Produkcija za awta wobmjezowana

pjatk, 27. měrca 2020 spisane wot:

Tuchwilne naprawy, spomalić rozšěrjenje koronawirusa, so tež na regionalnych dodawarjow awtomobilneje industrije wuskutkuja. Reakcije su přiwšěm rozdźělne.

Nadrózna Hrabowka/Kamjenc (UM/SN). Twornja klimowych kompresorow TDDK w Nadróznej Hrabowce je produkciju přetorhnyła. Spočatk tydźenja wu­tworjeny krizowy stab pak chce „njeparujomne funkcije“ zaručić, kaž firma zdźěla. To płaći mjez druhim za zličbowanje, informacisku technologiju kaž tež za přijimanje komponentow z Japanskeje. Wjetšina přistajenych „jednoho z najwažnišich dodawarjow awtomobilneje industrije, kotryž je mjeztym něhdźe 50 milionow kompresorow za nimale wšitke europske twornje jězdźidłow zhotowił“, nětko hižo wot póndźele njedźěła (SN rozprawjachu).

Poskićeja informacije a podpěru

štwórtk, 26. měrca 2020 spisane wot:

Zjawne žiwjenje hižo žane njeje. Zwjazk a knježerstwa krajow su wjele wobmjezowanjow postajili, zo móhli rozpřestrěću coronawirusa zadźěwać, tak tež sakske knježerstwo. Pytnjemy to we wšěch žiwjenskich wobłukach. Tež ­turistikarjo pod situaciju ćerpja.

Zły Komorow (SN/BŠe). We łužiskej jězorinje wuskutki naprawow jara začuwaja. Wosebje turistiska branša je potrjechena, a tak su hosćencarjo kaž poskićerjo chětro njewěsći. Turistiski zwjazk Łužiska jězorina je tuž informaciski poskitk na swojej internetnej stronje www.lausitzerseenland.de rozšěrił. W rubrice „serwis turistikarjam“ su prašenja a wotmołwy kaž tež wažne pokazki zestajane, tak zo móža so wšitcy hladajo na połoženje coronakrizy dla wobhonić. Předewšěm dźe tam wo pomoc hosćićelam a poskićerjam. „Informacije wobstajnje aktualizujemy“, zdźěli sobudźěłaćerka turistiskeho zwjazka Katja Wersch. Turistikarjo dóstawaja mjez druhim informacije nastupajo pjenježnu pomoc, personal, pře­- nocowanja a wotprajenje skazankow.

Chcedźa pomhać

štwórtk, 26. měrca 2020 spisane wot:

Zhorjelc (SN/BŠe). Pólska a Čěska chcetej so z nowymi naprawami před dalšim rozpřestrěćom coronawirusa škitać. Tak maja so ludźo, kotřiž chcedźa přez mjezu, do dwutydźenskeje karanteny podać. Za wobydlerjow Čěskeje płaći to wot dźensnišeho. Wot pjatka předwidźi to tež Pólska.

W Zhorjelskim wokrjesu maja w strowotnistwje mnohich sobudźěłaćerjow ze susodneju krajow. Wčera je tamniši krajnoradny zarjad připowědźił, zo chce po­trjechenym pomhać a za tych, kotřiž chcedźa dale do Zhorjelca na dźěło jězdźić, přenocowanske móžnosće pytać. Strowotniski wobłuk ma dźě dale kmany być ludźi zastarać. Zo bychu nětko najprjedy raz potrjebu zwěsćili, je Zhorjelski krajnoradny zarjad zwisk do wšěch strowotniskich institucijow nawjazał. Potrjecheni smědźa so tež sami na krajnoradnym zarjedźe přizjewić.

Zdźěla zawrjene

srjeda, 25. měrca 2020 spisane wot:
Budyšin/Wojerecy (SN/CoR). Filiale Budyskeje wokrjesneje lutowarnje su dale wotewrjene. Kupcy móža sobudźěłaćerjow tež telefonisce a z mejlku docpěć. Bankomaty su dale k dispoziciji. Wo­krjesna lutowarnja poruča, po móžnosći bjez kontakta z kartu abo smartfonom zapłaćić. Kaž ze stron Wuchodosakskeje lutowarnje Drježdźany rěka, we Wojerecach tuchwilu mocy zjednoćeja, zo móhli na centralnych stejnišćach wšitke posłužby zaručić. Štož chce ze sobudźěłaćerjom lutowarnje rěčeć, dyrbi we Wojerecach pak do Łužiskeje hale pak do stareho města. Filiale w Njedźichowje (Bernsdorf), Kulowje, Łutach a Łazu su dale wotewrjene. Wosobinsku serwisowu posłužbu pak poskićeja jenož hišće w Kulowje a we Wojerowskim starym měsće.

Často dźensniši čas słyšimy, zo je dale a mjenje lěkarjow. Na internetnej stronje Zjednoćenstwa kasowych lěkarjow nańdu zajimcy kopicu wupisanjow. Staj­nje so pacienća wjesela, hdyž su městna jich lěkarjow znowa wobsadźene.

Budyšin (SN/BŠe). Wobhladaš-li sej starobu mnohich lěkarjow, wosebje tež fachowych, spóznaješ, zo su wjacori hižo starši. Njezadźiwa tuž, zo so ludźo starosća, kak dołho drje praksa dale wob­steji. W padźe Budyskeje žónskeje lěkarki ­Galiny Vogt w tak mjenowanej poliklinice móža pacienća wodychnyć. Franciska Hejdušcyna z Róžanta je praksu spočatk lěta přewzała. Po dźěłowych stacijach w Drježdźanskej chorowni Nowe město, w Kamjenskej chorowni maltezow a w Drježdźanskej praksy žónskeho lěkarja je so 41lětna nětko rozsudźiła so zesamostatnić. Wosebje nazhonjenja w praksy su ju k tomu­ pohnuli. „Hladajo na samodruhe žony je chorownja často poslednja sta­cija, hdyž dźěćko porodźeja. Nětko móžu je wot spočatka do kónca přewodźeć“, mać třoch dźěći wuswětla.

Pandemija coronawirusa dla ma dale a wjetše wuskutki tež na hospodarstwo w Hornjej Łužicy. Byrnjež někotre twornje hišće dźěłali, su wjacore na njewěsty čas produkować přestali.

Kulow/Radwor/Nadrózna Hrabowka (SN/BŠe/JaW). Meblowy zawod Maja w Brěžkach mjeztym wuskutki coronawirusa bolostnje začuwa a je produkciju přetorhnył. To potrjechi nimale 900 sobudźěłaćerjow. Wotpowědnu dowolnosć za krótkodźěło, kotraž je nětko najprjedy raz na šěsć měsacow postajene, su zamołwići hižo minjeny štwórtk dźěłowej agenturje zapodali. Z naprawu chce nawodnistwo wupowědźenjam ze zawodnych přičin zadźěwać. Postupowanje bu ze zawodnej radu wotrěčane.

Hižo minjenu wutoru bě předewzaće IKEA wobzamknyło, wšitke swoje stejnišća w Němskej zawrěć. Za IKEA mjez druhim tež Kulowski zawod Maja přewažnje meble zhotowja. Tak je tež mjenje naprašowanjow za wudźěłkami.

Bliskowobchad dale zaručeny

štwórtk, 19. měrca 2020 spisane wot:

Drježdźany/Budyšin (SN/JaW). Regionalny bliskowobchad wostanje dale zaručeny. Wo tym informujetej wobchadny zwjazk Hornje Łobjo (VVO) a zaměrowy wobchadny zwjazk Hornja Łužica-Delnja Šleska (ZVON). „Tež hdyž su šule corona-pandemije dla wot srjedy zawrjene, płaći hač do kónca tydźenja regularny jězbny plan. Wot póndźele, 23. měrca, jězdźa naše busy po prózdninskim jězbnym planje. Wo dalšich změnach sčasom informujemy“, zdźěli nowinski rěčnik VVO Christian Schlemper. Jězbne plany su tež na internetnej stronje wobchadneho zwjazka www.vvo-online.de přistupne.

Agentura přihotowana

póndźela, 16. měrca 2020 spisane wot:

Budyšin (SN/BŠe). Zo móhli přistajenych w Němskej před bjezdźěłnosću lěpje škitać, je zwjazkowy sejm minjeny pjatk zakonske postajenja k mzdam za krótkodźěło wolóžił. Wot apryla budźe za předewzaća lóšo pjenjezy přez dźěłowu agenturu dóstać. Tak móža firmy hižo próstwu zapodać, jeli jenož 10 procentow přistajenych wupadnje, a nic, kaž dotal, jedna třećina sobudźěłaćerjow. Hladajo na coronawirus a z nim zwisowacy wupad sobudźěłaćerjow běchu nowe postajenja trěbne.

Kaž Budyska dźěłowa agentura zdźěli, je naprašowanje za mzdami při krótkodźěle minjene dny hižo přiběrało. „Statistiki pak tuchwilu žane njezestajamy“, rozkładźe nowinska rěčnica Berit Karsten. Dźeń a wjac předewzaćow so wo wu­měnjenjach wobhonja. Hladajo na přiběracu potrjebu informacijow firmam je agen­tura derje přihotowana. Nimo toho su wobšěrne informacije ke krótkodźěłu tež na internetnych stronach agentury wozjewjene. Stronu prawidłownje aktualizuja. Tež na stronach zwjazkoweho knježerstwa móža so zajimcy wobhonić. Wězo je tohorunja wosobinske abo telefoniske poradźowanje móžne.

Budyske pjekarske zjednoćenstwo je wčera na tudyšej powołanskej akademiji zjawne pruwowanje chlěba a całtow přewjedło. Dohromady 32 chlěbow a 17 całtow staj Michael Isensee z centralneho zwjazka němskich pjekarjow a Wjelećanski pjekar ­Markus Thonig po formje, napohledźe, strukturje, elastice, wóni a słodźe pruwowałoj. Dohromady 34 razow spožčištaj pru­wowarjej predikat „jara derje“, jědnaće razow predikat „derje“, štyri chlěby njejstaj mytowałoj. Foto: SN/Hanka Šěnec

26lětny Chróšćanski ratar hori so za ekologiske wobhospodarjenje polow

Biologisce plahowana běrna je strowa a ma jenož mało kalorijow. Wona je wy­sokohódnotny wudźěłk z rostlinskim bělkom, balastowymi a mineralnymi maćiznami kaž tež witaminami. Hladajo na plahowanje wuńdźe bjez chemisko-syntetiskich srědkow za rostlinoškit a hnojiwow. To rozeznawa ju wot konwencionalnje plahowanych, kotrež samo za čas składowanja wšelke chemikalije trjebaja. „To je za mnje absolutnje šokowace a za přetrjebarja njefairne, dokelž scyła wo tym informowany njeje“, měni ratar Ignac Wjesela z Chrósćic. Runje to­ho­dla je so wón rozsudźił plahowansku přestrjeń swojich bioběrnow jasnje powjetšić, zo by ludźom ekologisku a re­gionalnu alternatiwu poskićił. „Bioběrna je dobra inwesticija do strowoty“, 26lětny wujasnja. Wot dotal jednoho hektara rozšěri wón płoninu lětsa na něhdźe štyri hektary, hdźež budźe družiny Laura, Linda, Adretta, Belana, Goldmarie, Otolia, Wendi, Baltic Rose a zažnej družinje Anusch­ka a Corinna plahować.

nawěšk

SERBSKE NOWINY podpěruja:

Novi Sad – kulturna stolica Europy

  • Serbski komponist, hudźbnik a spěwar Měrćin Weclich je minjenu sobotu a njedźelu w Budyskim Kamjentnym domje přewšo wuspěšnje koncertował. Přeprosył bě sej za to mnohimi hosći kaž tež młodych talentow, kotřiž z nim zhromadnje na jewišću publikum zaho
  • Měrćin Weclich a Serbski młodźinski oktet - Martin Wetzlich und das Sorbische Jugendoktett
  • Měrćin Weclich a dźěćaca spěwna skupina Šumlabrum - Martin Wetzlich und die sorbischer Kindergesangsgruppe Schumlabrumm
  • Šumlabrum - Schumlabrumm
  • Šumlabrum - Schumlabrumm
  • Měrćin Weclich a młody hudźbnik Chrystof Mikławšk (wotprawa) – Martin Wetzlich und Christoph Mikwauschk (von rechts)
  • Jamila Hórnikec - Jamila Hornig
  • Matteo Hórnik - Matteo Hornig
  • Rejwarki a rejwarjo Serbskeho folklorneho ansambla Wudwor – Tänzerinnen und Tänzer des Sorbischen Folkloreensembles Wudwor
  • Live-hudźba je najlěpša - Live-Musik ist die allerbeste
  • Walentin Bjedrich při pianje - Valentin Bedrich am Piano
  • Kapała pod nawodom Malty Rogackeho (2. wotprawa) je live hudźiła - Malte Rogacki (2. von rechts) und Band spielten live
  • Měrćin Weclich a Měrko Brankačk (wotlěwa) – Martin Wetzlich und Mirko Brankatschk (von links)
  • Poradźenej kocnertaj - Zwei wirklich gelungene Konzerte

nowostki LND