Přizamknjenje připrawow za zelenu energiju we wuchodnej Sakskej problem
Budyšin (SN/MiP). Zakład za dołhodobne a spušćomne zastaranje ze zelenej energiju w Němskej je wutwar milinoweje syće a to w regionalnym kaž tež w nadregionalnym wobłuku. Hladajo na zaměr Zwjazka, podźěl zeleneje energije w kraju hač do lěta 2030 na znajmjeńša 80 procentow zwyšić, je jara zwjeselace, zo smy lětsa w oktobrje hižo podźěl 64 procentow docpěli (přehladka statistiskeho portala Statista). Za to pak dyrbi so syć wysokonapjećowych milinowodow za dodawanje miliny přez dołhe distancy wutwarić. Ale tež regionalna milinowa syć z niskim abo srjedźnym napjećom, kotrejž so nowe wětrnikowe abo fotowoltaikowe připrawy přizamknu, ma so rozšěrić.
Towarstwo Serbski kulturny turizm je minjene dny přewjedł wobšěrny fotoshooting, kotryž ma „wjelorakosći serbskeje drasty cyłeje Łužicy widźomnosć spožčeć“. Wšitke zwobraznjene wosoby pochadźeja z wotpowědneho regiona. Tak nastate motiwy „posrědkuja žiwu serbsku kulturu sprawnje a njefiltrowanu“, w zdźělence towarstwa rěka. W srjedźišću fotow steja detaile drasty a jich historiski wuznam. Z wobrazoweho materiala chcedźa pućowansku wustajeńcu kaž tež přehladku přewodźowacu wjacerěčnu brošurku wuwić. Projekt spěchuje Braniborske ministerstwo za wědomosć, slědźenje a kulturu. Foto: Pětr Brězan
Najebać pomocy tójšto hrajerjow prěnjeho koparskeho mustwa Sportoweje jednotki Chrósćicy njeje so Chróšćanskej koparskej rezerwje njedźelu w Hórkach dobyće poradźiło, na kotrež hižo dołho čakaja. Přećiwo hosćom z Lubuša woni 0:1 přěhrachu. Wot 13 dypkowych hrow je mustwo SJC II jenož jednu hru dobyło a jónu njerozsudnje hrało. Foto: Konstantin Hrjehor
Pomocnicy chowaja na kupje Sumatra w Indoneziskej wobydlerja, kiž bě při zahubnych zapławjenjach minjenych dnjow swoje žiwjenje přisadźił. Ličba smjertnych woporow je tam mjeztym na wjace hač 600 rozrostła, 460 ludźi je zhubjenych. Dny trajace zliwki běchu zapławjenja, lawiny błóta a zesuwanja zemje zawinowali. Foto: dpa/Ade Yuandha
W Slepjanskej cyrkwi je fararka Jadwiga Malinkowa prěnju adwentnu njedźelu lětuše Slepjanske dźěćetko wužohnowała, a to zastupujo za wšitke tamne dźěćetka wosady. Po kemšach požohnowa dźěćetko najprjedy wšitkich małych kemšerjow a po tym wšitkich dorosćenych. Hač do štwórteho adwenta dźěćetko mnohe zarjadowanja wopytuje a wobydlerjow z trójnym majkanjom požohnuje. Foto: Jost Schmidtchen
Cyril Pjech podawa swoje měnjenje k diskusiji wo censurje: Srjedu, 26. nowembra, čitachmy w Serbskich Nowinach hłowny nastawk wo temje „Censura a milion hriwnow“. W nim praji so mjez druhim, zo je to poprawom přepozdźe, hakle nětko wo tym rěčeć, dokelž je wjetšina časowych swědkow hižo njekmana so wuprajić.Ja njejsym jenož časowy swědk, ale takrjec direktnje potrjecheny, dokelž běch redaktor ewangelskeho časopisa Pomhaj Bóh. Běch tehdom farar w Riesy a na zbožo jězdźeše tehdom kóždy dźeń bus z Riesy do Budyšina, dawach manuskripty z nim sobu a Wórša Bryckec, sekretarka šeflektora Pawoła Völkela, je tam wotewza. Wona da je censorej, kotrehož wězo tež mějach a tohodla chcu swoje nazhonjenja z nim tu přinošować:
Budyšin (SN/mb). Zwjazkowe předsydstwo (ZP) Domowiny so pjatk we Wuměłstwowej hali w Choćebuzu na swoje 3. posedźenje tuteje wólbneje periody zeńdźe. Wot 17.30 hodź. móže zjawnosć zajimawe temy pak tam, pak na youtube-kanalu @DomowinaBudysin přez livestream sćěhować. Na spočatku chcetaj nawodnica Rěčneho centruma Witaj dr. Beata Brězanowa a Choćebuski wotrjadnik Bernd Melcher „młodej ekscelency w delnjoserbšćinje“ zaso wosebite připóznaće přepodać. Tomu přizamknu so mjez druhim informacija wo widejowym projekće za wjelorakosć w Delnjej Łužicy a wólby mytowanskeho wuběrka třěšneho zwjazka za dobu 2026-2029. Wjeršk budźe tema „Serbske rěčne kubłanje na šulach Sakskeje“, za kotruž su cyłu hodźinu do přestawki zaplanowali.
