Město Běła Woda smě runja zašłym lětam tež lětsa nahladnu sumu 60 000 eurow rozdźělić. To pak njeje žadyn lochki ­nadawk, přetož přeća towarstwow wotpowěduja nimale trójce tak wulkej sumje.

Běła Woda (CK/SN). Za spěchowanje ­dźěła towarstwow w Běłej Wodźe přewostaji hórnistwowy a energijowy koncern LEAG tež lětsa zaso 60 000 eurow. Wo tym informowaše wyši měšćanosta Torsten Pötzsch (Klartext) měšćanskich radźićelow na jich zašłym posedźenju. Štó smě so na pjenježnu podpěru wjeselić, wo tym rozsudźa měšćanscy radźićeljo. To pak budźe wšo druhe hač jednore. Přetož towarstwa zapodachu dohromady 48 próstwow z cyłkownym wobjimom 160 000 eurow. Hłowny a socialny wuběrk ma nětko lisćinu z namjetami zdźěłać a ju měšćanskej radźe kónc junija k wothłosowanju předpołožić.

Prioritna lisćina za wobydlerski etat 2023 města Wojerec zestajena

Wojerecy (SN/MWj). 923 wosobow je so wotsrjedź apryla hač dosrjedź meje we Wojerecach na wothłosowanju wo wobydlerskim etaće lěta 2023 wobdźěliło. Tole je měšćanske zarjadnistwo tele dny zdźěliło, po tym zo bě dźěłowa skupina wšitke dochadźane hłosy zličiła a wuhódnoćiła. Tak nasta prioritna lisćina za město same kaž tež za wjesne dźěle Brětnja/Michałki, Němcy, Hórnikecy, Čorny Chołmc a Ćisk. Wobydlerjo móžachu z cyłkownje 37 namjetow wuběrać, 19 z toho za město same.

Najwjace hłosow, mjenujcy 278 dósta namjet „Ławki za gmejnu Němcy“. Najwjace hłosow za město dósta namjet „DVD k projektej ‚Dźěćatstwo w měsće z najwjace dźěćimi NDR‘“, za kotryž so 267 ludźi wupraji.

Žarki (UM/SN). Klukšanski Aeroteam chce bywše sportnišćo w Žarkach we Wulkodubrawskej gmejnje wužiwać jako stanowanišćo za wopytowarjow zarjadowanjow, kotrež towarstwo wuhotuje. Kaž čłon předsydstwa towarstwa Holger Wießner rozłoži, słužeše za to dotal łuka na terenje towarstwa. Tam pak su kapacity wobmjezowane. Dotal wšak njejsu płujadłowi sportowcy hišće jako wobsedźer sportnišća w ležownostnej knize zapisani.