Něšto noweho za kulturu a měšćansku towaršnosć
Budyšin (SN/bš). Na akciski dźeń F.E.S.T., kotryž su žony za žony organizowali, přeprosychu minjenu sobotu tři žony, kotrež su w Budyskej kulturnej scenje angažowane. Marie Melzer je hudźbnica, Franciska Herz sobuorganizatorka Budyskeho festiwala Miktival a Lisa Wendler dźěła w Budyskim Kamjentnym domje.
F.E.S.T. steješe pod hesłom: feministisce, sprawnje, samo zhotowjene a za rejowanje. Běše to prěni dźeń tajkeho razu, kotryž so na žony měrješe a so tež wot tutych wuhotowa. „Mamy zaćišć, kulturu w Budyskej kónčinje dominuja mužojo“, tak jedna z organizatorkow, Marie Melzer. „Tež žony zamóža na přikład wšelakore hudźbne stile posłužować“, zdźěli Melzer. Tohodla su sej na tutón dźeń tež jenož žónske wuměłče přeprosyli. Wužichu nimo toho móžnosć, so mjez sobu zeznać. Zaměr akciskeho dnja bě, něšto noweho za kulturu, ale tež za Budysku towaršnosć stworić.
Krótkopowěsće (14.03.23)
Stejnišćo wagonownje zachować
Niska. Mjeztym hižo 18. króć chcychu přistajeni wagonownje w Niskej dźensa popołdnju napominansku stražu wotměć, žadajo sej konkretne připrajenja za stejnišćo. Hižo před štyrjomi dnjemi su zastupjerjo zawoda list zwjazkowemu hospodarskemu a wobchadnemu ministerstwu pósłali. Po nim měłoj so ministerstwje za stejnišćo wagonownje zasadźić.
Do dźěłoweje skupiny powołani
Choćebuz. Choćebuski wyši měšćanosta Tobias Schick (SPD) je wčera wosom čłonow do dźěłoweje skupiny „Serbske pomniki města Choćebuz“ za dobu hač do lěta 2026 powołał. Mjez nimi su tež zastupjerjo Serbskeho muzeja, Serbskeho instituta a župy Delnja Łužica. Gremij nawjeduje Anna Kosacojc-Kozelowa, zamołwia za serbske naležnosće Choćebuza.
Krizowy stab so wobhonił
Wačkatosć w chlěwach a na pastwje
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. Tomu přinošować chce naša serija z pokiwami z weterinarneje mediciny. (2)
Před někotrymi lětdźesatkami bě hišće samozrozumliwe, zo měješe nimale kóždy druhi abo třeći susod we wsy skót w hródźi abo chlěwje stejo. Tež hač do dźensnišeho nochce něchtóžkuli wjeselo a wužitk plahowanja a dźerženja skotu parować. A dalši ma „biologiske wołmjane“ trawusyčawy za swój nowy hobby. Hdyž pak pytnješ, zo wowca, koza, kruwa abo swinjo wahu zhubja, so prawje njewuwiwa abo choruje, so wjeselo spěšnje zhubi.
Zhromadźizna „Domizny“
Chrósćicy. Hłowna zhromadźizna Chróšćan wjesneho towarstwa „Domizna“ je so sobotu w rumnosćach „Jednoty“ wotměła. Lětsa wopominaja 20lětny jubilej towarstwa, tohodla běchu tež mandźelscy čłonow k wječeri přeprošeni. Na zhromadźiznje su dźěłowy plan rozjimali, mjez nimi aktiwity za swójby a dźěći. Dale su so z podpěru mjezynarodneho folklorneho festiwala Łužica zaběrali.
Filmowy a diskusijny wječor
Budyšin. Budyski Kamjentny dom a Medijowa syć Łužica přeprošujetej jutře w 17 hodź. na filmowy a rozmołwny wječor w młodźinskim klubje „Kurti“ na Kurta Pchalekowej 20 w Budyšinje. Přednošuje Daniel Lehmann (CODE uniwersita Berlin) k temje „Socialne medije w konteksće protestnych hibanjow“. Naslědnu rozmołwu moderěruje Clemens Kiessling. W 19 hodź. so dokumentarny film „Rise Up“ režisera Marca Heiniga předstaji.
Policija (13.03.23)
Do hosćenca so załamali
Wojerecy. Njeznaći skućićeljo su so kónc tydźenja z namocu do hosćenca na Budyskej aleji we Wojerecach zadobyli. Nutřka rozbichu dwaj hrajnej awtomataj kaž tež dartowy awtomat, zo bychu pjenjezy wuwzać móhli. Po informacijach škodowaneho běchu to dohromady 2 000 do 3 000 eurow. Wěcnu škodu na awtomatach a na twarjenju trochuje wón na 21 520 eurow. Policija slědy na městnje njeskutka zawěsći.
Wužitne pokiwy kołowokoło koni
Kak prawje z konjom wobchadźam abo swoje křižerske graty hladam – to a wjace zhoni sobotu wječor wjace hač 40 zajimcow na přednošku w Róžeńčanskej towarstwowej rumnosći.
Róžant (RS/SN). Nimo Róžeńčankow a Róžeńčanow běchu tež mnozy z wokolnych wsow a dalšich serbskich wosadow přišli. Přeprosyli běchu kantor Róžeńčanskeho wjesneho křižerskeho procesiona Janek Wowčer a přećeljo.
Sedłarski mišter Marek Buk pokaza na gratach, kak je najlěpje hladaš, zo bychu prawje dołho dźerželi. Mnohe prašenja přitomnych wědźeše Róžeńčan wěcywustojnje wotmołwić. Mjez druhim wón radźi, graty „hnydom po jutrach z wodu a sedłowym mydłom wumyć“. Po tym zo je grat wuschnył, měli kožu prawje z tukom namazać a najlěpje do stareho poćehnjenja zawalić a w tyzy abo w kamorje składować. „Na žadyn pad njesměš grat wočinjeny wisajo wostajić abo w plastowej tiće składować.“
W stwičce jeja wóskowali
Krótkopowěsće (13.03.23)
Z elektroawtami po puću
Budyšin. W Budyskim krajnoradnym zarjedźe maja wot dźensnišeho prěnje elektroawta typa Volkswagen ID3. Wone narunaja pjeć wozydłow z dieselowym motorom, kotrychž doba leasinga bě wotběžała. Wozydłowy park krajnoradneho zarjada wopřija mjez cyłkownje 70 wozydłami wosom elektriskich. Klětu dalše na elektriske wuměnjeja.
Pisa filmowe stawizny
Los Angeles. Z dźewjeć nominowanjemi běše film po romanje Ericha Maria Remarqua „Na zapadźe ničo noweho“ wulki faworit na wčerawšim mytowanju Oscarow. Němski antiwójnski film režisera Edwarda Bergera je při 95. Academy Awards štyri myta dobył, tak Oscar za najlěpši mjezynarodny film, za kameru, scenowy wobraz a filmowu hudźbu. Tak je produkcija Netflix dotal najwuspěšniši němski film při mytowanju z Oscarami.
Łužiske „sydomstowki“ přewinyć
Zahaja literarny kofej
Budyšin. K zazběhej lětušeje literarneje kofejownje w Budyskim ekumeniskim wobchodźe čita dźensa wječor, 10. měrca we 18.30 hodź. Elke Lorencowa ze swojeho romana „Machtworte“.
Na 12. schadźowanku swójbow
Radwor. Rěčny centrum WITAJ a Budyska župa „Jan Arnošt Smoler“ přeprošujetej na schadźowanku za swójby njedźelu, 12. měrca, w 15 hodź. do Radworskeje „Slawije“. Pisany program zahaja mali rejwarjo „Łužičanki“ a hudźbnicy skupiny „RadworBrass“. Přizamknu so dźěłarnički a zaběry za najmłódšich, na přikład paslenje, sport a čitanski róžk. Za trochu staršich su eksperimenty, šach, nowe medije a prezentaciju policije přihotowali. Dale předstajitej so Serbski rozhłós a Ludowe nakładnistwo Domowina z najnowšimi poskitkami za dźěći. Starši maja składnosć, so z fachowcami wo rěčnych kursach a rěčnym kubłanju rozmołwjeć abo při kofeju a tykancu bjesadować.
Zběraja zaso wotpadki
Dobyćerki pola Kretschmera byli
Chrósćicy (miko/SN). Na Sakskej krajnej domchowance loni w Žitawje je serbske wjesne towarstwo „Domizna“ Chrósćicy znowa wubědźowanje wo najrjeńšu žnjensku krónu Sakskeje dobyło. W tym zwisku je ministerski prezident Michael Kretschmer dobyćerki do Sakskeje statneje kenclije do Drježdźan přeprosył.
Předwčerawšim, srjedu, bě tak daloko. Zhromadnje ze zastupjerkami Sakskeho zwjazka žonow we wjesnych kónčinach (Slfv) zetkachu so Chróšćanki z Michaelom Kretschmerom na kofej. W přijomnej wólnej rozmołwje rěčachu mjez druhim wo aktualnych temach a naležnosćach žiwjenja we wjesnych kónčinach. Přizamkny so zajimawe wjedźenje po rjanym historiskim domje.
