Přednošuje wo misionstwje
Lědma noweho wo milinarni
Běrokratija zadźěwa wulkej inwesticiji w Slepom
Slepo (CK/SN). Za srjedźnu třicyfrowu milionowu sumu pjenjez chce skupina inwestorow w Slepom biologisku tepjernju jako ekomilinarnju (ÖKW) natwarić, ćopłotne składowaki zhotowjeć a ekologisku žiwidłowu produkciju natwarić. Hač do 300 nowych dźěłowych městnow ma hač do lěta 2029 nastać. Přirodoškitarjo so boja, zo ma so za to wulke mnóstwo štomow na nasypje pola Mułkec podrězać. Wo aktualnym stawje přihotow je planowar Fabian Kohl z předewzaća MR Planfabrik w Slepjanskej gmejnskej radźe porěčał.
Wobsedźerjam lěsa derje radźił
Pěskecy (JK/SN). Nahladnu ličbu wobsedźerjow lěsa a zajimowanych wobydlerjow móžeše rewěrowy hajnik Michał Zahon sobotu dopołdnja na parkowanišću mjez Róžantom a Pěskecami witać. Najebać njepřihódneho wjedra bě 30 wobdźělnikow přeprošenje na wuprawu do lěsa sćěhowało. Z wobšěrnej fachowej wědu a trěbnym hospodarsko-politiskim kaž tež wobswěto- a přirodoškitnymi informacijemi wjedźeše sobudźěłaćer Sakskeho statneho lěsnistwa wobdźělnikow po wšelakich wotrězkach lěsa. Na konkretnych přikładach pokaza na trěbne dźěła w lěsu kaž tež na aktualne žadanja na jeho wobsedźerjow. Tute steja po wuprajenju Michała Zahona před wulkimi nadawkami, hladajo na wobswětowe wužadanja a změnu klimy.
W Ralbicach je wčera 24 dźěći prěni raz sakrament wołtarja ...
Krótkopowěsće (17.04.23)
Kónc brunicy 2030 móžny
Drježdźany. Studija, kotruž je zwjazk za wobswět a wobswětoškit (BUND) do nadawka dał, da jasny signal za kónc wudobywanja brunicy we Łužicy w lěće 2030. Wuslědki studije zwuraznja samo, zo bychu so łužiske milinarnje w Hamorje, Čornej Pumpje a Janšojcach krok po kroku hač do lěta 2029 wotšaltować dali. Tole njeby pječa žane grawěrowace hospodarske wuskutki na region měło.
Lüke wostanje měšćanostka
Połčnica. Barbara Lüke (bjezstronska) wostanje měšćanostka w Połčnicy. Wona přesadźi so w druhim wólbnym kole z 57,3 procentami přećiwo napřećiwnikej Frankej Hannawaldej (AfD). Hišće w měrcu njebě jasny wukónc wólby wotwidźeć, jako z tehdy hišće třoch kandidatow, žadyn absolutnu wjetšinu hłosow njedoby. Lüke so na dalše lěta w zastojnstwje jara wjeseli.
Třećinu wotnožkow rozpušća
Program kubłanišća skića znate a nowe zarjadowanja
Smochćicy (SN/MWj). Ze spočatkom jutrownika je Smochčanske kubłanišćo swjateho Bena swój program 2023 zahajiło. Jeho hesło je „Žórło mocy“. Wón wopřijimuje hač do nazymy 46 zarjadowanjow. Mjeno programa je wotpohladane a poćahuje so na prastare žórło, kotrež mjenowachu strowotnju studnju a kotrež měješe hojenski efekt. „Ze swojim programom poskićujemy hosćom najwšelakoriše temy, z kotrymiž móža so zaběrać. Zetkanja a wuměna z druhimi ludźimi wuprudźeja móc, nadawki wšědneho dnja zmištrować“, praji rektor domu Sebastian Kieslich.
Lětuši program wobsahuje wotměnjaty poskitk kursow, seminarow a zarjadowanjow. Su to mjez druhim filmowe dny rozmyslowanja wot 21. do 25. junija, ze Serbskim ludowym ansamblom wuhotowany Smochčanski hudźbny swjedźeń 30. junija a 1. julija, swójbna njedźela 2. julija, chórowe a orchestrowe dny z prof. Wernerom Patzeltom wot 29. julija hač do 6. awgusta a dny za wnučki, dźědow a wowki wot 9. do 13. oktobra.
W meji započnu twarić
Prěnjej nadawkaj za nowu Ralbičansku pěstowarnju přepodali
Róžant (JK/SN). Wulki projekt a wjelelětne přeće gmejny Ralbicy-Róžant – nowotwar Ralbičanskeje pěstowarnje – nabywa dźeń a jasniše kontury. Na wčerawšim posedźenju tamnišeje gmejnskeje rady radźićeljo prěni nadawk za přihot twarnišća a hłubokotwar kaž tež dalši za hruby twar jednohłósnje přepodachu.
Bjez adresy žane myto
Budyšin. Mnozy čitarjo su mjeztym hižo křižowku w jutrownym wudaću Serbskich Nowin wuhódali a nam prawu wotmołwu připósłali. Bohužel we wjacorych dóšłych mejlkach adresa wotpósłarja pobrachuje. Tohodla na tymle městnje na to skedźbnjamy, zo maja wotpósłarjo na kóždy pad swoju adresu zapodać, jeli chcedźa so na wulosowanju wobdźělić. Štóž je nam mejlku hižo pósłał, njech kontroluje, hač je adresu podał. Jeli njeje, njech nam z adresu wudospołnjenu mejlku znowa pósćele.
Předstaja přiručku
Zhorjelc. Lipšćanska rěčespytnica dr. Inge Bily předstaji swoju w Ludowym nakładnistwje Domowina wušłu přiručku „Slawische Personennamen in Ortsnamen zwischen Saale und Bober/Queis“ pjatk, 21. apryla, w 19 hodź., w Barokowym domje w Zhorjelcu. Knižne předstajenje wotměje so we wobłuku nalětnjeho zetkanja Hornjołužiskeje towaršnosće wědomosćow jako zhromadne zarjadowanje z LND. Kniha wjedźe wuslědki slědźenjow wo serbskich/słowjanskich wosobowych a městnych mjenach hromadźe a je spušćomny zakład za dalše mjenowědne slědźenja.
Policija (14.04.23)
Pokradnjene awto namakali
Budyšin. Hižo 3. apryla běchu njeznaći w Załomskej sportowni tablet, awtowy kluč a před halu stejace awto pokradnyli. Předwčerawšim so wobsedźerjej tableta poradźi, swój nastroj w Budyšinje na Jordanowej lokalizować. W mjenowanym wobłuku wuhlada wón awto swojeho sobu-sportowca. Na nim bě mjeztym hinaše čisło přičinjene. Policija wšitke slědy zawěsći a wobsedźerjej jeho Suzuki wróći. Tablet pak namakali njejsu, dokelž lokalizowanje dokładne dosć njebě, kaž policija zdźěli.
Šćežka powjedźe po spušćadle
Delnja Hórka (UM/SN). Po woli Malešanskeje gmejny nima Sprjewiny kolesowanski puć w Delnjej Hórce přichodnje hižo po hrodowej kupje wjesć, ale po spušćadle. Kaž wjesnjanosta Matthias Seidel (CDU) wobkrući, chcedźa za to klětu abo 2025 móst za kolesowarjow a pěškow twarić. Tole je gmejnska rada hižo wobzamknyła. „Z wobsedźerjom hrodoweje kupy drje wobsteji dojednanje, zo smědźa ju jako kolesowansku šćežku wužiwać, šćežka pak prawje wěnowana njeje“, wjesnjanosta rozłoži. Nimo toho dźěl šćežki wot mosta nad pódlanskej rěčku Sprjewje a dróhu W Ryćerkuble wutwarjeny njeje. Sčasami bě wotrězk samo zawrjeny, tak zo dyrbjachu so kolesowarjo na zwjazkowu dróhu B 156 wuwinyć. Dźakowano dojednanju mjez gmejnu a wobsedźerjom pak tele połoženje dołho njetraješe.
