Policija (14.02.23)
Awtomataj rozbuchnyli
Delnja Hórka. Cigaretowy awtomat na Mužakowskej dróze w Delnjej Hórce w Malešanskej gmejnje bě předwčerawšim wječor cil paduchow. Z njeznatym rozbuchadłom woni awtomat něhdźe w 23 hodź. dospołnje skóncowachu. Skućićeljo wzachu njeznate mnóstwo pjenjez a cigaretow sobu. Wěcnu škodu trochuja na něhdźe 5 000 eurow. Jenož něhdźe hodźinu pozdźišo sta so runje tajki pad we Waltersdorfje, w gmejnje Wulki Šunow. Tež tam wužiwachu skućićeljo njeznate rozbuchadło a awtomat skóncowachu. Mnóstwo pokradnjenych pjenjez a cigaretow je tohorunja njeznate.
Je ćežko, sprawnje rozsudźić
Dokelž maja we Worklecach wyšu šulu, trjebaja tež sportowu halu. Tutu pak tež zwonka sportoweje wučby wužiwaja. A to płaći pjenjezy. Z tymle prašenjom dyrbješe so nětko tamniša gmejnska rada zaběrać.
Worklecy (JK/SN). Podobnje kaž susodna delanska ma tež Worklečanska gmejna nadawk, rjadować a postajić popłatk za wužiwanje sportoweje hale. Nimo šulerjow tamnišeje zakładneje a wyšeje šule wužiwaja halu sportowcy Victorije Worklecy kaž tež dorost a mužojo Njebjelčanskeje sportoweje jednotki. Dale wužiwa so wona za najwšelakoriše zarjadowanja gmejny, šule a priwatnych zajimcow.
Hala wobćežuje gmejnu kóždolětnje z tójšto wudawkami. Te je komornica Michaela Markowa hromadźe znosyła a nastajiła kalkulaciju jako zakład k noworjadowanju popłatka za wužiwanje hale. Po jeje ličenju zawinuje hala wudawki we wobjimje 75 000 eurow wob lěto. Přeličene na hodźinu wužiwanja je to 25 eurow. Zo wužiwarjo hale tele wudawki zapłaća, je iluzoriske a njeje scyła wobsah wuradźowanjow. Skerje dźe wo to, běžne wudawki tak rozdźělić, zo hodźi so hala dale derje wobhospodarić.
Myto bě zetkanje w kormjerni
Serbskopazličanske karnewalowe towarstwo nowy program předstajiło
Njebjelčicy (AKr/SN). Skónčnje bě minjenu sobotu tak daloko, zo běchu wšitke nory na 1. kapičkowy wječor Serbskopazličanskeho karnewaloweho towarstwa do Njebjelčic prošene. Witać móžachu hosći zbliska a daloka, samo z Awstriskeje.
Wječor zahajichu po protokolu ze zaćahom rady jědnaćoch a škričkoweje gardy. Pod nawodom prezidenta WCV Daniela Wätziga witachu z mócnym helaw a wutrobnym přikleskom amtěrowacy princowski por Clemensa I. a jeho něžnosć princesnu Celine I. w połnje wobsadźenej wosadnej žurli „Bjesada“. Prawy zazběh bě temperamentna reja škričkoweje gardy.
Tohorunja wjelelětny kruty wobstatk programa je póstniska narěč Daniela Ričla. Tónraz wustupi wón jako Egon Olsen, kiž swětowu politiku pošwika. Holča garda w swojej frinkolacej drasće tohorunja wšitke nory z reju zawjeseli. Nimo toho wobsteji hišće dźěćaca škričkowa garda, tak zo ma karnewalowe towarstwo dohromady tři tajke skupiny. Čłonki wulkeju skupinow sej reje a choreografije cyle sami wumysla a nazwučuja.
Swójby zhromadnje hejsowali
Z jasnym planom do noweho lěta
Čłonojo Domowinskeje skupiny Pančicy-Kukow zetkachu so minjeny štwórtk na žurli wikarije we wsy k swojej hłownej zhromadźiznje. Na njej wuhódnoćichu lońšu dźěławosć a dorěčachu sej lětuše aktiwity.
Tak předsyda skupiny Pětr Korjeńk zwěsći, zo su wužadanja kaž pandemija spočatk lěta a pobrachowace rumnosće za zetkawanja w Pančicach-Kukowje skutkowanje Domowinjanow wobwliwowali. Při wšěm móžeše w swojej rozprawje na rjad rjanych dožiwjenjow zhladować. K tutym słušachu wopyt inscenacije „Šěrcec Hanka“ w NSLDź, kolesowanski wulět do wustajeńcy serbskich drastow Móniki Cyžoweje w Nowej Jaseńcy, spěwny wječork ze skupinu „Wólbernosće“ w Kukowje, swjedźeń za swójby na Kukowskim hrodźišću, wulět do srjedźneje Łužicy a adwentnička, kotruž wobrubi šulski chór „Šule Ćišinskeho“. Kruće w protyčce zapisanej stej kóžde lěto rjedźenskej akciji při pomniku Jakuba Barta-Ćišinskeho w Lipju.
Jónkrótny poskitk za bjezdomnych a potrěbnych w Hamburgu
Stani Nawka z Hamburga rozprawja wo skutkowanju Hamburgskeje misije, kotruž wosobinsce sobu podpěra.
Blisko hłowneho dwórnišća w Hamburgu bu kónc januara po jenož 11 twarskich měsacach nowa dwórnišćowa misija přepodata. Płoninu něhdźe 400 kwadratnych metrow wulkeho a pjeć milionow eurow droheho twara, kotryž bu wot Němskeje železnicy (DB) financowany, město Hamburg wobsedźi. DB dóstanje za to areal za planowane parkowanišćo kolesow wot města, štož je hnydom za dwórnišćom.
Hamburgska misija je druha najstarša tajka hospoda w Němskej (wot 1895 sem), mjeztym je jich na wšěch sto po cyłym kraju. Sobudźěłaćerjo staraja so wo pućowacych, kotřiž druhdy jenož nachwilnje pomoc trjebaja, wo zbrašenych, abo maćerje z dźěćimi. Runje tak pomhaja sobudźěłaćerjo ludźom, kotřiž njemóža bjeze wšeho sami z ćaha wulězć abo do njeho zalězć. Tohorunja přewodźuja přistajeni dźěći programa „Kids On Tour“, kotřiž su sami z ćahom po puću.
Nowy magacin za młodźinu
Budyšin (SN/bš). Zwotkel poprawom młodostni w Budyskim regionje wo tutym zhonja, hdyž nic z regionalnych nowin abo regionalneho rozhłosa? Najwjace młodźinskich akterow we wokolinje informuja wo swojich aktiwitach w socialnych medijach. Centralneje platformy za młodostnych w Budyskej kónčinje pak njeje. Z tuteje přičiny je Beno Brězan iniciatiwu za nowy młodźinski onlinemagacin „Bautzen. Rocks“ startował a zhromadnje z partnerami koncept wuwił. „Chcemy zajimawy kanal za młodźinu, ale tež wot tuteje sobu wuhotowany stworić“, tak Brězan.
Wažne za iniciatora je, młodostnych „wot doma wotewzać“. Hdyž tući wšědnje na swoje abonowane kanale w syćach hladaja, su na městnosć poćahowani husto wšudźe druhdźe, hač we Łužicy. Byrnjež je tež tu zajimawych aktiwitow abo trendow. Jedyn znaty trend su na přikład mjezsobne wubědźowanja, kotrež so na widejo toča a přećelam zdźěla.
Nowy młodźinski magacin změje webstronu, ale budźe hłownje na Instagramje, Telegramje abo na YouTubje aktiwny – wotpowědujo trendej wužiwanja medijow přez młodostnych.
Krótkopowěsće (14.02.23)
Su za dualny studij wučerstwa
Neukirchen. Swobodni wolerjo (FW) w Sakskej žadaja sej dualny studij wučerstwa. „Chroniskeje potrjeby na wučerjach dla trjebamy nowe ideje,“ praji krajny šef FW Thomas Weidinger němskej powěsćerni w Drježdźanach. „Z dualnym studijom zwyšimy kwalitu wukubłanja, dokelž je teoretiski pedagogiski dźěl přez bliskosć k šulerjam wo wjele žiwiši za přichodnych wučerjow,“ wón doda.
Po škodach čaru zaso wotewrili
Žitawa. Po tym zo běchu paduši w lěće 2022 koporowe kable pokradnyli a woclowe hrjady wobškodźili, běše železniska čara mjez Hagenwerderom a Žitawu měsacy dołho zawrjena. Nětko ćahi zaso jězdźa – to zdźěli sćelak MDR na swojej powěsćowej stronje. Škoda płaćeše němsku železnicu štwórć miliona eurow. K lěpšemu škitej kolijow chce wona mjezy překročacy wěstotny koncept zawjesć.
Saněrowanje nasypa dokónčene
Starša młodźina camprowała
Studenća na póstnicachlóštne přesćěhowanje pokazali
Swójske póstnicy wuhotować słuša k jednomu z najwažnišich podawkow w běhu lěta čłonow a čłonkow studentskeho towarstwa Sorabija Lipsk. Minjenej dwě lěće běchu woni korony dla swój póstniski program digitalnje předstajili.
Lipsk (SN/JBo). Po nanuzowanej přestawce móžachu Lipšćanscy Sorabičenjo swój póstniski program skónčnje zaso w prezency předstajić. W kopaće połnej žurli sociokulturelneho centra „Anker“ w sewjeru Lipska witachu serbscy studenća a studentki swojich hosći zbliska a zdaloka.
