Wo žiwidłach w rowach
Budyšin. Pod hesłom „Nudle, chlěb a jahły“ zaběra so přichodna rozmołwa w Muzeju Budyšin njedźelu, 26. měrca, w 15 hodź. z jónkrótnymi předstawizniskimi namakankami žiwidłow w Delnjej Kinje. W 95 rowach běchu tam najwšelakoriše jědźe namakali. Archeologowka Jasmin Kaiser so při rozmołwje z tutymi namakankami zaběra a připosłucharjam jich wuznam rozłoži. Kaž muzej připowědźa, čaka na wopytowarjow mała překwapjenka. Zastup płaći 3,50 eurow.
Pčołarić nawuknyć
Wojerecy. Křesćansko-socialny kubłanski skutk přewjedźe na Wojerowskej dźěćacej a młodźinskej farmje sobotu, 1. apryla, wot 10 do 12 hodź., informaciske zarjadowanje za tych, kotřiž chcedźa so z pčołarjom stać. Wobdźělnicy dóstanu dohlad do zakładow dźěła pčołarja. Tohorunja rozłoža jim trěbne techniske wuměnjenja, wočakowane kóšty a wjele dalšeho. Wobdźělenje płaći dźesać eurow. Přizjewjenja přijimuja pod telefonowym čisłom 03571 979164.
Pytaja časowe dokumenty
Kupować a kołbaski jěsć
Kamjenc (Has/SN). Hdyž je nalěćo přišło, wonja w Lessingowym měsće zaso za słódnymi Kamjenskimi kołbaskami. Kaž kóžde lěto tydźenjej do jutrow wotewru Kamjenscy přemysłownicy njedźelu, 26. měrca, wot 12 do 18 hodź. swoje durje za přijomnu nakup a bjesadu při kołbaskach, rybje, mjedźe, poprjancach a wjele dalšich poskitkach z regiona. Koncept nakupowanskeje njedźele je měšeńca poskitkow Kamjenskich přemysłownikow a słódnych wudźěłkow z wokoliny.
Dokelž so Kamjenske stare město přichodnu njedźelu jara pisane prezentuje, so tón dźeń tež wjacore towarstwa a iniciatiwy ze swojimi poskitkami předstaja. Mjez druhim wobdźěla so iniciatiwa wotewrjenych zahrodowych durčkow w staroměšćanskim zetkanišću, Kamjenska klankowa stwička w bywšim Herrnsdorfec wobchodźe za hrajki, Brěznjanske domizniske towarstwo z kostimowej akciju a dalši kreatiwni sobuwojowarjo.
Chce centrum Budyšina wožiwić
Štóž bě zašły čas w nutřkownym Budyšinje po puću, tomu je zawěsće wulka ličba prózdnych wobchodow napadnyła. Tole změnić budźe jedyn z nadawkow noweje měšćanskeje managerki.
Budyšin (CS/SN). Z druhim pospytom je nětko jasne, zo přewozmje fotografka a rjemjeslniska mišterka Annet Scholz-Michalowski wot 1. apryla nadawki nutřkoměšćanskeje managerki Budyšina. Kaž z wupisanja wuchadźa, so městno hač do lěta 2027 z dohromady 400 000 eurami spěchuje, při čimž ma sprjewine město jeničce dźesać procentow cyłkownych kóštow same zapłaćić.
Krabat so do města nawróćił
Prěnju skulpturowu ławku blisko Wojerowskeje radnicy přepodali
Wojerecy (KD/SN). Chorwat Jan Šadowic (1624–1704), kotryž je we Łužicy swojich dobrych skutkow dla jako Krabat znaty, je so trajnje do Wojerowskeho stareho města nawróćił. Bywši obrist sakskeho kurwjercha sedźi nětko jako skulptura na torhošću před radnicu na prěnjej skulpturowej ławce. Ju su předwčerawšim w přitomnosći mnohich akterow zjawnosći přepodali.
Wobchadne znamjo přejěł a ćeknył
Na kreatiwne popołdnjo
Kulow. Dekoraciju z hliny zhotowić a připódla so w serbšćinje wukmanić móža zajimcy jutře, štwórtk, w Kulowskim Jakubecowym wustawje. Wot 15 do 16.30 hodź. su tam wopytowarjo na serbske kreatiwne popołdnjo z Mariju Šołćic přeprošeni. Je to zhromadne zarjadowanje Domowiny z towarstwom Zhromadnje za Kulow. Wobdźělenje na wosobu płaći štyri eurow.
Z wyšim měšćanostu rěčeć
Wojerecy. Slěd zarjadowanjow „Prašej so wyšeho měšćanostu“ město Wojerecy a tamniša měšćanska biblioteka Brigitty Reimann zajutřišim, pjatk, pokročujetej. Wot 18 do 19.30 hodź. móža wobydlerjo swoje naležnosće přednjesć a so z Torstenom Rubanom-Zehom (SPD) rozmołwjeć. Wobdźělenje je darmotne, přizjewjenje trěbne njeje. Zarjadowanje wotměje so w rumnosćach měšćanskeje biblioteki.
Policija (22.03.23)
Paduši so posłužowali
Wojerecy. W času wot soboty popołdnja hač do póndźelnišeho ranja su so njeznaći w pincy bydlenskeho domu na Wojerowskej Gagarinowej posłužowali. Tam so namócnje zadobychu a wzachu najwšelakoriši grat, elektriske nastroje, instalaciski material, črije, napoje a prózdne bleše sobu. Rubizna ma dohromady něhdźe 665 eurow hódnoty. Nimo toho načinichu skućićeljo 20 eurow wěcneje škody. Za paduchami policija nětko pyta.
Technika wuměnjenja za archiw w pincy polěpšiła
Pančicy-Kukow (SN/MWj). Problem włóžneje pincy w twarjenju zarjadniskeho zwjazka Při Klóšterskej wodźe w Pančicach-Kukowje drje so w přichodźe z blida njezhubi, mjeztym pak móža z nim poměrnje derje wobchadźeć. Wo tym móžachu so čłonojo zarjadniskeje zhromadźizny na swojim wčerawšim posedźenju přeswědčić. Poskitk, sej do posedźenja pincu wobhladać, drje je jenož mała horstka přiwzała. Woni pak zwěsćichu, zo spočatk lěta instalowana technika derje dźěła.
Stuchły smjerd wopytowarja tež wčera „witaše“. Ćim bliže pak sy k techniskim připrawam přišoł, ćim mjenje bě wón pytnyć. Kaž předsyda zarjadniskeho zwjazka Stefan Anders informowaše, je podźěl włóžnoty wot 60 procentow na 30 procentow woteběrał. Hač so tónle trend pokročuje, dyrbja wočakować. Při wšěm su někotre akty do hornjeju poschodow přerumowali.
Zelena swěca za solarny park
Gmejnska rada zrěčenju mjez komunu a inwestorom přihłosowała
Krynhelecy (AK/SN). Sewjernje Wochoz w Hamorskej gmejnje ma solarny park Hamorska milinarnja nastać. K tomu je so tamniša gmejnska rada na swojim zašłym posedźenju znowa wuznawa. W Krynhelečanskim kulturnym domje radźićeljo wustawkam wo twarskim planje a wotpowědnemu zrěčenju přihłosowachu.
Zrěčenje wotzamknjetej Hamorska gmejna a Łužiske předewzaće za wobnowjomne energije EPNE. „Jako wjesna rada předewzaće witamy. Naše najwjetše wobmyslenja su mjeztym z blida“, rjekny Wochožanski wjesny předstejićer Mario Weber. Dokelž pak je zarjadniske dźěło za tajki projekt jara wobšěrne, dyrbjał energijowy koncern LEAG gmejnu pjenježnje podpěrać, zo móhła wona wšitko zmištrować“, Weber měni.
