Turbulentne poslednje posedźenje Budyskeho wokrjesneho sejmika
Budyšin (SN/MG). Swoje poslednje posedźenje lěta 2025 wužichu radźićelki a radźićeljo Budyskeho wokrjesneho sejmika, zo bychu chětro wulku kopicu temow wotdźěłali.
Najwjetšu diskusiju drje je nowy integraciski koncept wokrjesa wuwabił. Tutón bě krajny rada Udo Witschas (CDU) sejmikej wčera k schwalenju předpołožił. K tomu pak njedóńdźe. Kritiku běchu wšelke frakcije rozdźělnje sformulowali. Tak rjekny na přikład Holm Große z frakcije Swobodnych wolerjow: „To njeje koncept, ale skerje proste zwuraznjenje wotpohladow.“ Ze stron frakcije AfD rěčeše radźićel Frank Peschel wo njetrjebawšim koncepće. Jako přikład hižo wobstejaceje integracije a mnohotnosće wón zhromadne žiwjenje Serbow a Němcow we Łužicy mjenowaše. Na namjet frakcije BSW nětko najprjedy dale we wuběrkach sejmika wo koncepće wuradźuja.
Feliks Cyž a Maksimilian Kral-Zahrodnik (wotlěwa), nowa trenarska dwójka prěnjeho koparskeho mustwa SJ Chrósćicy, wobkedźbujetaj na Hórčanskim sportnišću hru swojich chowancow. Za njeju bě to prěnja hra při liniji. Před dobrymi 100 přihladowarjemi docpě Luca Hempel za hosći z Bukec nawjedowanje 1:0 (35.). Gabriel Zahrodnik krótko po tym na 1:1 (38.) wuruna. Foto: Konstantin Hrjehor
Mjez Thailandskej a Kambodźu su nowe wojerske rozestajenja wudyrili. W pomjeznej kónčinje, kaž tule w thailandskej prowincy Buriram, dyrbja wobydlerjo tuž w prowizoriskich přebywanišćach žiworić. Přičina konflikta je starodawna zwada wo mjezy mjez krajomaj. Thailandska a Kambodźa so mjez sobu eskalacije dla wobwinujetej. Foto: dpa/Prajoub Sukprom
Njewšědnu atrakciju skićachu minjenu njedźelu adwentne wiki w Barće. Tam so dźěći na wjerinym karuselu rozwjeselachu. Dorosćeni wšak so skerje za kulinariske poskitki zajimowachu. Te sahachu wot madźarskeho wina přez sušenu rybu hač k specialitam dźiwizny. Foto: Jurij Helgest
Radwor (SN/BŠe). Na Radworskim dwórnišću so koło zarjadowanjow dale wjerći. Dokelž so wone hižo dlěje jako socialna městnosć njespěchuje, je so dwórnišćo za druhimi pjenježnymi žórłami rozhladowało. Stajichu próstwu wo spěchowanje we wobłuku Leader-programa Hornjołužiska hola a haty. Tema próstwy bě: Rjemjesło dožiwjeć a wožiwjeć. W tymle zwisku móžeše towarstwo Radworskeho dwórnišća inkluzije wosobu přistajić, kotraž zarjadowanja z tymle ćežišćom organizuje. „Po kwartalach so nětko z rjemjesłami rozestajamy“, předsydka towarstwa Raphaela Wićazowa wuswětla.
Dominik Měrćink z Wotrowa je njedawno wuspěšnje swoje wukubłanje jako ćěsliski mišter wotzamknył. Lisa-Maria Cyžec je so z nim wo wužadanjach w běhu wukubłanja a zaměrach w přichodźe rozmołwjała.Što bě za Tebje najwjetše wužadanje na puću k ćěsliskemu mištrej?D. Měrćink: To najćeše bě, so zaso wróćo do wšědneho šulskeho dnja namakać. Běch zwučeny, wonka na čerstwym powětře ćělnje dźěłać a nadobo sedźach zaso w rjadowni. Stajnje so koncentrować dyrbjeć, ćělnje wućeženy njebyć a přiwšěm kóždy dźeń sto procentow dać, to je mi jara ćežko padnyło. Po času pak sym so na to zwučił a nawuknył, so tež w šuli wo to najlěpše prócować.Kotry wokomik w swojim wukubłanju na mištra je Ći wosebje w pomjatku zwostał?D. Měrćink: Wosebje rjana bě za mnje wuměna ze swojimi sobušulerjemi. Smy wo swojim dźěle rěčeli, diskutowali a rozdźělne widy zeznali. Kóždy bě hinašeho měnjenja – a runje to bě napjate. Tute rozmołwy su mje fachowje a wosobinsce dale přinjesli.Što Će na ćěsliskim rjemjesle fascinuje? ...
