Situacija podobna
Přinošk za hladanje móhł wot julija stupać
Berlin (dpa/SN). Stupacych kóštow w hladanju dla maja přidatne wolóženja za hladanja potrěbnych, ale tež wyše přinoški přińć. Zo bychu financnu stabilitu hladanskeho zawěsćenja a předwidźanych přiměrjenjow wukonow zawěsćili, móhł přinošk k 1. julijej „moderatnje wo 0,35 procentowych dypkow“ stupać, kaž z naćiska zwjazkoweho ministerstwa za strowotnistwo wuchadźa. Tón powěsćerni dpa předleži. Do toho su redakciska syć Němska (RND) a dalše medije wo tym rozprawjeli. Zo bychu hladanja potrěbnych doma wolóžili, je po naćisku wotpohladane, hladanski pjenjez wot 1. januara 2024 wo pjeć procentow zwyšić. Tež wolóžace přiražki za hladanja potrěbnych w hladarnjach maja přiběrać.
Minister Karl Lauterbach (SPD) je hižo signalizował, zo su wyše hladanske přinoški trěbne, chcedźa-li polěpšenja financować. Tuchwilu přinošk za zakonske hladanske zawěsćenje 3,05 procentow bruttomzdy wučinja, za ludźi bjez dźěći 3,4 procentow. SPD, FDP a Zeleni běchu tež w koaliciskim zrěčenju připowědźili, zo chcedźa hladanski přinošk „moderatnje“ zwyšić.
Wěriwi spominachu minjeny pjatk we wosadnym domje cyrkwje swjateje ...
Krótkopowěsće (27.02.23)
Serbsce po hrodźe wodźił
Wojerecy. Prěnje serbskorěčne wodźenje po Wojerowskim hrodźe, dźensnišim měšćanskim muzeju, hdźež běštej hač do 1972 běrow a magacin serbskeho muzeja zaměstnjenej, je so njedźelu pod nawodom Wernera Sroki wotměło. Skupina dźewjeć ludźi, mjez nimi županka Gabriela Linakowa, sćěhowaše hodźinu dołho wuwjedźenja wo stawiznach domu a wustajeńcach muzeja.
Narodne krajiny přirody
Drježdźany. W nowej brošurje „Jónkrótne. Narodne krajiny přirody w Sakskej“ předstaji sakske wobswětowe ministerstwo narodny park Saksku Šwicu, biosferowy rezerwat Hornjołužisku holu a haty, kónčinu dźiwizny Kinsporsku holu kaž tež přirodowe parki Dübensku holu, Rudne horiny/Bohotsku a Žitawske horiny z jich biologiskej mnohotnosću.
Češa wobrónjuja Ukrainu
Policija (24.02.23)
Njeznaći w bydlenju pobyli
Łuh. Njeprošeny wopyt mějachu předwčerawšim w prěnjej połojcy dnja mějićeljo jednoswójbneho domu we Łuze w Njeswačanskej gmejnje. Skućićeljo přepytachu wšitke stwy, wočinjachu w nich kamory a je za hódnotnymi wěcami přepytachu. Hač su něšto pokradnyli, njeje dotal znate. Wěcnu škodu trochuje policija na něhdźe 50 eurow. Kriminalni technikarjo na městnje slědy zawěsćichu.
Powjedźe po wustajeńcy
Budyšin. Na wodźenje po archeologiskej wosebitej wustajeńcy „Smjerć a ritual“ přeprošuje Muzej Budyšin jutře, sobotu, w 11 hodź. Archeologowka Daniela Frehse posrědkuje wobdźělnikam zajimawosće wo najnowšich slědźerskich wuslědkach z předstawizniskeho pohrjebnišća pola Delnjeje Kiny. Dalšej wodźeni po wosebitej přehladce budźetej 18. měrca a 8. apryla stajnje w 11 hodź.
Serbsce po hrodźe a muzeju
Wojerecy. Składnostnje Swětoweho dnja přewodnikow hosći a Dnja maćeršćiny poskića Wojerowski hród hromadźe z tamnišim muzejom njedźelu, 26. februara w 14 hodź. wodźenje po hrodźe w serbskej rěči. Werner Sroka so wjeseli, zo smě Serbam a za serbšćinu so zajimowacym wopytowarjam serbske wodźenje po najstaršim twarjenju města poskićić. Wobdźělenje na wodźenju je darmotne. Zarjadowarjo proša wo pjenježny dar za Wojerowsku župu „Handrij Zejler“.
Na póstny seminar
Nowu pěstowarnju přihotuja
Na předwidźanym twarnišću w Ralbicach so pilnje dźěła
Róžant (JK/SN). W aprylu započnu nowu Ralbičansku pěstowarnju twarić. To wobkrući wčera na posedźenju gmejnskeje rady Ralbicy-Róžant wjesnjanosta Hubertus Ryćer (njestronjan). Zo bychu dźěła dypkownje a bjez problemow zahajić móhli, dyrbja twarnišćowu ležownosć zrumować a přihotować. Gmejnskaj dźěłaćerjej staj tuž tuchwilnje hłownje z tajkimi dźěłami zaběranaj a rumujetaj kontejnery a wšitko, štož by twar haćiło.
Ukrainjenjo w Serbach integrowani
Witalij je jedyn z 86 000 Ukrainjanow, kotřiž su po nadpadźe Ruskeje na Ukrainu jako ćěkancy w Němskej dźěłać započeli. Poł lěta je hižo muler pola Šěrakec twarskeje firmy w Konjecach.
Budyšin (SN/mb). „Smy spokojom z nim“, praji Rafael Šěrak dźensa Serbskim Nowinam a so wjeseli, zo je ukrainska swójba z pjeć dźěćimi w Serbach derje integrowana. Mandźelska mulerja dźěła w Chróšćan hladarni. So wě, zo je wšědna komunikacija na dźěle „serbsce, němsce, rusce, z wočimi, rukami, Google-translatorom atd.“, tak Šěrak, dale wulke wužadanje. Ale „wšo běži“, zawod liči tuchwilu dołhodobnje ze spušćomnym dobrym sobudźěłaćerjom. Herbert Brücker, eksperta za migraciju na Instituće za wuslědźenje dźěłowych wikow a powołanjow (IAB), wočakuje hladajo na ukrainskich ćěkancow na dźěłowych wikach hač do kónca lěta přirunujo ze stawom februara 2022 hač do 210 000 přidatnych dźěłowych mocow w Němskej. Tak praješe „medijowej skupinje Funke“.
Krótkopowěsće (24.02.23)
817 nowych wučerjow
Drježdźany. Z druhim šulskim połlětom započnje 817 nowych wučerkow a wučerjow w Sakskej wuwučować. Jich je mjenje hač bě planowane, prěnjotnje bě hač do 1 100 nowopřistajenjow předwidźanych. „Byrnjež něhdźe 100 wosobow wjace přistajeć móhli porno minjenemu połlětu, bych sej k wolóženju našich šulow wjace nowych pedagogow přał“, rjekny kultusowy minister Christian Piwarz (CDU) wčera w Drježdźanach.
Wokrjesnu dróhu wutwarja
Budyšin/Ptačecy. Budyski wokrjes wokrjesnu dróhu mjez Lejnjom a Ptačecami dospołnje wutwari. Zdobom připrawja dróhu přewodźacy kolesowarski puć, kaž krajnoradny zarjad dźensa informuje. Twarski čas ma wot 6. měrca hač do 15. decembra trać. Za tutu dobu přejězd přez Lejno a Ptačecy zawrjeny wostanje.
Přeprošenje na Dźeń Saksow
Policija (23.02.23)
Wjele pjenjez zhubiła
Mittelherwigsdorf. Njeznaći su wutoru popołdnju staršej žonje w Mittelherwigsdorfje pola Žitawy wšitke jeje nalutowane pjenjezy wulišćili. Při telefonje woni rentnarce napowědachu, zo bě jeje syn při wobchadnym njezbožu dźěćo ćežko zranił. Nětko sedźi wón w jastwje, z kawciju pak móhli jeho pušćić. Žona wza tuž dohromady 54 000 eurow a pjenjezy njeznatej wosobje přepoda. Wobšudnicy mějachu wšón čas ze žonu telefoniski zwisk. Hakle pozdźišo wona syna zazwoni, tak zo so wobšudnistwo wukopa.
