Chrósćicy/Liberec (SN/MiR). Šulerjo a wučerjo Chróšćanskeje zakładneje šule „Jurij Chěžka“ wulećachu sej dźensa do susodneje Čěskeje. „Dóstach přeprošenje z Liberecskeje techniskeje uniwersity“, rjekny šulski nawoda Měrko Šmit. Kubłanišćo, kotrež wuprawu ze swójskich srědkow płaći, chce nawjazać wuske styki do Łužicy a pyta hižo dlěje za partnerom. W Chróšćanskej šuli su prěnjeho tajkeho namakali. Za chowancow šule přihotowachu sobudźěłaćerjo uniwersity, wosebje docent David Krčmařík, wopyt uniwersity. Předstajić chcychu šulerjam slědźenski projekt, awtonomne jězdźidło, na kotrymž tam tuchwilu slědźa. Po tym su dźěći zhromadnje ze šulerjemi Liberecskeje zakładneje šule Jabloňova spěwali a rejowali. Zdobom wotměchu małe wubědźowanje w spěwanju serbskich a čěskich pěsnjow. Na kóncu podachu so šulerjo hišće do woblubowaneho IQ-parka. „Mam dotal jónkrótny projekt za jara spomóžny. Wšako maja naši šulerjo wot 2. lětnika tydźensce hodźinu čěšćiny. Nadźijam so, zo su jim dźensniše dožiwjenja pohon, čěšćinu zaměrnje dale wuknyć“, praješe Měrko Šmit do wotjězda.

Ralbičanska wyša šula wobdźěla so ­hižo wjele lět wuspěšnje jako UNESCO-kubłanišćo na wšelakich projektach mjezynarodneho kaž tež regionalneho wuznama.

Projekt w runje zakónčacym so šulskim lěće je so tomu wěnował, zbližić sej moderne ratarstwo w boju mjez hospodarskim wuspěchom a dołhodobnym zachowanjom přiměrjenych hospodarskich formow. W přihoće na teoretiske a wosebje praktiske stronki přewjedźenja projekta je sej Ralbičanska UNESCO-skupina pod nawodom wučerja Michała Wałdy hromadźe z Lipšćanskej UNESCO-šulu Paula Robesona nastajiła naročny plan. W nim měješe so nimo wičnych mechanizmow přepytować tež globalizacija wikowanja ze skótnej picu.

Budyšin (SN/MiR). Měšćanska rallye po Budyšinje je dźensa młodostnych chětro wužadała. Šulerjo 7. do 9. lětnika Serbskeje wyšeje šule „Dr. Marja Grólmusec“ Radwor podachu so dopołdnja do wšelakich kóncow sprjewineho města. Přičina jich přebytka krótko do zakónčenja šulskeho lěta je, wopominać Jurja Brězana składnostnje jeho stotych posmjertnych narodnin. Nadawk, z kotrymž so młodostni zaběrachu, bě, spřistupnić sej žiwjenje a skutkowanje najskutkownišeho serbskeho spisowaćela w druhej połojcy 20. lětstotka.

Čěšćinarjo 8. lětnika Serbskeho gymnazija Budyšin su so lětsa na zwjazkowym wubědźowanju „Cuze rěče“ wobdźělili. Přewšo zbožowni nawróćichu so woni z mytowanja z 3. městnom.

30. meje 2016 běše skónčnje tak daloko: Po połdra lěće pilneho dźěła zhonichu šulerjo-čěšćinarjo 8. lětnika, zo su na mytowanje do Sakskeho krajneho sejma přeprošeni. Za wurisanje zapodali běchu woni swój film „Narodil se Kristus pán“ (Jězus je so narodźił). Myta přepoda šulerjam sakska ministerka za kubłanje Brunhild Kurth (CDU). 13 šulerjow bě so spočatk šulskeho lěta 2015/2016 rozsudźiło, so na zwjazkowym wubědźowanju cuzych rěčow w kategoriji „TEAM SCHULE“ wobdźělić. Nawod přewza Karoline Schreiter, a kóždy dósta swój nadawk a swoju rólu w scenariju. Projektej wěnowachmy jednu hodźinu tydźensce, tak zo běchmy hakle lětsa w januarje hotowi. Při tym jednaše so dospołnje wo šulerski projekt: Šulerjo wumyslichu sej sami dialogi a jednanje, Darius a Jacob staj wšitko z fotokameru natočiłoj a Jacob je cyły film zestajał. Wliw wučerki wobmjezowaše so na rěčne korektury dialogow, kotrež běchu wězo­ w čěšćinje.