Posledni dźeń šule w cyrkwi zhromadnje spěwali
Kulow. Rjanu dohodownu tradiciju pěstuja mjeztym hižo 16 lět na Kulowskej wyšej šuli „Korla Awgust Kocor“. Posledni dźeń do kónclětnych prózdnin so šulerki a šulerjo zetkaja a zhromadnje adwentne a hodowne spěwy spěwaja. K tomu sej tohorunja holcy a hólcow Kulowskeje zakładneje šule přeproša. Po tym zo je so w zašłosći hodowne spěwanje tež hižo w sportowni wotměło, móžachu tónle podawk wčerawšu srjedu zaso w katolskej farskej cyrkwi přewjesć.
Runja zašłym lětam bě hudźbna wučerka wyšeje šule Uta König ze šulerskej kapału a mnohimi dalšimi chowancami wšelake hudźbne přinoški nazwučowała. Tak bě tónle dohodowny podawk zaso jara hnujace zarjadowanje, na kotrymž šulerjo kaž tež jich wučerjo swoje spěwne kmanosće dopokazachu. Wosebity wokomik drje bě, jako Rosa Kochta z přewodom Uty König němski kěrluš „Maria durch ein Dornwald ging“ zaspěwa. To drje někotremužkuli připosłucharjej po chribjeće huškaše. Po něhdźe hodźinje wšitcy farsku cyrkej w prawje dohodownej atmosferje wopušćichu a so hižo nětko na klětuše zhromadne spěwanje wjesela.
Wjeselo na lodźe jenož krótke było
Nuzowy pad rozjimali
Rakečanska gmejnska rada so lětsa posledni raz schadźowała
Rakecy (JK/SN). Zaměrnje a konstruktiwnje, samo na sebi po zwučenym wašnju, wotmě so poslednje lětuše posedźenje Rakečanskeje gmejnskeje rady. Nimale połnoličbna rada móžeše bjez problemow a diskusije přihłosować kónclětnymaj wotličenjomaj bydlenjotwarskeje towaršnosće Rakecy a Rakečanskeje zastaranskeje towaršnosće za lěto 2021. Wobě wotličeni buštej wot fachoweju firmow pruwowanej. Gmejnska rada społnomócni tuž wjesnjanostu Swena Nowotneho (CDU) na zhromadźiznomaj towaršnikow wobeju předewzaćow wotpowědnje wothłosować a stejišćo gmejny zastupować. Hospodarskej wuslědkaj wobeju towaršnosćow pak njespokojatej.
Policija (22.12.22)
Bjez dowolnosće, ale z alkoholom
Delnja Hórka. Nadróžny wobchad strašnje wohrozył je 35lětny wodźer Passata wčera krótko po połnocy na zwjazkowej dróze B 156. Wón bě z Budyšina do směra na Delnju Hórku po puću, jako w křiwicy nalěwo kontrolu nad awtom zhubi, na prawym boku wobhrodźenje a dźiwinowy płót přełama a so po skłoninje suny. Při tym so VW zwróći. Na jězdźidle nasta něhdźe 18 000 eurow škody. Jězdźić z nim hižo njemóžeš. Na wobhrodźenju a płoće nasta 3 000 eurow škody. Na zbožo so 35lětny jeno snadnje zrani. Při wobdźěłanju njezboža policisća zwěsćichu, zo muž scyła žanu jězbnu dowolnosć njewobsedźi. Nimo toho so wukopa, zo bě pod wliwom alkohola awto wodźił. Pola njeho naměrichu mjenujcy 1,68 promilow. Za to změje so před sudnistwom zamołwić. Policija pad nětko dale přepytuje.
Adwentny čas w internaće
Zo su naši šulerjo pilni kaž pčołki, to je zawěsće znate. Kóždy dźeń sedźi druha skupinka nad zešiwkami a knihami a spyta ličby, konjugacije, zapřijeća, logaritmy a druhe zajimawe a mjenje zajimawe wěcy sej do hłowy zašćěpić. Mnoho šulerjow je aktiwnych w hudźbnej šuli, we wohnjowej woborje, w rejwanskej skupinje, we wosadźe, w brigadźe, w sportowym towarstwje abo druhdźe. Ale najradšo wotpočnu wot napinacych šulskich hodźinow ze samowarjenej jědźu, před telewizorom, w sportowni abo na adwentnych wikach. Ale druhdy maja tež lóšt na aktiwity w internaće.
Spočatk adwenta smy adwentnu stwu zarumowali a z hałžkami a wšelakim materialom za paslenje wuhotowali. W dalšej rumpodichowej dźěłarni móžachu sej najwšelakoriše dary za hody zhotowić. Čas a zajim za aktiwne ručne dźěło wšak bě jara snadny. Škoda. Za čas swětowych mišterstwow w kopańcy sej wězo zhromadnje hry před wulkej sćěnu wobhladachmy. Škoda, zo bě tak zahe kónc ze zhromadnym hejsowanjom za němske mustwo.
Wobkedźbuješ-li nadrobnosće, skića dohodowna pycha rjany motiw za ...
Kóžde lěto samsny fenomen
Krótkopowěsće (22.12.22)
Policajski rewěr přepodali
Budyšin. Modernizowany Budyski policajski rewěr bu wčera w přitomnosći sakskeho ministra nutřkowneho Armina Schustera (CDU) přepodaty. 2017 běchu bywšu žurlu přetwarili, lěto pozdźišo hosćenc zapřijeli. W nětko wotzamknjenym třećim twarskim wotrězku su rumnosće zajeća, garderoby a sanitarne wobłuki wobnowili.
Wysoki chorobny staw
Drježdźany. Wo rekordnym chorobnym stawje informuje chorobna kasa technikarjow (TK) w Sakskej. Mjez pola njeje zawěsćenymi ludźimi, kiž wšědnje na dźěło chodźa, je aktualnje 5,19 procentow chorych pisanych. To je wjace hač hódnota 4,16 procentow loni. Hišće wšitke daty njekmanosće dźěłać njepředleža, tola „ležimy z choropisanjemi hižo nětko nad ličbami minjenych lět“, zwěsći Alexander Krauß, nawoda TK w Sakskej.
Začuće wěstoty skrućić
Dróha do města wotewrjena
Budyšin. . Po Lubijskej dróze w Budyšinje móža awta wot dźensnišeho zaso do města nutř jězdźić. Na křižowanišću Lubijska/Pawlijowa twarske dźěła zymy dla přetorhnu. Klětu ma so dale twarić. Po wšěm zdaću budźe tež potom dale móžno, po Lubijskej do města jězdźić, měšćanske zarjadnistwo zdźěli.
„Mała wjera“ w poskitku
Budyšin. Dypkownje k hodam poskićuje Budyska Serbska kulturna informacija DVD „Mała wjera“. Serbsce synchronizowana bajka je za wosom eurow na předań.
Štomy wurězować nawuknyć
Wojerecy. Na Wojerowskej dźěćacej a młodźinskej farmje chcedźa zajimcam 14. januara rozłožić, kak so sadowcy prawje wurězuja. Wot 10 do 12 hodź. zahrodniska mišterka Janine Gräulich wobdźělnikam kursa wšitko trěbne rozkładźe a pokaza. Po teoretiskich pokiwach móža so wobdźělnicy na sadowcowej łuce farmy w praktiskim dźěle pospytać. Wobdźělenje płaći dźesać eurow. Přizjewjenja přijimuja pod telefonowym čisłom 03571 979164.
Jěrchenjowe kamjenje
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk w nowej seriji znatym a mjenje znatym chorosćam, zo by je čitarjam trochu bliže rozłožował (5).
