Zhorjelc (AK/SN). Na intensiwnych stacijach chorownjow Zhorjelskeho wokrjesa je korony dla dale a mjenje personala. Wot srjedy nětko tuž Zwjazkowa wobora ze sto wojakami pomha. Zasadźeni su woni w Zhorjelskimaj klinikumje a Carolusowej chorowni kaž tež w chorownjach Žitawy, Habrachćic a Běłeje Wody. „To njejsu jenož hladarjo chorych a starych, ale su tež lěkarscy pomocnicy a wuchowanscy asistenća. Woni maja medicinske połoženje na intensiwnych stacijach stabilizować“, wuswětli generalny stabowy lěkar Zwjazkoweje wobory dr. Stephan Schmidt wčera na nowinskej konferency w Zhorjelcu. Mjenowane pjeć medicinskich zarjadnišćow dźěła na hranicy swojich móžnosćow.
Přičina nuzowych naprawow je přiběraca ličba koronainfekcijow w Zhorjelskim wokrjesu. Mjeztym maja tam 19 wosebje potrjechenych městnosćow. „Hižo tři tydźenje so połoženje přiwótřa. Ze swójskimi mocami to njezdokonjamy“, rjekny tamniši krajny rada Bernd Lange (CDU). „Prošachmy tuž Zwjazkowu woboru wo pomoc. Za podpěru smy jara dźakowni a smy wolóženi.“
Štyri nowe smjertne pady
Budyšin. Po pozitiwnych testach rozprawješe Budyski krajnoradny zarjad wčera wo 211 nowych koronainfekcijach we wokrjesu, dalši pacient je zemrěł. Aktualnje schorjena je 2 001 wosoba (+153), 45 ludźi je w chorowni. W Zhorjelskim wokrjesu zwěsćichu wčera 129 nowonatyknjenjow a dalše tři smjertne pady. 116 (+11) ludźi stacionarnje lěkuja, z nich 24 na intensiwnej staciji.
Špatniši posudk
Drježdźany. Sakscy dźěłopřijimarjo pohódnoćeja lońše powšitkowne wuměnjenja za swoje dźěło cyłkownje jako lěpše hač w lěće 2018. Jich posudki pak su dale bóle kritiske hač te woprašanych w Němskej w cyłku a we wuchodnej Němskej. Wjace hač štwórćina (26 procentow) sakskich dźěławych ma wuměnjenja za „špatne“ (Němska: 20 proc., wuchodna Němska: 19 proc.), kaž sakske ministerstwo za dźěło wčera zdźěli.
Prěni zaryw na nowu připrawu
Smjerdźaca (aha/SN). Štóž je w minjenych dnjach z Róžanta do Smjerdźaceje přijěł, je so snano trochu dźiwał, jako před wsu wóslika wosrjedź wjacorych wowcow wuhlada. Mjeztym je małe stadło přećahnyło a samsny zajimawy wobraz skići ći wone nětko za wsu do směra na Šunow. Wo skót stara so šuler 10. lětnika Marco Młodźink.
Spěšnosć měrili
Njebjelčicy. Na statnej dróze S 94 pola Njebjelčic su předwčerawšim připołdnju spěšnosć měrili. Na njezbožowym ćežišću kontrolowachu zastojnicy 1 700 jězdźidłow. 27 šoferow bě tam spěšnišich hač dowolenych 70 km/h. Wosomnaćo maja warnowanje płaćić, dźewjećo pokutu. Najspěšniši jědźeše ze 106 km/h nimo błyskača. Wón dóstanje nimo pjenježneho chłostanja tež hišće dypki w Flensburgu a dyrbi chwilu nóžkować.
Chrósćicy. Aktualneho połoženja w Chróšćanskim Domje swj. Ludmile dla tuchwilu wjele sobudźěłaćerjow wupadnje. Tohodla pytaja nuznje pomocnikow, kotřiž maja nazhonjenja při hladanju starych ludźi. Pomoc je hnydom trěbna. Tež fachowy personal na wuměnku je rady witany. Zajimcy njech přizjewja so pola nawodnicy domu Móniki Wencloweje pod telefonowym čisłom 035796/ 947 330 abo pola nawodnicy hladanskeje słužby Silvany Bjaršoweje pod telefonowym čisłom 035796/ 947 379.
SKC dale přistupny
Slepo. W Slepjanskim Serbskim kulturnym centrumje je předawanski wobłuk dale přistupny. „To smy z gmejnu wothłosowali“, zdźěli sobudźěłaćerka Stephanie Bierholdtec. Předawanišćo je wot póndźele do pjatka stajnje wot 10 do 16 hodź. wočinjene. Tam maja knihi, protyki, karty a wjele dalšeho w poskitku. Wustajenišćo je porno tomu zawrjene.
Drustwo „hłownu“ njewotměje
Łaz (AK/SN). Gmejna Łaz da koncept wo inwesticijach w swojich pěstowarnjach zdźěłać. To je wjetšina tamnišeje gmejnskeje rady předwčerawšim na swojim posedźenju wobzamknyła. „Zaměr ma dale być, zo ludźom bliske hladanje dźěći w cyłej gmejnje zaručimy“, podšmórny wjesnjanosta Thomas Leberecht (CDU). „Trjebamy derje wuhotowane a saněrowane žłobiki a pěstowarnje, kwalitatiwnje dobry hortowy poskitk, zwonkašulske hladanje a najlěpše wuknjenske móžnosće we Wulkoždźarowskej zakładnej šuli.“
Twarić swójski dom je priwatna naležnosć, kotrejž pak ma gmejna přihłosować. To je jenož jedyn z njeličomnych nadawkow parlamenta. W Chróšćanskim dyrbjachu so radźićeljo na zašłym posedźenju z wjacorymi naležnosćemi zaběrać.