Njewěm, kelko mytow su Njebjelčicy za čas wjesnjanosty Tomaša Čornaka dóstali – mnohe delegacije zbliska a zdaloka su do wsy putnikowali, zo bychu sej něšto wobhladali, štož so zdaše hižo nimale raj na zemi być. Zo profet na čole Njebjelčic w susodstwje tajki image pola wšěch ­njeměješe, słušeše hižo tehdom do reality. A zo njeje jeho naslědnik tajki wizionar, ale bóle pragmatikar, móže gmejnje tyć. Za to pak stej minimalny konsens a normalna komunikacija mjez „starym“ a „nowym“ a jeju, prajmy tak, přiwisnikami trěbnej. Njebjelčicy njejsu raj na zemi byli, ale tež nic jenož potjomkinske wjeski z rjanej fasadu bjeze substancy. Doba wjesnjanosty Čornaka je zańdźenosć, nětko je André Bulank na čole gmejny, ze samsnej demokratiskej legitimitu kaž do toho Čornak. A nětk dźe wo přichod – wšěch wobydlerjow. Snadź móžetaj so „stary“ a „nowy“ tež bjez nowin w přichodźe wo tym při piwje wuměnjeć. A wšitcy druzy tohorunja. Marcel Brauman

Jasny wuraz za demokratiju

Lipsk. Wjacorych tysac Lipšćanow je so wčera wječor zešło, zo by so widźomnje a jasnje za demokratiju a čłowjeske prawa zwurazniło. Po demonstraciji tworjachu wobdźělnicy rjećaz podłu nutřkoměšćanskeje rynki z wobswětlenymi běłymi předešćnikami. K zarjadowanju namołwjał je mjez druhim tež Sebastian Krumbiegel – znaty spěwar Lipšćanskeje pop-skupiny „Die Prinzen“.

Zastarowanski system wolóžić

Drježdźany. Holcy a hólcy z psychiskimi chorosćemi dóstanu w Drježdźanach hižo bórze lěpšu podpěru. Jutře zahaji Drježdźanski młodźinski zarjad w kooperaciji z dźěćacej a młodźinskej psychiatriju (KJP) na tamnišim uniwersitnym klinikumje projekt, w kotrymž wukubłani pedagogojo młodych pacientow po swojim kliniskim přebytku pod lěkarskim dohladom dale wuwučuja. Projekt wolóžuje mediciniski zastarowanski system.

2023 z nowym – starym předsydu

Njewšědny projekt je so minjene dny pola Běłowodźanskeho Němskeho čerwjeneho křiža zahajił, mjenujcy zaběra z drjewjanymi konikami, kiž je w sporće pod jendźelskim wurazom „hobby horsing“ znaty, jěcha so na samotwarjenych konikach, husto přez parcours abo w dresurje. Za to pomolowachu holcy a hólcy drjewjane palety, z kotrychž nastanje najprjedy konjenc. Pozdźišo přidruža so drjewjane koniki, z kotrymiž móža so dźěći wucychnować. Zaměr je, dźěći k pohibowanju pohnuwać. ­Kreatiwita, hra a wjeselo steja tu na prěnim městnje. Trendowy sport financuje energijowy koncern LEAG. Foto: Joachim Rjela

Prózdny dom so palił

Bukecy. Wuchowanske mocy, wohnjowa wobora a policija chwatachu sobotu wječor do Kołwazy. Tu bě z njewujasnjeneje přičiny k wohenjej prózdneho bydlenskeho domu dóšło. Wohnjowe wobory wokolnych gmejnow běchu z něhdźe 70 kameradami zasadźene a wojowachu přećiwo płomjenjam. Pomocnicy běchu wjacore hodźiny na městnje a móžachu woheń hakle njedźelu rano hašeć. Wosoby so njezranichu. K wysokosći škody ­tuchwilu žane dopóznaća njepředleža. Kriminalna policija je přepytowanja podhlada zapalerstwa dla zahajiła. Statok bu 2021 z nuzowanjom zrumowany a bu we wo­krjesu jako „dwór messiejow“ znaty.

Moped namakał

Wojerecy. Kedźbliwy wobydler informowaše sobotu dopołdnja policiju, dokelž steješe za wjaceswójbnym domom we Wojerecach na Käthe-Niederkirchskej dróze moped bjez zawěsćenskich znamješkow. Patrulja Wojerowskeho policajskeho rewěra poda so na městno a přepruwowaše žołty moped typa S 50. ­Wukopa so, zo bu tutón spočatk oktobra loni w Grodku pokradnjeny. Wjeselo pola wobsedźerja směło wulke być, hdyž ­móže swój moped bórze zaso přewzać.