Wjeselu so, zo je strowotniske srjedźišćo w Rakecach derje wućežene. Tuchwilu přihotuja tam wotewrjenje dalšeje praksy, lěkarki-urologowki. Kaž z gmejny rěka pak bychu tam radšo dźěćacu lěkarku abo lěkarja měli. To pak jim zamołwići po zakonskich rjadowanjach lěkarskich městnow njepřizwola. A to mam za wulki zmylk. Mnozy starši, tež ze serbskich wsow, bjeru daloke puće hač za Budyšin a hišće dale na so, zo bychu k dźěćacemu lěkarjej přišli. A tež z Budyšina dyrbja starši dru­hdźe jězdźić, dokelž w měsće městnow njeje. Njeje tole křiwy swět? Tam, hdźež bychu wosebje dźěćacych lěkarjow nuznje trjebali – mjez druhim na serbskich wsach wokoło Worklec abo Chrósćic – žanych njedóstanu, dokelž jich próstwy wotpokazuja. Přičina: po statistikach zamołwitych maja tam dosć lěkarjow. Prošu lubi zamołwići rozsudźerjo, přepruwujće tónle předpis hišće raz dokładnje. Wšako je w Serbach dźeń a wjac dźěći, ale žanych dźěćacych lěkarjow. Janek Wowčer

Staršiske přinoški za cyłodnjowske dohladowanje wuknjacych ze šulow ze spěchowanskimaj ćežišćomaj wuknjenje a emocionalne a socialne wuwiće su wot 1. septembra w Budyskim wo­krjesu jednotnje rjadowane. W diskusiji wo naćisku k wobzamknjenju we wo­krjesnym sejmiku su mysle wo socialnej zamołwitosći wulki rum zabrali.

Budyšin (SN/at). Wulke šulske prózdniny su so zahajili a Budyski wokrjesy sejmik schwali minjenu póndźelu po žiwej diskusiji po cyłym wokrjesu płaćiwe wustawki wo staršiskich přinoškach za cyłodnjowske dohladowanje wuknjacych ze šulow ze spěchowanskimaj ćežišćomaj wuknjenje a emocionalne a socialne wuwiće. Dotal złožowachu so w teritorijomaj bywšeju wokrjesow Kamjenc a Budyšin hišće na rjadowani, wobzamknjenej do wokrjesneje reformy 2008.

Lěsne wonjenje horcoty a suchoty dla přiběraja. Tak je mjez druhim za wo­krjesaj Zhorjelc a Budyšin najwyši schodźenk wohroženja před lěsnym wohenjom płaćiwy. Zarjady nětko warnuja.

Zhorjelc (SN/JBo). Tučasne klimatiske wobstejnosće ćopłeho a sucheho wjedra dla, wjedu k přiwótřenju situacije nastupajo lěsne wohenje – mjez druhim tež we wokrjesu Zhorjelc. Po zdźělence krajnoradneho zarjada płaći tam tučasnje za region pjaty, a zdobom najwyši schodźenk stracha před lěsnymi wohenjemi.

Za běžne lěto zregistrowachu dotal 18 lěsnych wohenjow, kotrež zničichu dohromady 8,45 hektarow lěsa. Tři najwjetše wohenje mějachu w Schlegelu w měrcu ze třomi hektarami, w Trjebinje w juniju z 2,6 hektarami kaž tež we Wald­hufenje w juniju, zawinowane přez žnjenske dźěła, z 1,6 hektarami.

Jenny Erpenbeck wuznamjenili

Neubrandenburg/Berlin. Za roman „Kairos“ su spisowaćelce Jenny Erpenbeck Literarne myto Uwe Johnsona při­znali. Z 20 000 eurami dotěrowane myto chcedźa 55lětnej 23. septembra w Ber­linje přepodać, zdźěli Mecklenburgska ­literarna towaršnosć. Roman „Kairos“ wobjednawa na zakładźe lubosćinskeje stawizny towaršnostnu změnu wot poslednjeje fazy NDR 1986.

Nowela zakonja

Drježdźany. Sakska přihotuje tuchwilu nowy wysokošulski zakoń. Po prěnim čitanju je jón sakske knježerstwo do zjawneje diskusije dało. Z nowym zakonjom chcedźa prawo wysokich šulow centralnje wuwiwać. Prěni króć jewi so w nim prawo wutworić zastupnistwo zajimow za doktorandki a doktorandow. Hač do nazymy móža zastupjerjo zajimcow swoje stejišća k noweli wotedać. Na jich zakładźe kabinet dalše słyšenje přihotuje.

Dźělne wolóženje za Čěsku