Měnjenja prašane
Budyšin (SN). Město Budyšin wuwiwa strategiju za wobchad pěšich, kotraž ma jako zakład za spěchowanje pěškoweho wobchada po cyłym měsće słužić. Měšćanske zarjadnistwo namołwi wobydlerjow, so k předležacemu naćiskej dokumenta hač do 19. februara wuprajić, pak přez e-mejlku na abo z póštu na Budyske měšćanske zarjadnistwo, wustaw twarskeho zarjadnistwa, Mjasowe wiki 1, 02625 Budyšin. Link k wobdźělenju namakaće pod .
Dar kameradam w Bukojnje
Bukojna (SN). Dobrowólna wohnjowa wobora w Bukojnje, gmejna Malešecy, wjeseli so nad pjenježnej podpěru Budyskeje wokrjesneje lutowarnje. Ta kóžde lěto swójsku protyku předawa. Wunošk powšitkownowužitnym organizacijam abo towarstwam přewostajeja. Dochody z předanje, kotrež je filiala při Marktkaufje docpěła, su tele dny kameradam w Bukojnje přepodali. Bě jich 565 eurow.
Móst dospołnje zawěrany
Tež w Rownom zymu wuhnali
Rowno (JoS/SN). 45 camprowarjow – wot dźěsća hač k dorosćenemu – běše sobotu w Rownom po puću, zo bychu zymu wuhnali. Dokelž je wjes po płoninje wulka, běchu tući do skupin rozdźěleni po puću, zo bychu wšitke statoki wopytać móhli. Dźěći mějachu priwileg, wosrjedź wjeski wostać, dokelž tu puće dom wot domu tajke dołhe njejsu. Rownjanski wjesny klub kóždolětne camprowanje zarjaduje. Hižo rano zahe so wšitcy na Njepilic statoku zetkachu. Při statnej dróze, na wjesnej hranicy k Mułkecam, běchu cłownu staciju natwarili. Šoferojo a sobujěducy běchu jara darniwi a dóstachu jako dźak žortnu dźaknu kartu z fotom camprowarjow kaž tež z hrónčkom: „Ze swojim darom sće hejsowanske móžnosće Rownjanow polěpšili a z tym zdobom spomóžny skutk na dobro zjawnosće činili. Z tutym wopismom dóstanjeće dowolnosć, našu wjes w kroku přejěć. Ze swojim obolusom sće so zawjazali, zetkaće-li lóštnje předrasćeneho noru, so přećelnje na njeho posměwknyć a jemu přikiwać.“
Cil: Koło za kolesowarjow
LMBV informowaše we Łazu wo stawje dźěłow při Hórnikečanskim jězorje
Łaz (AK/SN). „Łužiska a srjedźoněmska towaršnosć hórnistwoweho zarjadnistwa (LMBV) tuchwilu saněrowanje tak mjenowaneho suwanskeho kotoła w Hórnikečanskim jězoru zaměrnje přihotuje.“ Tole wuzběhny wotrjadnik projektoweho managementa wuchodna Sakska, Karsten Handro, wutoru w swojej rozprawje na posedźenju gmejnskeje rady we Łazu. „Tutu naprawu je Sakski wyši hórnistwowy zarjad tak postajił. Nětko wudźěłamy přizwolenske plany. Start saněrowanskich dźěłow budźe w lěće 2025“, wón dale wuwjedźe.
Waldemar Locke zastojnstwo złožił
Ze strowotnych přičin so Waldemar Locke funkcije Trjebinskeho wjesnjanosty dočasa wzda. Hač do awgusta maja naslědnicu resp. naslědnika wuzwolić.
Trjebin (CK/SN). Po tym zo je Trjebinski wjesnjanosta w januarje chorosće dla přestawku zapołožił, bě posedźenje gmejnskeje rady wčera lětsa prěnje, a zdobom tež jeho poslednje. Přetož Waldemar Locke (CDU) ze strowotnych přičin zastojnstwo k 28. februarej 2023 woteda. To su lěkarjo a terapeuća jemu radźili, wón rjekny. Próstwa wo dočasne pušćenje z poměra čestnohamtskeho zastojnika je wón pola Zhorjelskeho krajnoradneho zarjada jako přisłušneho prawniskeho dohlada zapodał. Tón je próstwje wotpowědował.
Policija (09.02.23)
Zražka z wysokej škodu
Kamjenc (SN). Njezbožo z wysokej škodu bě předwčerawšim na Dwórnišćowej, w kružnym wobchadźe Böhnischoweho naměsta w Kamjencu. 89lětny šofer Fiata je po wšěm zdaću w kružnym wobchadźe 64lětneho za wodźidłom Toyoty přewidźał. Zražka zawini škodu 12 000 eurow.
Blisko Lišeje Hory je naš fotograf wčera lišku wobkedźbował, ...
Razna debata w měšćanskej radźe
Raznu debatu su na wčerawšim posedźenju Budyskeje měšćanskeje rady naprašowanja radźićelow wubudźili. Předewšěm je šło wo wječork kiž je za 9. februar w tudyšej „Krónje“ planowany. Krótkodobnje dyrbješe zarjadowanje do baloweje žurle „K němskemu dubej“ we Wjazońcy přeńć.
Budyšin (CS/SN). Předmjet debaty bě zarjadowanje na temu „Krizy a jich šansy“ z Ernstom Wolffom, dr. Hansom Joachimom Maazom a moderatorom Alexom Quintom. Měšćanski radźićel Sieghard Albert (AfD) so za přičinu přepołoženja wobhoni. Wyši měšćanosta Karsten Vogt (CDU) jemu wotmołwi, zo běchu drje jednanja z Budyskej bydlenjotwarskej towaršnosću (BWG), mějićelku „Króny“, zrěčenje z přizjewjenjom pak njebu docpěte. Mějachu chutne pokiwy, zo móhło k mylenjam dóńć. Nimo toho hrozy městu strata imaga. Vogt skedźbni na jednanski porjad „Króny“. Tam rěka, zo měšćanska hala za politiske zarjadowanja njewobmjezowana k dispoziciji njeje. Jednaćelka BWG Kirsten Schönherr je w naležnosći pisomne kontrowersy dóstała. Su zwěsćili, zo njeby móžno było, za planowane zarjadowanje wěstotu zaručić.
Krótkopowěsće (09.02.23)
Zwada wo domčki na štomach
Budyšin/Ottendorf-Okrilla. Krajnoradny zarjad Budyšin chce „bórze“ we Łužničanskej holi „kontrolu za přepruwowanje přewjesć“, hač su wobsadźerjo lěsa z protestnym campom přećiwo wudobywanju šćerka „jim nadate zawjazki spjelnili“. Po informacijach prawiznika aktiwistow wočakuja hamtski wopyt 15. februara. Woni so zawjazkej spjećuja, domčki na štomach wottwarić.
Druha uniwersita w Choćebuzu
Choćebuz. Město Choćebuz dóstanje po rešeršach „Lausitzer Rundschau“ druhu uniwersitu – wysoku šulu za wukubłanje medicinarjow. 2026/27 ma prěnje studijne lěto być. Dotalna komunalna Carla Thiemowa chorownja budźe z uniwersitnej kliniku. Wo naćisku wědomostneho ministerstwa za prěnje statne kubłanišćo za lěkarjow w Braniborskej chce knježerstwo w měrcu rozsudźić.
Češa pomhaja w Turkowskej
Załožba w zajimje wnučkow
Z nazhonjenjow z „naslědnosću“ w Njebjelčicach konkluzije ćahnyć
Njebjelčicy (SN/mb). „Wnučkokmanosć“ je mjeztym tajke modowe słowo, kotrež jednych fascinuje a druhich wotstorkuje. Štož za tym tči, je prastara wěrnosć domoródneho ratarstwa: Dyrbiš swoju pódu tak wobhospodarjeć, zo změja hišće dźěći a wnučki na našej zemi swój wužitk. Hladajo na lěs je wyši hórniski stotnik Hans Carl von Carlowitz hižo w 18. lětstotku princip naslědnosće sformulował. W najnowšich regionalnych stawiznach je gmejna Njebjelčicy při tutej tematice „pioněrsku rólu“ zabrała, měni dr. Theresa Jacobsowa, ko-předsydka załožby w fazy załoženja z mjenom „wnučkokmanosć“. Tohodla chcedźa na wotpowědne lokalne nazhonjenja z třoch lětdźesatkow doby něhdyšeho wjesnjanosty Tomaša Čornaka nawjazać. Čornak je dalši předsyda, třeći na čole je Tomaš Nowak, kiž so hižo dołho za zachowanje mnohotnosće wužitnych rostlin angažuje.
„Wutrobička směj so“
Minjenu njedźelu popołdnju zetkachu so na sto ludźi na Krawčikec žurli w Chrósćicach, zo bychu sej komediju lajskeje dźiwadłoweje skupiny Konjecy-Šunow wobhladali. „Mužojo nimaja so lochko“ rěkaše lóštna inscenacija, kotruž je dźesać lajskich hrajerjow z telko lóštom a temperamentom přihladowarjam zahrało. Hižo tema „Bur pyta žonu“ a telko rjanych a sprawnych žorćikow wuwabichu wulke wjeselo, a tak knježeštej na žurli jara dobra nalada a stajne smjeće.
W tutym kołwrótnym času, hdźež najlěpje medije nječitaš abo njehladaš, bě to rjana a tež wažna wotměna, so jónu zaso tak prawje smjeć. Za to wupraju w mjenje zawěsće wšěch w publikumje zapłać Bóh za poradźene předstajenje. Sće wulkotnje hrali!
A za tych, kotřiž dyrbjachu přepjelnjeneje žurle dla bohužel domoj hić: Maće hišće móžnosć, sej wjesołu komediju dwójce wobhladać, a to 26. februara w Haslowje abo njedźelu, 5. měrca, w Kubicec hosćencu w Lejnje – stajnje w 16 hodź.
Hrajerjam přeju dale tajki elan a dobry publikum. Weronika Bulankowa
