Wottorhać njeje rozrisanje
Hrajkanišćo při Slěbornym jězoru wěstoty dla zawrjene
Bjedrichecy (AK/SN). Falk Nowotnick so mjerza. „Wosrjedź sezony mi gmejna hrajkanišćo zawrěje“, měni Mužakowčan, kiž wot 2011 stanowanišćo při Slěbornym jězoru we Łazowskej gmejnje wotnaja. „Pjatk do prózdnin bě tu nadobo banćik přičinjeny. Gmejnscy dźěłaćerjo chcychu hrajkanišćo hižo wotbagrować. Tomu móžachmy runje hišće zadźěwać. Što je to do znamjenja dowolnikam, hdyž wosrjedź sezony hrajkanišćo wotstronimy? Je to spěchowanje turizma?“
Srědki za sportowy centrum dóstali
Krótkopowěsće (28.07.22)
Dalši serbski digitalny poskitk
Budyšin. Software za widejowe konferency Jitsi Meet předleži nětko tež w hornjoserbšćinje. Wo to je so społnomócnjeny za digitalizaciju Załožby za serbski lud Daniel Zoba postarał, informuje załožba. Swobodny program Jitsi Meet dóstanjeće pod . Na delnjoserbskej warianće załožba dźěła.
Wustajeńca dale pućuje
Leer. Zhromadna wustajeńca wo štyrjoch mjeńšinach Němskeje – Danach, Frizach, Serbach a němskich Sintach a Romach – kaž tež wo delnjoněmčinu rěčacych „Was heißt hier Minderheit?“ je we wuchodofriziskim Leer hač do kónca awgusta přistupna. Přehladku je serbski wědomostnik Robert Lorenc kuratěrował. Dalše informacije dóstanu zajimcy pod .
Nowy slědźerski zwjazk
Policija (27.07.22)
Diesel pokradnyli
Kulowc. Z woporom paduchow diesela je so minjeny kónc tydźenja firma w Kulowcu stała. Tam dyrbjachu předwčerawšim rano zwěsćić, zo běchu skućićeljo z wjacorych firmowych jězdźidłow dohromady něhdźe 1 000 litrow ćěriwa pokradnyli. Při aktualnych płaćiznach je rubizna něhdźe 1 900 eurow hódna. Nimo toho načinichu paduši něhdźe 280 eurow wěcneje škody.
Křižowanišćo zdźěla zawrjene
Wobswětlenje w měsće přetwarja
Kulow (AK/SN). Energiju lutowacu a wobswětej tyjacu techniku chce město Kulow při swojim nadróžnym wobswětlenju wužiwać. To podšmórnje měšćanosta Markus Posch (CDU). Město wuhotuje latarnje z LED-lampami. „Hižo minjene lěta smy wulki dźěl wjace hač 800 nadróžnych latarnjow krok po kroku z LED-techniku wuhotowali. Nětko chcedźa nadróžne wobswětlenje w Kulowje a we wjesnych dźělach dospołnje na LED přestajić, Posch wuswětla.
Přetwarjenje je za awgust předwidźane. Město wobstara za wšitke zbywace hišće ze starodawnymi lampami wuhotowane latarnje LED-techniku. „Z tym budźemy přichodnje za nadróžne wobswětlenje cyłeho měšćanskeho teritorija zlutniwe, wobswětej tyjace LED-lampy wužiwać“, wjesnjanosta wuwjedźe.
Wužadanje inkluzije
Radźićeljo připrawu k přewětrjenju za zakładnu šulu wobzamknyli
Hórki (JK/SN). Ze spočatkom šulskeho lěta 2022/2023 zahaji tež na genetisku chorosć schorjene dźěćo swoje šulske wukubłanje w Chróšćanskej zakładnej šuli „Jurij Chěžka“. Za přewětrjenje rjadowniskeje rumnosće, w kotrejž dźěćo wukubłuja, płaća chorosće dla wosebite postajenja. Trěbna je wosebita připrawa, dokelž njesmědźa tam k přewětrjenju wokna wočinjeć. Twarski nadawk je gmejnska rada na swojim zašłym posedźenju přepodała.
Mjez Slepjanskej cyrkwju a Serbskim kulturnym centrumom (SKC) ...
Dalše twarnišćo na awtodróze A 4
54 zastanišćow přetwarja
Budyšin (SN/at). 54 busowych zastanišćow při wokrjesnych dróhach chce Budyski wokrjes hač do lěta 2025 bjezbarjernje wutwarić. To je wokrjesny sejmik na swojim julijskim posedźenju wobzamknył. Za to trěbne swójske srědki we wysokosći 97 000 eurow chcedźa po potrjebje we wotpowědnym budgetowym lěće z pawšale za wuporjedźenje a wobnowjenje po paragrafje 20a Sakskeho zakonja wo zarunanju financow wužiwać.
Dźěła chcedźa lětsa na dźesać zastanišćach we wobłuku Wóspork zahajić. Klětu ma 19 zastanišćow we wobłuku Budyšin slědować, mjez druhim blisko Kopšina a Kozarc. Tež zastanišćo blisko Bronja je za 2023 předwidźane. 18 zastanišćow su sej za 2024 w Biskopičanskej a Kamjenskej kónčinje, zapadnym teritoriju wokrjesa, předewzali, doniž sewjerny dźěl wokrjesa wokoło Wojerec ze sydom zastanišćemi 2025 w srjedźišću njesteji.
Wokrjes je po Sakskim nadróžnym zakonju za zastanišća přisłušny, kotrež leža zwonka městnych přejězdow při droze. Zastanišća zjawneho wosoboweho bliskowobchada bjezbarjerne wuhotować je naležnosć EU, Zwjazka a krajow.
