Policija (08.03.23)
Wodźer Škody nuzne měł
Słona Boršć. Na awtodróze A 4 mjez wotbóčkomaj Słona Boršć a Budyšin-zapad je spěšnosć na 120 km/h wobmjezowana. Předwčerawšim dopołdnja je policija kontrolowała, hač so wodźerjo awtow po tym maja. W běhu šěsć hodźin je dohromady 3 300 jězdźidłow nimo měrjenskeho městna jěło. Z toho bě 27 přespěšnych. Z nich mějachu dźesaćo wosebje nuzne, tak zo na nich pokuta čaka. Najspěšniši bě wodźer Škody z pólskim čisłom, kotrehož błysknychu ze 166 km/h. Wón změje nětko 320 eurow pokuty płaćić, a w Němskej wón měsac dołho z awtom jězdźić njesmě.
Přehladku wěnuja dr. Lotarej Balku
Minjeny kónc tydźenja bě w Budyskim Serbskim domje zazběh do lětušeho rjada jutrownych wikow we Łužicy. Tež w Drjowku tajke wiki přewjedu. Do toho pak tam přichodnu njedźelu wosebitu wustajeńcu wotewru.
Drjowk (JoS/SN). Cyle wosebitu jutrownu wustajeńcu přihotuja tele dny w tkajerskej stwě w Drjowku (Drebkau). Jeje hesło je „40 lět jutrowne jejka a jutrowne nałožki“. Přehladka je wěnowana skutkowanju dr. Lotara Balka. Před 40 lětami je wón prěnju wustajeńcu jutrownych jejkow w Drjowku wotewrěł. Tehdy w lěće 1983 bě to regionalna sensacija. Před tkajerskej stwu bě dołhi rynk ludźi – wobraz we wustajeńcy dźensa na to dopomina. Tež tehdyši plakat je dźensa widźeć.
„Składnostnje jubileja lětušu přehladku dr. Balku wěnujemy“, praji nawodnica tkajerskeje stwy Doreen Haiasch. Wustajeńca wězo jenož dźěl jeho žiwjenskeho skutka dokumentuje. Wón je něhdźe 2 500 jutrownych jejkow z 50 krajow swěta zawostajił. W lěće 2008 je dr. Lotar Balko zemrěł. Jeho wudowa je nětko priwatne jutrowne jejka za wustajeńcu přewostajiła. Při tym jedna so wo žadnostki, kotrež dotal hišće zjawnje widźeć njeběchu.
Tak mjenowany běh „Miriquidi“ su kónc tydźenja w Zinnwaldźe ...
Sceny ze zažnokćějakami wobdźiwać
Akciske tydźenje žonow zahajene
Krótkopowěsće (08.03.23)
Z nowym labelom za žony
Drježdźany. Techniska uniwersita Drjež- dźany młode žony w zwisku ze studijom přirodowědow a technikowědow z mnohostronskimi projektami podpěra. Tute nětko pod labelom Campus Johanny Weinmeister zwjazuja a wozjewjeja. Weinmeister bě jedna z dweju studentkow, kotrež běštej so 1907 – nětko za žony w Sakskej oficialnje dowolene – za studij zapisałoj.
SKT z wabjenskim krótkoklipom
Slepo. Wo wutwarje kolesowanskeje šćežki „Serbske impresije“ we wobłuku wuwića strukturow je so předsydstwo towarstwa Serbski kulturny turizm (SKT) tele dny wuměniło. Kaž projektowy manager Franc Golchert zdźěli, su dale finalne dźěła za prěni wabjenski krótkoklip wo serbskich jutrownych nałožkach přihotowali a dźěławosć w dźěłowym kruhu „Serbska kupa“ rozjimali.
Złóstnistwa dokumentować
Policija (07.03.23)
Dwójce so paliło
Kołwaz. Hnydom dwójce je so předwčerawšim w Kołwazu (Kohlwesa) pola Bukec paliło. Najprjedy so popołdnju z twarjenja třistronskeho statoka kurješe. Wobornicy płomjenja spěšnje podusychu, škoda je lědma nastała. Něhdźe w 22.30 hodź. w druhim domje we wsy zwěsćichu, zo so tam wobruče palachu, a to hnydom pódla płunoweho tepjenja. Na zbožo wobornicy hóršemu zadźěwachu a tež tónle woheń zhašachu. 65lětna žona so zrani.
Pěsnje a rejki nazwučowali
Dalekubłanje z nowymi serbskimi dźěćacymi spěwami za Witaj-dźěći je Rěčny centrum WITAJ minjeny štwórtk w bróžni Domowinskeho domu we Wojerecach za kubłarki a wučerki přewjedł. Prěni raz wuzwolichu sej tutu rumnosć, a běchu jara zahorjeni wo móžnosćach wužiwanja nowych meblow a wuběrnych wobstejnosćow. Přeprosychu sej wučerki delnjeho schodźenka, kotrež wuwučuja serbšćinu na šulach we Wojerecach, Nowej Wsy, Łazu a zdobom WITAJ-kubłarki z wjacorych dźěćacych kubłanišćow. Samo z Drježdźan bě kubłarka přichwatała.
Referentka Leńka Thomasowa, wjelelětna wučerka za hudźbu na Serbskej fachowej šuli za socialnu pedagogiku w Budyšinje, njenazwučowaše z nimi jenož wosom nowych abo znowa namakanych spěwow za pěstowarsku a zakładnošulsku starobu, ale podawaše tež wšelake metodiske pokiwy, kak so spěwčki a rejki we wučbje wariabelnje zasadźeć hodźa.
Weronika Butendeichowa
Porěča wo spěchowanju
Terminowy kalender radźićelow hižo derje pjelnjeny
Njebjelčicy (JK/SN). Nimo tak mjenowanych „normalnych“ terminow, kotrež dźěło w gmejnskej radźe ze sobu přinjese, maja Njebjelčanscy radźićeljo tež tójšto přidatnych terminow, kotrež su za dźěło w komunje trěbne a wažne. Nimo přihotow na přichodne posedźenje parlamenta, kotrež budźe 30. měrca a na kotrymž póńdźe wo lětuši hospodarski plan, budźe to zjawne informaciske zarjadowanje k přichodnemu zastaranju gmejny z energiju. Wone wotměje so 13. měrca w 18 hodź. w sydarni gmejnskeho zarjadnistwa.
Wo přirodnej zahrodce
Wojerecy. Kak móžeš swoju zahrodu přirodnje a bjez chemije wobhospodarić je tema zarjadowanja 11. měrca wot 10 hodź. na Wojerowskej dźěćacej a młodźinskej farmje. Tam porěči bioratar Ronny Rebiš z Kanec. Z prawym wobhospodarjenjom móža zahrodkarjo strowe žiwidła žnjeć a tež insektam přirodny žiwjenski rum skićeć. Wopytowarjo zhonja, kak móžeš to bjez mineraliskeho hnojidła a chemije docpěć. Wobdźělenje płaći dźesać eurow. Přizjewjenja přijimuja pod .
Za wiki so přizjewić
Stróža. Wikowarjo a rjemjeslnicy, kotřiž chcedźa so 29. apryla na nalětnich přirodowych wikach w Stróži wobdźělić, móža so e-mailnje pod adresu hač do 10. měrca přizjewić. Hesło wikow rěka „Zahroda“. Předewšěm prašane su přirodnje a regionalnje zhotowjene wudźěłki, rjemjeslniske pokazki a serbski kulturny program. Přirodne wiki organizujetej a přewjedźetej zarjadnistwo biosferoweho rezerwata Hornjołužiska hola a haty a Stróžanske Domizniske towarstwo Radiška.
