Dožiwjensku wučbnu šćežku mjez Hućinu a Stróžu ponowjeja

Stróža (UM/SN). W biosferowym rezerwaće Hornjołužiska hola a haty je tuchwilu hara twarskich mašinow słyšeć. „W zwisku z ponowjenjom přirodoweje dožiwjenskeje šćežki Hućinjanske haty wutwarimy tam tuchwilu pućiki“, rozłoži Susanne Bärisch, kotraž je w zarjadni­stwje rezerwata za kubłanje a turizm zamołwita. Šćežka je před wjace hač 20 ­lětami nastała. Předewšěm drjewjane elementy su mjeztym dodźeržane a dyrbja so wuměnić. Ale tež didaktisce pućik dźensnišemu časej hižo cyle njewotpowěduje. Wón je jara na bywši rybarski muzej w Hućinje wusměrjeny. Dom ­tysac hatow w Stróži tehdy ani hišće njewobsteješe. Nětko chcedźa šćežku z nowymi elementami wuhotować, tak zo budźe wopytowar přirodu ze wšitkimi zmysłami dožiwić móc. Mjez druhim maja nastać městna ze stopami domjaceje zwěriny. Na bronzowych blidach ­budźe wopytowar z rukami začuć móc, kak woda z hrjebjow swój puć do hatow namaka.

„Posłuchaj lěkarja, prjed hač jeho trjebaš!“, serbske přisłowo namołwja.

Tuž wěnuje so student mediciny Pětr Dźisławk w nowej seriji znatym a mjenje znatym chorosćam, zo by je ­čitarjam trochu bliže rozłožował (7).

Wić njeje zhromadnje z diabetesom jenož jedna z najrozšěrjenišich chorosćow přeměny maćizny, ale tohorunja jedna z hłownych přičinow za bolosće w zhibadłach. W industrijnych krajach ćerpi něhdźe jedyn procent ludnosće pod wiću, w Němskej mamy samo přez milion schorjenych. Při tym su něhdźe dźewjećdźesat procentow potrjechenych mužojo. Estrogeny, hormony, kotrež so pola žony we wulkich a pola muža w mjeńšich mnóstwach produkuja, spěchuja wuměsowanje močoweje kisaliny. Tuta wić zawinuje.

Budyšin. Wosebita wustajeńca „Wuměłstwo za zběranje a darowanje“ w Galeriji Budissin je hišće hač do pjatka, 6. januara, přistupna. Přehladka Budyskeho wuměłstwoweho towarstwa prezentuje na přikład fotografije, skulptury, mólby ­a asemblaže mjez druhim Iris Bran­kačkoweje, Isy Bryccyneje, Andreasa Henniga, Eberharda Petersa a Ingi A. ­Seidel. Galerija je wot wutory do soboty wot 14 do 18 hodź. wotewrjena.

ZSW pokročuje z rjadom

Budyšin. We wobłuku swojeho literarneho rjadu „tracTare“ wěnuje so Zwjazk serbskich wuměłcow pjatk, 6. januara, we 18 hodź. tekstam młodych awtorow z najnowšeho zešiwka „Paternoster 9“. Zešiwk je loni w LND wušoł. Prof. ­Dietrich Šołta poda z recensiju zawod do bjesadneho koła wo twórbach w Bu­dyskej Röhrscheidtowej bašće. Wšitcy ­zajimcy kaž tež awtorki a awtorojo su wutrobnje přeprošeni.

Proša wo podpěru

Slepo (JoS/SN). Serbski kulturny centrum w Slepom (SKC) smědźeše so minjenej ­lěće nad skutkownej podpěru wjeselić, kotruž dóstachu z třoch spěchowanskich horncow. Kaž nawodnica Silwija Pano­šina zdźěli, jednaše so w jednym padźe wo spěchowanski projekt kulturneje załožby Swobodneho stata Sakskeje z programom „Kulturny kraj Sakska 2022“. Próstwu wo spěchowanske srědki zapodała je Slepjanska gmejna. Wužiwali su pjenjezy za najwšelakoriše zarjadowanja w běhu lěta.

Dźakowano załožbje „Doma w Slepom, Rownom a Mułkecach“ móžeše SKC klankodźiwadłowe jewišćo kupić, kotrež steji w dźěłarni. Tam móža dźěći same klankodźiwadło hrać, mjeztym zo sej jich starši woměrje wustajeńcu wobhladaja. Ručne klanki je Regina Herrmann z Wermsdorfa pola Drježdźan zhotowiła. Financowała je klanki Domowinska župa „Jakub Lorenc Zalěski“.