Předpředań za druhi Krass Brass dźensa zahajili
Hórki. (JBo/SN) Po tym zo bě so dujerski festiwal „Krass Brass“ loni prěni króć wotměł a dobry wothłós žnjał, planuja organizatorojo Syman Hejduška, Fabian Hejduška a Jakub Langa jón tež lětsa zaso přewjesć. Tak su zajimcy 3. junija znowa do Hórkow přeprošeni, hdźež čaka na nich při sportnišću pisany hudźbny program. Tež tónraz ma so dujerska hudźba w swojej wšelakorosći prezentować a předewšěm młodostnym přidatnu móžnosć swjećenja skićić.
Policija (15.05.23)
Motorski znjezbožił
Delnja Hórka. Ćežke wobchadne njezbožo je so sobotu po připołdnju na zwjazkowej dróze B 156 stało. 68lětny wodźer motorskeho typa Harley Davidson jědźeše do směra na Budyšin, jako w prawej křiwicy na lěwy bok jězdnje zajědźe a do napřećo jěduceho wosoboweho awta 63lětneho muža zrazy. Bikera dyrbjachu z ćežkimi zranjenjemi do chorownje dowjezć. Nastatu wěčnu škodu trochuja na něhdźe 16 000 eurow. Wosobowe awto typa Škoda kaž tež motorske dyrbjachu wotwlec.
Mejske pory na wsach rejwali
Na šulskim dworje meju mjetali
Worklecy (sš/SN). Na słónčnym mejskim wječorku su minjeny pjatk na dworje Worklečanskeje zakładneje a wyšeje šule „Michał Hórnik“ wulku meju mjetali. Bohužel njebě to w tymle lěće prěni raz, ale tónkróć oficialnje, a to na tamnišim tradicionalnym dworowym swjedźenju, kotryž wuhotujetej zakładna a wyša šula zhromadnje.
Krótkopowěsće (15.05.23)
Kandidat AfD 47,6 procentow
Beeskow. Dotalny měšćanosta wokrjesneho města Beeskow Frank Steffen (SPD) je so w druhim kole wólbow krajneho rady wokrjesa Wódra-Sprjewja wusko z 52,4 procentami přećiwo kandidatej AfD Rainerej Galla (47,6 procentow) přesadźił. Po wólbach Steffen CDU a Swobodnych wolerjow pobrachowaceje podpěry dla kritizowaše. W prěnim kole běše Galla na prěnim městnje kandidatow.
Na zahrodźe koncertowali
Pančicy-Kukow. Před wulkej syłu připosłucharjow je chór Lipa wčera w klóšterskej zahrodźe w Pančicach-Kukowje nalětni koncert wuhotował. Cyłk pod nawodom Jadwigi Kaulfürstoweje zanjese znate a woblubowane štučki, tež jedna premjera je zaklinčała. Wjacore spěwy přednjese dorostowa skupina Lipki. Wosebita chłóšćenka bě šulerska kapała Šwintuchi. Wjace wo tym jutře.
Njeskutki wotkryli
Nalětni koncert w klóštrje
Pančicy-Kukow. Chór Lipa přeproša hromadźe z Křesćansko-socialnym kubłanskim skutkom na nalětni koncert njedźelu, 14. meje, w 15.30 hodź. na zahrodźe klóštra Marijineje hwězdy w Pančicach-Kukowje. Hižo wot 15 hodź. poskića tam swačinu z kofejom a tykancom. Publikumej zanjesu spěwarki a spěwarjo wěnc znatych a mjenje znatych pěsnjow, w kotrychž powěda so wo lubosći a rejach na korčmarjec žurli. Dale wustupi Lipjanska dźěćina „Lipki“ a dźěćaca band „Šwintuchi“, kotraž chce připosłucharstwu porjadnje zapyrić. Organizatorojo wjesela so na bohaty wopyt.
Na mejemjetanje
Serbske Pazlicy. Kóždolětne mejemjetanje swjeća w Serbskich Pazlicach njedźelu, 14. meje. Započatk budźe w 16 hodź. Kaž wjesna młodźina zdźěli, poskića wot 15 hodź. kofej a tykanc.
Radwor. Tež Radworska młodźina prosy na mejemjetanje. Wone wotměje so tohorunja zajutřišim, njedźelu, a to wot 15 hodź. na nawsy. Wo program postara so po zwučenym wašnju pěstowarnja. Sobotu wot 20 hodź. su wobydlerjo na nawjes k natočenju piwa witani.
Policija (12.05.23)
Wjele pjenjez zhubiła
Łužnica. Zaso raz fungował je tak mjenowany šokowy telefonat, při kotrymž su skućićeljo woporej wjele pjenjez wulišćili. 77lětna žona we Łužnicy je minjenu wutoru 24 000 eurow zhubiła. Njeznaći wudawachu so jako policisća a žonje napowědachu, zo bě jeje dźowka wobchadne njezbožo ze smjertnym woporom zawiniła. Zo njetrjebała do jastwa, je kawcija trěbna. Škodowana přepoda pjenjezy njeznatemu blisko swojeho bydlenja.
Horca diskusija wupadnyła
Měnjenja k planowanej fotowoltaikowej připrawje sej wuměnili
Šunow (JK/SN). Trochu spodźiwnje hladachu zajimcy, kotřiž běchu wčera do Šunowskeje fabrikskeje hospody na rozmołwu k planowanej fotowoltaikowej připrawje přišli. Město wočakowaneje podijoweje diskusije měješe předewzaće UKA z Mišna, kotrež bě na zarjadowanje přeprosyło, na žurli wjacore informaciske tafle nastajene. Kóžda wěnowaše so wosebitemu wobłukej, kotryž tajka připrawa narěznje. Sobudźěłaćer UKA k tomu na wotpowědne prašenja wotmołwješe. Předstajene wobłuki sahachu wot techniskich zakładow fotowoltaiki přez hospodarske lěpšiny za gmejny hač k přirodoškitej. Něhdźe sto zajimcow z Konjec, Šunowa a Smjerdźaceje so na wčerawšim zarjadowanju wobdźěli.
Dnjowe maćerje: „My tu tež smy“
Budyšin (UM/SN). Žołta barba je předwčerawšim na Budyskim Hłownym torhošću dominowała. Zjednoćenstwo Budyskich dnjowych maćerjow je pod hesłom „Dnjowe hladanje dźěći samozrozumliwe“ k akciskemu dnjej před radnicu přeprosyło. „Chcemy pokazać, zo tež my tu smy. Mnohim staršim scyła wědome njeje, zo móža swoje dźěći w žłobikowej starobje tež pola dnjoweje maćerje hladać dać“, praji Bernada Bulankowa. Wona je jedna z 13 dnjowych maćerjow, kotrež w Budyšinje swoje posłužby poskićeja. „Pjenježnje njeje žadyn rozdźěl, hač so kubłarka w žłobiku abo dnjowa mać wo dźěćo stara. Při hladanju samym pak je rozdźěl wulki. W małej skupinje maksimalnje pjeć holcow a hólcow móžeš so kóždemu dźěsću indiwiduelnišo wěnować.“
Kompromis na dobro kupjele
Budyšin/Kamjenc (SN/at). Kompromis mjez Budyskim wokrjesom a městom Kamjencom zmóžnja dalše planowanja za nowotwar haloweje kupjele w Lessingowym měsće. Tak je předwidźane, projekt nastawaceje kombikupjele najprjedy bjez wonkowneho basenka dale planować. Kaž wobě stronje zdźělitej, je nětko trěbne, nowu próstwu wo pjenjezy ze změny strukturow zapodać. Z kompromisowej wariantu chcetej hospodarski a žiwjenski rum Kamjenc a susodnu kónčinu z atraktiwnej wokolinu w zmysle regionalneho wuwića skrućić.
Projektnu próstwu chcetej krótkodobnje Regionalnemu přewodźacemu wuběrkej zapodać, tak zo móže tón ju lětsa nazymu rozjimać. Nimo toho město a wokrjes hižo njewuzamkujetej, za trěbnu inwesticiju a přichodne wobhospodarjenje zhromadny zaměrowy zwjazk wutworić. Tomu pak dyrbi wokrjesny sejmik přihłosować.
Jako nošer Budyski wokrjes najebać ćežke financne połoženje dalewobstaće kupjele podpěra. Woprowany wonkowny basenk měł opcija za přichod nowotwara wostać, rěka z Kamjenskeje radnicy.
