Wodowe Hendrichecy. Serbske šulske towarstwo přeprošuje serbske dźěći a swójby, bydlace w Hornjej a Delnjej Łužicy, na zhromadny kónc tydźenja. Tón wotměwa so 21. do 24. oktobra w dźěćacym wočerstwjenišću Querxenland we Wodowych Hendrichecach. Lětsa steji zetkanje pod hesłom „Wódny muž na pućowanju“. Přinošk na swójbu z połnym zastaranjom wučinja 240 eurow. Přizjewjenja su hač do 14. oktobra 2022 pod mejlowej adresu móžne. Dalše informacije za zajimcow steja na webstronje SŠT.

Dalše šćěpjenje bórze móžne

Budyšin. Wot 4. oktobra budźe móžno so ze šćěpiwom šćěpić dać, kotrež je na wšelake omikron-warianty koronawirusa přiměrjene. Za to poskićeja šćěpiwo předewzaća BionNTech/Pfizer. Zo bychu čakanske časy pomjeńšili, su šćěpjenja jeno z předchadźacym terminowym dojednanjom přez onlinowy portal móžne, kaž Němski Čerwjeny křiž tele dny zdźěli. Rjadowanje płaći za wšitke prěnje, druhe abo dalše šćěpjenja. Terminy hodźa so knihować pod .

Třinarodny fachowy forum

Sulšecy (AK/SN). Hač do kónca tohole ­lěta město Kulow jako komuna swoje zličbowanki bjez nadhódnotoweho dawka wupisuje. „To budźe klětu hinak. Po postajenjach zakonjedawarja smy wi­nowaći wobrot wupokazać. Za nas płaća potom samsne předewzaćelske kajkosće kaž za priwatnych wukonowych přede­wzaćelow“, rozjasnjowaše komornik Mathias Kockert wutoru na posedźenju Kulowskeje měšćanskeje rady w Sulšecach. Na to reagujo změni město Kulow swoje wustawki wo wosebitym wuži­wanju, wohnjowobornych kóštach, wu­žiwanju sportowych připrawow, wikowe wustawki, kaž tež za lěsnu kupjel a dale tež te za postajenje parkowanskich popłatkow. Wobzamknjenja, kotrymž radźićeljo přihłosowachu, měrja so přede­wšěm na lěsnu kupjel, štož rěka, zo dyrbja za jeje wužiwanje zastupny pjenjez snadnje zwyšić. „Hižo mnohe lěta su ­zastupne płaćizny stabilne. Tuž móžemy zwyšenje zastu­pować“, tak Mathias ­Kockert. Město tam z ponowjenjom suwadła wulku inwesticiju realizuje. „A na te wašnje wobchowamy dobry standard“, tak komornik wuswětluje.

Wudwor (SN/MiR). Serbski folklorny ansambl Wudwor změje kónc tohole lěta nowe předsydstwo. Po tym, zo je předsyda towarstwa Syman Handrik zastojnstwo swojemu naměstnikej Ambrožej Handrikej dowěrił, ma so nowy předsyda a z tym cyłe nawodne mustwo ansambla wolić. „Sym zwólniwy, jako předsyda kandidować“, rjekny Ambrož Handrik, kiž je we wobłuku přihotow a přewjedźenja lětušeho jubilejneho swjedźenja Wudworčanow w Hórkach hłownu zamołwitosć njesł. Tónle swjatk ma wobsah čłonskeje a wólbneje zhromadźizny ke kóncej tohole lěta być.