Sobudźěłaćerjam so dźakowali
Budyšin. Zamołwići zaměroweho wobchadneho zwjazka Hornja Łužica-Delnja Šleska (ZVON) su so wčera z małej gestu pola swojich sobudźěłaćerjow za jich wšědne dźěło dźakowali. Jako dźakny dar přepodachu kóždemu termosowu blešu.
Poskićeja wodźenje
Wojerecy. Wosebitu dźěłarničku za młodostnych wot 9. lětnika a dorosćenych poskićitej hród a měšćanski muzej Wojerec 3. februara w 10 hodź. Zajimcy móža so na tematisce specifiskim wodźenju přez bywši lacaret a lěhwo za wójnskich jatych Elsterhorst, nětčiši Narć pola Wojerec, wobdźělić. Po wodźenju so přitomni do dźěłowych skupin rozdźěla, zo bychu so z pomocu našočasnych žórłow z dóńtom tehdyšich jatych a nućencow wokoło Wojerec rozestajili. Něhdźe dwě hodźinje stej za poskitk planowanej. Zastup za dźěćo płaći pjeć eurow, přisłušacy dorosćeny je darmotny. Zajimcy přizjewja so telefonisce pod 03571 20973504 abo přez mejlku na z.
Informuja wo wukubłanjach
Boršć na probu podlěšili
Rozsud měšćanskeje rady po lisće hermankarjow a wikowarjow
Kamjenc (UM/SN). Kamjenska Boršć ma so podlěšena wotměć – tola jenož na swjedźenskej łuce a tež pod druhim mjenom. To je wuslědk postajenja, kotrež je Kamjenska měšćanska rada hišće loni wobzamknyła. Wuchadźišćo bě list wjace hač 40 hermankarjow a wikowarjow na město Kamjenc, w kotrymž wo podlěšenje Boršće wo tři dny prošachu. Tam rěka mjez druhim: „Hospodarskich, ale tež personalnych přičin dla je na- a wottwar w běhu 24 hodźin, zo by so wotewrjenje dalšeho zarjadowanja pjatk zmóžniło, přiběracy ćežki.“ Tuž nasta diskusija, štwórtk měł wotpadnyć, „štož pak by tradiciji znapřećiwiło a zawěsće tež njeby we Wašim zmysle było“, rěka w lisće městu Kamjenc. Kamjenska Boršć kónči tradicionelnje přeco štwórtk.
Film wo zornowcu tež w serbšćinje
Budyšin (SN). Zemicy-Tumicy su přez mjezy Němskeje sławne za swoju tradiciju wudobywanja zornowca, wšako bě zornowc hižo w srjedźowěku požadana twaršćizna. W lěće 1845 pak dósta wón móhłrjec přez nóc nowu dimensiju: Za železnisku čaru Biskopicy–Budyšin měješe so 222 metrow dołhi a 17 metrow wysoki móst twarić. Blisko twarnišća załožichu tuž skału, hdźež hoberske mnóstwo kamjeni pačachu. 700 ludźi tu sčasami dźěłaše. Za połdra lěta bě impozantny móst, kaž jón dźensa znajemy, dotwarjeny.
Tehdy w Zemicach a Tumicach hišće Serbja bydlachu. Wučer a horliwy čłon Maćicy Serbskeje Jan Bohuwěr Mučink, kotryž bě 1845 šulu w Zemicach załožił, dźěći tež serbsce wučeše. Z nawalom cuzych dźěłaćerjow pak so kónčina doskónčnje přeněmči. Mučinka a jeho mnohostronski angažement – wón bě tež přirodowědnik, publicist a spisowaćel – sej w Zemicach dźensa hišće waža. Su dróhu we wsy po nim pomjenowali, a jeho row na pohrjebnišću gmejna swěru hlada.
Kaž na mnohich našich serbskich wjeskach camprowachu młodostni tež ...
Přikład Wojerecy
Přihotuja so na jutry
Wokrjes so z deficitom bědźi
Město wurunaneho budgeta změje Zhorjelski wokrjes w najlěpšim padźe dwójny budget 2023/2024, kotryž hodźi so přizwolić. To je komornik Thomas Gampe wčera w Zhorjelcu podšmórnył.
Zhorjelc (AK/SN). „Deficit wučinja – 2023 a 2024 – stajnje 43 milionow eurow. Wuměnjenje za to je zwyšenje wokrjesneho wotedawka wot 35 na 37 procentow. Bjez toho by lětny deficit 50 milionow eurow wučinił“, je komornik rozłožił.
Wokrjes Zhorjelc wysoki deficit sam zawinił njeje. Přičiny su wšelake. Tak su we wokrjesu wudawki za socialnu pomoc porno loni wo 17,9 milionow eurow stupali. Wokrjes dyrbi nimo toho Komunalnemu socialnemu zwjazkej wysoki wotedawk płaćić. Runje tak ma hladanja potrěbnych podpěrać, kotřiž swoje městno w hladarni z rentu zapłaćić njemóža. Te płaći mjeztym 2 500 do 3 000 eurow. „Telko renty nichtó njedóstanje. Jako wokrjes mamy chcyjo nochcyjo zaskočić“, Thomas Gampe wujasni.
Krótkopowěsće (02.02.23)
Protest krajny sejm dosćahnył
Drježdźany. Protest přećiwo wudobywanju šćerka w lěsu Łužničanskeje hole je wčera Sakski krajny sejm dosćahnył. W debaće wo klimyneutralnym twarjenju, nastorčenej wot Zelenych, je politikar Lěwicy Marco Böhme kritiku swojeje strony na předewzaću wobnowił. „Trěbne su nětko dialog a rozmołwy, zo njeby k namócnemu rumowanju přišło“, rjekny wón z widom na wobsadźerjow štomow.
Kemše za Alojsa Andrickeho
Drježdźany. Składnostnje 80. posmjertnin Alojsa Andrickeho so jutřiši pjatk w Drježdźanskej katedrali kemše z biskopom Heinrichom Timmereversom wotměja. Kapałnicy je hudźbnje wobrubja, na spočatku budźe modlitwa při relikwiji zbóžnoprajeneho martrarja w nabóčnym wobłuku cyrkwje. Kemše móžeš tež wot 18 hodź. na youtube-kanalu biskopstwa sćěhować.
Dom zaso „w čěskich rukach“
Z 2 859 dypkami 300. turněr dobył
Policija (01.02.23)
Přez WhatsApp seniora přelesćił
Podhladne powěsće přez powěsćowu słužbu WhatsApp je minjene dny něchtó z Ottendorfa-Okrille dóstał. Njeznate čisło wuda so jako syn tutoho. Wón jemu pisaše, zo by nowy handy měł a njeby hišće onlinebanking wužiwać móhł. Na to sćěhowaše próstwa, přepokazanku něhdźe 1 720 eurow přewzać. To zjebany tež sčini. Po tym zo bu jemu wobšudnistwo wědome, wobroći so wón na policiju. Kriminalna policija pad přepytuje a warnuje wospjet před tym, so na pjenježne žadanja pušćić. Njedawno započachu powěsće zwjetša z narěču „Witaj mama, halo papa“.
Lód z awta padnył
Spadowace lodowe a sněhowe skaliska su póndźelu rano małotransporter na A 4 mjez Delnim Wujězdom a Słonej Boršću wobškodźili. Zmjerznjene kruchi padnychu wot jěduceho Daimleroweho sedłoweho ćaha, kotryž bu wot 24lětneho wodźeny. Šofer njebě jězdźidło do zajězda jězby po wšěm zdaću porjadnje kontrolował. Na naslědnym małotransporteru nasta wěcna škoda něhdźe 500 eurow. Awtodróhowi policisća přiwzachu njezbožo a zhotowichu pokazku.
