Poprjancowu chěžku napjec
Čorny Chołmc. Štóž chce sej rady poprjancowu chěžku natwarić, móže to jutře, 17. decembra w Čornochołmčanskim Krabatowym Młynom. Wot 10 do 12 hodź. a wot 13 do 15 hodź. tam z Połčničanskich poprjancow tajke chěžki twarja. Přizjewjenje je trěbne a móžne pod telefonowym čisłom 035722/951133.
Dźak pomocnikam
Budyšin. Minjenu sobotu je chór 1. serbskeje kulturneje brigady tradicionelny adwentny koncert w Budyskej Marje-Marćinej cyrkwi přewjedł. Předsydstwo towarstwa brigady wupraja staršim sobuskutkowacych dźak, zo zmóžnichu sobuskutkowanje swojich dźěći na probach a koncertach. Wšitkim, kotřiž natwarichu podesty abo so wo ćopłu cyrkej postarachu, kaž tež podpěraćelam a wopytowarjam wupraja towarstwo dźak. Wosebity dźak wuprajeja Załožbje za serbski lud a Domowinje za finančnu podpěru a runje tak Serbskemu ludowemu ansamblej za spušćomnu organizatorisku pomoc.
Płuwarnja zawrjena
Běła Woda. Płuwanska hala budźe chorosće dla sobotu a njedźelu zawrjena. Wot toho potrjechena je tež sawna.
Słužba hač do 67 lět móžna
Halštrowska Hola (AK/SN). Gmejna Halštrowska Hola wustawki wohnjoweje wobory znowa rjaduje. Jednohłósnje schwali gmejnska rada předźěłane wustawki. „Hižo dwě lěće nas tema zaběra. Je najwjetši čas za dalewjedźenje. Běše jara dołhi wothłosowanski proces“, wjesnjanosta Halštrowskeje Hole Dietmar Koark (CDU) na zašłym posedźenju rady zjima. Dotalne wustawki wohnjoweje wobory płaćachu wot lěta 2012. Zakład za nowu wersiju běchu sakske mustrowe wustawki“, rjekny Matthias Müller, sobudźěłaćer za twarski porjad, wohnjo- a katastrofowy škit kaž tež turizm w gmejnje Halštrowska Hola. Wobsteja tři hašenske wobwody sewjer (z Blunjom a Zabrodom), wuchod (ze Židźinom, Horami, Nowej Łuku a Narćom) a zapad (z Lejnom, Ptačecami a Bjezdowami). Mjeno cyłkowneje wobory je „Dobrowólna wohnjowa wobora Halštrowska Hola“. Wjesne wobory móža swoje mjeno na jězdźidłach stajnje wudospołnjeć. Zwyšena bu staroba wohnjowoborneho skutkowanja na 67 lět. Tak je přichodnje wuznamjenjenje „50 lět aktiwneje wohnjowoborneje dźěławosće“ móžne.
Štóž chce sej kusk tuńše horce wino, punš abo słódne plincy ...
Socialne wudawki jara rozrostli
Połoženje financow we wokrjesu Zhorjelc je dramatiske. Podpěra ze stron Swobodneho stata Sakskeje je nuznje trěbna, kaž bě předwčerawšim na posedźenju wokrjesneho sejmika słyšeć.
Zhorjelc (AK/SN). Wokrjes Zhorjelc ćerpi pod njesměrnje ćežkim połoženjom budgeta dla. „Zaměr ma być jednanjakmane wostać. Za to dyrbi so statne knježerstwo hibać. Ze swójskeje mocy naše budgety w přichodźe wjace wurunać njemóžemy“, podšmórnje komornik Thomas Gampe na decemberskim wuradźowanju wokrjesneho sejmika. Wot lěta 2011 je wokrjes njedostatk 54 milionow eurow nahromadźił.
Krótkopowěsće (16.12.22)
Kubłanska jězba do Berlina
Budyšin. Wjace hač 30 Serbow z Hornjeje a srjedźneje Łužicy přebywaše hač do wčerawšeho dwaj dnjej na kubłanskej jězbje w Berlinje, mjez nimi tež městopředsyda Domowiny, Marko Hančik. Přeprosyła běše zapósłanča zwjazkoweho sejma Kathrin Michel (SPD) z Kamjenca. Skupina sćěhowaše debatu w parlamenće, rozmołwješe so ze zapósłanču a wopytaše pomnik za w nacionalsocializmje zamordowanych Sintow a Romow.
Berlinski akwarij so puknył
Berlin. Znata Berlinska turistiska atrakcija, wulko-akwarij „Sealife“ w bliskosći Berlinskeje tachantskeje cyrkwje, je so dźensa rano puknył. Hoberska akwaristiska konstrukcija – 16 metrow wysoka a 1 000 kubiknych metrow wody z 1500 rybami wobjimaca – je nětko z wulkeho dźěla zničena. Tež wjacore sta hosći pódlanskeho hotela su potrjecheni.
LEAG podpěra Łužiske tafle
Wolfgang Kühn lětuši najlěpši škotowar
Budyšin (SN/MWj). Po wobmjezowanjach zašłeju lětow korony dla bě 2022 za serbskich seniorow-škotowarjow skónčnje zaso normalne lěto, w kotrymž móžachu so na zwučene wašnje swojemu hobbyjej wěnować. W rumnosćach Budyskeho zwjazka seniorow zetkachu so předwčerawšim na lětuši posledni turněr. Tam wojowaše škotowarka a 22 škotowarjow wo požadane dypki, wšako bě to poslednja składnosć, do cyłkowneho hódnoćenja hišće zasahnyć. Jako dobyćer dnja wuńdźe Gerat Šmelink z 2 816 dypkami před Wernerom Richterom (2 744) a Hermanom Woku (2 531), kaž hłowny nawoda škotowych turněrow serbskich seniorow Měrćin Nowak zdźěli.
Policija (15.12.22)
Wjele pjenjez zhubiła
Budyšin. Z tak mjenowanym wobšudniskim trikom „Love Scamming“ je žona z Budyšina wysoku pjeć cyfrowu sumu pjenjez zhubiła. Kaž policija zdźěli, skućićeljo wudawachu, zo trjebaja pjenjezy, zo móhli do Němskeje zapućować a so z Budyšanku skónčnje zetkać. Wjacore lěta žona wospjet pjenjezy přepokazowaše, prjedy hač nětko policiju informowaše.
Wabitej za wosebite prezenty
Za twarskich zajimcow
Njebjelčicy. Mału nowotwarsku štwórć ze sydom ležownosćemi chce Njebjelčanska gmejna w Serbskich Pazlicach přihotować. Prjedy hač móža dokładnišo planować, dyrbja dopokazać, zo je za wšitke ležownosće zajimcow. Jednotliwe parcele su mjez 1 000 a 1 700 kwadratnymi metrami wulke. Zajimcy njech so hač do kónca lěta w Njebjelčanskim gmejnskim zarjadnistwje pod adresu přizjewja.
Wiki na twjerdźiznje
Mortkow. Na adwentne wiki přeprošuja sobotu a njedźelu, 17. a 18. decembra, na Jakubecec twjerdźiznu do Mortkowa, a to wot 13 do 19 hodź. Na wopytowarjow čakatej wustajeńca Božich narodkow a přehladka hodownych štomow. Dźěći budu z wosebitej železnicu sobu jězdźić abo na konju jěchać móc. Dale změja adwentny hudźbny program a klankodźiwadło. Zastup płaći šěsć eurow. Fanojo kopańcy budu na woběmaj dnjomaj małe a wulke finale koparskich swětowych mišterstwow hladać móc.
Koncertuja w cyrkwi
Wažny zwisk zaso wotewrjeny
Třeći twarski wotrězk zwjazkoweje dróhi B 96 dotwarjeny
Wulke Ždźary (AK/SN). Měsacy dołho dyrbjachu šoferojo mjez Budyšinom a Wojerecami we Wulkich Ždźarach wokołopuć na so wzać. Přičina bě, zo je Łazowska gmejna podłu zwjazkoweje dróhi B 96 wopłóčkowu syć do zemje kłasć dała. Nětko je třeći twarski wotrězk tohole wobšěrneho projekta mjez Kulowskej a Rachlowskej dróhu dotwarjeny. Spočatk zašłeho tydźenja su Hłownu dróhu asfaltowali. Kaž nawoda twarskeho zarjada Łazowskeje gmejny Jens Kieschnick na zašłym posedźenju gmejnskeje rady zdźěli, wobchadoprawniski přikaz zawrjenja zběhnu. Mjeztym wobchad po nowym puću hižo běži.
Wjeselo šoferow pak budźe jenož nachwilne. Přetož w nalěću 2023 chcedźa štwórty twarski wotrězk zahajić. Tón ma wot Rachlowskeje dróhi hač na kromu wsy do směra na Stróžu sahać. Po słowach Jensa Kieschnicka potom tohorunja přijězdy k jednotliwym ležownosćam přiměrja. Za štwórty twarski wotrězk dyrbja B 96 znowa dospołnje zawrěć.
