Policija (02.03.23)
Na třistronskim statoku so paliło
Kołwaz. K hašenju wołachu wohnjowych wobornikow předwčerawšim wječor do Kołwaza (Kohlwesa) pola Bukec. Woheń bě po wšěm zdaću w garaži třistronskeho statoka wudyrił. Płomjenja rozpřestrěchu so na prózdnu hródź a na prózdny dźěl bydlenskeho domu. Něhdźe 70 kameradow zadźěwaše, zo so woheń na dalši bydlenski dom rozpřestrěje. Zranił so nichtó njeje, w garaži pak so wjacore jězdźidła skóncowachu. Po prěnim trochowanju nasta něhdźe 150 000 eurow škody. Policija přepytuje pad podhlada zapalerstwa dla.
Sonja Krječmarjowa nawjeduje
Kozarcy. Po škotowym turněrje serbskich seniorow předwčerawšim w Kozarcach nětko Sonja Krječmarjowa cyłkowne hódnoćenje nawjeduje. To zdźěli hłowny organizatoriski nawoda Měrćin Nowak. Turněr w Kozarcach dobył je Herman Woko z 3 189 dypkami před Eberhardom Kroschkom (2 788) a Wolfgangom Kühnom (2 680). Sonja Krječmarjowa je štwórte městno wobsadźiła. Přichodny turněr wotměje so kónc měrca w Šunowje.
Wěnuja so Janej Haješej
Łaz. Na serbski wječor přeprošuje spěchowanske towarstwo Domu Zejlerja a Smolerja jutře, pjatk, we 18 hodź. do Łaza. Tam chcedźa so wěnować Łazowskemu Serbej a překupcej Janej Haješej (1873– 1960). Na jeho iniciatiwu nasta 1911 serbske towarstwo za Łaz a wokolinu. Dale je wón 1912 Domowinu sobu załožił. Wot 1921 do 1937 a wot 1945 do 1948 bě wón župan Wojerowskeje župy. Z přednoškom w němskej rěči, fotami a hudźbnym wobrubjenjom chcedźa na Haješa k jeho 150. narodninam spominać.
Sportownja ma wosebitosće
Šulerjo budu nowu halu hakle pozdźišo wužiwać móc
Bart (WL/SN). Posledni dźeń februara dóstachu wobydlerjo Barta swoju nowu sportowu halu z jednym hrajnišćom přepodatu. Mjeztym, zo Budyski krajny rada Udo Wićaz, Malešanski wjesnjanosta Matthias Seidel, (wobaj CDU) planowar Thomas Schmidt a sportowy wučer Dirk Beckert symboliski banćik přetřihachu, so zapósłanc Sakskeho krajneho sejma Marko Šiman (CDU) a předsyda Bartskeho sportoweho towarstwa Frank Nowak hižo raz w hali pospytaštaj a sej bul přihrawaštaj. Wšitcy měnjachu, zo je so 3,7 milionow eurow drohi twar derje poradźił.
Wot fundamenta hač pod třěchu wuznamjenja so nowa sportownja přez někotre wosebitosće, kotrež swojeho runjeća pytaja. Geologiskich wobstejnosćow dla steji twar na 41 stołpach. Wjerch z wocloweho betona je dalša wosebitosć. Zo móhli woclowe nošaki do hotoweho hrubeho twara zasadźić, běchu měrne ruce a milimeterska dokładnosć prašane. Kaž planowar rjekny, běštej to wužadani, z kotrymiž so twarscy dźěłaćerjo hewak wšědny dźeń zaběrać njetrjebaja.
Starosća so wulkeho projekta dla
Lětuša značka je čorna
Miłoraz: Hišće chcedźa tři swójby wostać
Do politiskeho kompromisa wo zakónčenju wudobywanja brunicy słuša poslednje wotbagrowanje łužiskeje wjeski, Miłoraza. Za potrjechenu gmejnu Trjebin je to wulke wužadanje.
Trjebin (SN/mb). Robert Sprejz, młody čestnohamtski komunalny politikar, je wot lońšeje nazymy zastupowacy wjesnjanosta. Nětk ma gmejnski radźićel „Wolerskeho zjednoćenstwa Trjebin“ ćežki nadawk, gmejnu nachwilnje nawjedować, po tym zo je woleny wjesnjanosta Waldemar Locke strowotneho stawa dla zastojnstwo złožił (Serbske Nowiny su rozprawjeli). Mała gmejna, kotraž do zarjadniskeho zwjazka Slepo słuša, je dawno wot pokročowaceje brunicoweje jamy sylnje potrjechena. W zwisku z planowanym kompletnym přesydlenjom Miłoraza přisadźi Trjebin někak 200 swojich 800 wobydlerjow. W rozmołwje z našim wječornikom je so Sprejz k najłoskoćiwišimaj prašenjomaj wuprajił.
Krótkopowěsće (02.03.23)
Mjeńšinowe dźiwadła w Irskej
Galway. We wobłuku mjezynarodneho projekta „Phōnē – mjeńšinowym rěčam hłós dać“ wotměwa so wot dźensnišeho do 6. měrca zetkanje cyłkownje wosom swobodnych dźiwadłowych skupin w Galwayju (Irska). Łužicu zastupuje nawoda Budyskeho socioteatralneho Thespis-centruma za transkulturne dźiwadłowe dźěło Georg Genoux.
Pytaja přichodneho „Krabata“
Čorny Chołmc/Pesterwitz. Lětuše „Krabatowe swjedźenske dny“ su dźeń po wčerawšim zahajenju předpředanje zastupnych lisćikow hižo wupředate. Kaž spektakl wuhotowaca agentura 0351 dale zdźěla, njeje titulna róla hišće wobsadźena. Tuž přijimaja hišće hač do 12. měrca „po móžnosći direktne požadanja“, pytany je „profesionelny muski hrajer w starobje něhdźe 30 lět“.
Wěstotu zastaranja njewohroža
Fotowoltaika budźe nowy susod parka błudźenkow
Njedaloko Hamorskeje milinarnje ma solarny park nastać. Za areal 33,7 hektarow bywšeje ratarskeje płoniny chce komuna twarske prawo za fotowoltaikowu připrawu docpěć. Hamorska gmejnska rada je so njedawno k tomu wuznawała. Nošer projekta je předewzaće Łužiske energije a milinarnje, wotpohladany cyłkowny wukon je dotal z 22,4 megawattami podaty.
Wobtwarjenski plan nastupajo, kotryž bě loni wot 7. nowembra hač do 9. decembra wupołoženy, su zarjady, nošerjo zjawnych zajimow a tež wobydlerjo swoje stejišća zapodali.
Muzikanća za měr hudźili
Radźićeljo wuradźuja
Njebjelčicy. Předstajenje studije wo energijowym koncepće za Njebjelčansku gmejnu budźe jedna z temow přichodneho posedźenja tamnišeje gmejnskeje rady. Wone wotměje so štwórtk, 2. měrca, w 19 hodź. w posedźenskej rumnosći gmejny. Dale wuradźuja mjez druhim wo wobswětlenskim koncepće za Njebjelčicy, Pěskecy, Serbske Pazlicy a Wěteńcu, kaž tež wo rumnosćach něhdyšeho Miłočanskeho předawanišća.
Yoga za kóždeho
Smjerdźaca. Wjacore kursy za yoga poskićuje Serbske šulske towarstwo w Smjerdźečanskim kubłanišću LIPA. Wone měrja so na wšitkich, kotřiž chcedźa swojemu ćěłu něšto dobreho činić, kotřiž trjebaja wjetšu koncentraciju a kotřiž pytaja za nutřkownym měrom. Kursy wotměja so stajnje pjatk dopołdnja a započnu so 17. měrca. Zajimcy njech přizjewja so hač do 8. měrca pod abo pod telefonowym čisłom 0172 7811959. Na to skupiny zestajeja a wobdźělnikam dokładny termin zdźěla.
