Po kermuši dźěła zahaja
Za dalši přetwar Chróšćanskeje cyrkwje spěchowanje přijimali
Chrósćicy (SN/MWj). Dypkownje k planowanemu nutřkownemu přetwarej Chróšćanskeje cyrkwje, kotrež ma so po tamnišej kermuši bórze započeć, je wosada wčera dóstała přizwolenje spěchowanskich srědkow we wobjimje 360 000 eurow. Přepodała je je statna sekretarka w sakskim ministerstwje za regionalne wuwiće Barbara Meyer wosadnemu fararjej Měrćinej Deleńkej. Jemu bě to rjany narodninski dar, wšako je runje wčera 60. narodniny swjećił. Symbolisce wón přizwolenje čłonam wosadneho předstejićerstwa dale da. Srědki pochadźeja ze zamóženstwa stronow a masowych organizacijow něhdyšeje NDR a zasadźeja so mjez druhim za zachowanje kulturnych pomnikow.
Čěski chór dwójce spěwał
Policija (18.10.22)
Dźěćo zawlec chcył
Huska. K pospytnemu zawlečenju dźěsća je minjenu sobotu popołdnju w Husce dóšło. Muž bližeše so ležownosći, na kotrejž dźěćacy wozyčk steješe. Wón storči staršeju doboka a hrabny sej wozyčk z ćěšenkom. Nan a wjacori swědkojo tomu zadźěwachu, zo móžeše skućićel wotjěć. Woni jeho přewinychu a policiju wołachu. Zastojnicy wzachu 29lětneho Egyptowčana sobu na rewěr a přećiwo njemu pospytne zawlečenje dźěsća přizjewichu. Samsny muž bě hižo dźeń do toho w Husce policajsce napadnył. Předwčerawšim dyrbjachu so zastojnicy z nim we Wallrodźe zaběrać.
Pytaja za přidatnymi dochodami
Njebjelčicy (JK/SN). Financne wuhotowanje mnohich gmejnow njeje w tutych časach runje tajke, zo bychu wulke projekty zwoprawdźeć abo wo inwesticijach rěčeć móhli. To potrjechi tež Njebjelčansku gmejnu, kotraž liči w přichodnych lětach po wuprajenju wjesnjanosty Andréja Bulanka (njestronjan) na minjenym posedźenju gmejnskeje rady z mjenje dochodami, ale ćim wyšimi wudawkami. Tak je gmejnska rada namołwjena, pytać za móžnosćemi lutowanja a rozmyslować wo přidatnych dochodach.
Krótkopowěsće (18.10.22)
Dalši blok znowa syći připinali
Janšojce. Brunicowa milinarnja w Janšojcach produkuje wotnětka tež zaso z blokom F. 500megawattowa připrawa bu w lěće 2018 we wobłuku „wěstotneje hotowosće“ zastaranskej rezerwy přidźělena a měješe so lětsa w oktobru wot syće wotpinać. Zhromadnje z tohorunja reaktiwizowanym blokom E zastara milinarnja wiki tak z přidatnej energiju we wobjimje 1 000 megawattow.
Wyši měšćanosta na demonstraciji
Budyšin. Na demonstraciji přećiwo stupacym kóštam za energiju wčera w Budyšinje – dohromady zličichu něhdźe 2 500 wobdźělnikow – je wyši měšćanosta sprjewineho města Karsten Vogt (CDU) swojemu připowědźenju wotpowědujo protestowacym rozłožił, zo je so „Budyšin na energijowu krizu přihotował“. Zwjazk łužiskich předewzaćelow bě Vogta na demonstraciju přeprosył.
Knižne myto spožčili
Dźěło přistajenych wolóža
Zbywace pjenjezy z komunalneje pawšale rozdźělili
Trjebin (CK/SN). Wosebity připowěšak, kiž hodźi so fleksibelnje zasadźeć a wužiwać, chce Trjebinska gmejna kupić, zo by přistajenym swojeho twarskeho zawoda dźěło wolóžiła. Nimale 21 500 eurow za to financuja ze srědkow komunalneje pawšale. „Mamy w gmejnje wjele zelenišćow, ale jenož dweju połnje přistajeneju w twarskim zawodźe. Tamni jenož něšto hodźin wob tydźeń dźěłaja“, wobkrući wjesnjanosta Waldemar Locke (CDU) trěbnosć inwesticije. Dokelž hodźi so płonina za nakładowanje připowěšaka wuměnić, móža po słowach wjesnjanosty dźěłowy čas lutować. Po wupisanju bě jenož jenička firma poskitk wotedała. Tuž je techniski wuběrk gmejnskeje rady rozsudźił, zo ma zawod z Baršća připowěšak dodawać.
Policija (17.10.22)
Moped manipulował
Němcy. Dobre wóčko mějachu policisća sobotu popołdnju w Němcach. Tam napadny jim moped typa S50 N, na kotrymž bu po wšěm zdaću technisce to a tamne změnjene. Jako chcychu wodźerja zadźeržeć, spyta so tutón policistam wuwinyć a jědźeše spěšnišo hač dowolene po Kulowskej dróze. Skónčnje pak jeho zastojnicy tola dosahnychu a zwěsćichu, zo bě 21lětny swój moped wjacore razy přetwarił. Nimo toho młody muž scyła žanu jězbnu dowolnosć njeměješe, dokelž běchu ju jemu hižo sćazali.
Kamjenje pokradnyć chcyli
Nowa Łuka. Z hałzami zawodźěte kamjentne platy w hódnoće 500 eurow je wobydler pjatk w Nowej Łuce namakał. Po wšěm zdaću běchu njeznaći w nocy do toho platy z bliskeho twaršćiznoweho składa wzali, zo bychu je pozdźišo wottransportowali.
Na slědach starych družin jabłukow
Nadróžne wobswětlenje njehasnu
Sulšecy (AK/SN). Swój lětuši hospodarski plan budźe město Kulow kaž planowane zwoprawdźić móc. Tole rjekny měšćanosta Markus Posch (CDU) na zašłym posedźenju měšćanskeje rady w Sulšecach. Jako běchu etat zdźěłali, ličichu za 2022 z deficitom 157 000 eurow. Mjeztym je wotwidźeć, zo změja pod smužku samo pozitiwny wuslědk.
„Najwjetša změna je, zo mamy 270 000 eurow wjace dochodow hač planowane“, rozłoži komornik Mathias Kockert. Wot Swobodneho stata Sakskeje dósta město koronowu přiražku 473 000 eurow. Wotličić pak dyrbja ju tak, jako bychu ju z přemysłoweho dawka dóstali. To woznamjenja mjenje klučowych připokazanjow. Přiwšěm bě přiražka jara pomocliwa, tak Kockert.
Kupjel steji zaso na hračkach
Plany za nowu kupjel w Kamjencu so po wšěm zdaću dale dlija. Nětko je so Kamjenska měšćanska rada na wurjadnym posedźenju znowa z tutej temu zaběrała.
Kamjenc (BG/SN). Wustróžane wobliča běchu tele dny na wurjadnym posedźenju Kamjenskeje měšćanskeje rady widźeć. Wutwar a rozšěrjenje Kamjenskeje haloweje kupjele stejitej zaso na hračkach. Dotalne planowanja móhli tuž bórze zaso makulatura być. Po posedźenju Budyskeho wokrjesneho sejmika 10. oktobra je so połoženje mjenujcy změniło. Kaž wyši měšćanosta Roland Dantz (njestronjan) rjekny, njewotpowěduje namjet krajneho rady Uda Wićaza (CDU) dojednanjam z městom Kamjencom. Tohodla je Dantz wurjadne posedźenje měšćanskeho parlamenta zwołał.
Zo ma so kupjel přetwarić, bě wokrjesej jako wobsedźerjej jasne. Tež město so k ponowjenju wuznawa, zo móhła so płuwanska wučba za šule wokrjesa zaručić. Tež spěchowanje zdaše so jasne być a město Kamjenc bě zwólniwe, swójski podźěl zaručić. Nětko pak so wokrjes we wobłuku zaměroweho zwjazka na inwesticiji njewobdźěli, ale přewostaji městu kóžde lěto přiražku.
