olympiadu serbskeje rěče su dźensa we Wodowych Hendrichecach zahajili. Wo najlěpše wukony w serbšćinje wubědźuje so 38 šulerjow a šulerkow 6. lětnika z Delnjeje a 61 z Hornjeje Łužicy, kaž zarjadowar Serbske šulske towarstwo zdźěla. Po zazběhu z lěsnym dyrdomdejom maja serbšćinarjo jutře swoju wědu dopokazać.
Detlefa Kobjelu wopominali
Budyšin. Serbski komponist a hudźbny wědomostnik Detlef Kobjela by wčera 75. narodniny swjećił. Zastupjerjo Towaršnosće k spěchowanju Serbskeho ludoweho ansambla su na row loni zemrěteho na Budyskim Tuchorju kwěćel połožili a spominachu mjez druhim na jeho skutkowanje za SLA jako hudźbny šefdramaturg a prěni intendant po towaršnostnym přewróće.
Sćerpni a stražliwi być
Papjery falšowane byli
Běła Woda. Překwapjenku dožiwichu policisća zawčerawšim w Běłej Wodźe, jako wodźerja VWja kontrolowachu. Wón pokaza pólsku jězbnu dowolnosć. Zastojnicy pak zwěsćichu, zo muž poprawom žanu pólsku jězbnu dowolnosć njewobsedźi. Nimo toho bě wón hižo w februaru w zwisku z dźiwinowym njezbožom wopačne papjery předpołožił. Po wšěm zdaću běchu wone tak derje falšowane, zo to tehdy njenapadny.
Worklecy (JK/SN). Twarski zawod Stolle z Psowjow w Rakečanskej gmejnje ma hłubokotwarske dźěła za nowy Worklečanski hort wukonjeć, a Róžeńčanska firma Sorabija přewozmje hłowne twarske dźěła. Wobaj nadawkaj je Worklečanska gmejnska rada na swojim wčerawšim posedźenju přepodała. Runje wupisanja hłownych twarskich dźěłow dla je so wjesnjanosta Franc Brusk (CDU) chětro starosćił, kaž wčera rjekny. Wón bě z tym ličił, zo so mało abo scyła žana firma na wupisanju njewobdźěli, dokelž su nadawkowe knihi předewzaćow połne dosć. Ćim bóle so Brusk wjeseleše, zo so skónčnje tola sydom zawodow na wupisanju wobdźěli.
Budyšin. Štóž listowe znamki, pohladnicy a podobne zběra, njech dóńdźe sej zajutřišim wot 9 do 11.30 hodź. na měnjensku bursu w twarjenju pósta na Budyskim Póstowym naměsće. Dźěći a młodostni tam někotružkuli znamku darmotnje dóstanu.
Kołbaski woptać
Kamjenc. Cyle w znamjenju Kamjenskeje kołbaski steji zajutřišim nakupowanska njedźela w Kamjencu. Wot 12 do 18 hodź. změje tam wjace hač 60 wobchodow wočinjene, mjez druhim w nutřkownym měsće a na Wojerowskej dróze. K tomu wotměja na wjacorych městnach woptanje kołbaskow a kisałych běrnow, live-hudźba, dźiwadło za dźěći, modowe přehladki a wjele dalšeho, zdźěli měšćanske zarjadnistwo.
Při pomniku dźěłać
Pančicy-Kukow. Domowinska skupina Pančicy-Kukow přewjedźe přichodnu rjedźensku akciju při pomniku Jakuba Barta-Ćišinskeho w Lipju póndźelu, 8. apryla, w 17 hodź. Wobdźělnicy njech přinjesu sej trěbne graty sobu.
Zo budźe Miłoraz w Trjebinskej gmejnje wotbagrowany, je wobzamknjena wěc. Přiwšěm tam dawno hnydom wšitke swěcy hasnjene njejsu. W tamnišej zjawnej kupjeli budu so wopytowarjo lětsa samo hišće raz kupać móc.
Trjebin (AK/SN). W lětušej lětnjej sezonje móža wobydlerjo a hosćo Miłorasku kupjel hišće wužiwać. Trjebinscy gmejnscy radźićeljo su srjedu rozsudźili, 14 000 eurow z komunalneje pawšale za kupanskeju mištrow wužiwać. Tak wotpowědowachu na jednym boku poručenju Miłoraskeje wjesneje rady, na tamnym přeću wobydlerjow. „Cyłe wobydlerstwo Miłoraza je za to, kupjel zachować. Tu njeńdźe jenož wo dorosćenych, ale předewšěm wo dźěci. A zasadźene pjenjezy Miłorazej prosće přisteja“, wuzběhny wjesny radźićel Andreas Schneidewind.