Foto: SN/Maćij Bulank

Kedźbu! Za nańdźenje serbskeho wotpowědnika za němski politkonstrukt „GroKo“, nu­­znje trěbneho za zrozumliwu ko­mu­ni­kaciju, bě Rěba wurjadnu pre­miju 1 000 eurow wupisała. Byrnjež sej eks­perća – rěčespytnicy, spisowaćeljo, basnicy, nowinarjo – a k tomu kopica za­jimowanych lajkow hłowu łamali, na su­pertwjerdym worjechu „GroKo“ su sej zuby wuku­sali. Dokelž ani jenički na­mjet dóšoł nje­bě, Rěba wubě­dźo­­­wanje podlě­ša. Nje­skupemu sło­wjanskemu do­­bro­ćelej z wuhloweje branše dźa­ko­wano móže ini­ciator dotaciju sa­mo na 1 500 eurow zwyšić.
Za „najhłupiše słowo lěta“ ma Rěba nowotarski terminus „kmótřow“ – Hotoweho přeměnka wulahnył je Serbski rozhłós a prapremjernje nałožił za pluraletantum femininum w teksće powěsće „Prěni raz maja woni kmótow a …třow“. Žałostnje hóršili su so „kmótry“.
Syn praša so nana: „Nanko, što je po­prawom politika?“ Na to rjeknje nan: „Mój luby, to je cyle jednore. Hladaj raz, ja přinjesu pjenje­zy domoj, sym po­taj­kim KAPITALIZM. Twoja mać wo pjenjezach roz­­sudźa, da je wona KNJEŽER­STWO. Twój dźěd na to kedźbuje, zo ma tu wšitko swój porjad, potajkim je wón DŹĚŁARNISTWO.

Luby Helmuto Kohlo,

to šće běchu časy: Jako sće w lěću 1991 Ra­dwor wopytał, bě tam cyła wjes na nohach. Kaž tajkeho zbóžnika was witachu, samo w serbskej narodnej drasće. Wšitcy chcychu muža widźeć, kiž bě znowazjednoćenje Němskeje zwoprawdźił a kotryž lubješe kćějate krajiny. Nalada njemóžeše lěpša być. Po wobjedźe w hosćencu „Meja“ pola tehdyšeho korčmarja Měrćina Wagnera sće do swojeho helikoptera zalězł, kiž při puću do Bronja steješe. Sće ludźom hišće raz kiwał a wotlećał. Ludźo su hišće dołho wo podawku rěčeli, a starši Radworčenjo to hač do dźensnišeho činja.

Mjeztym pak je wjele lět zašło. Mamy generaciju młodych ludźi, kotřiž su Waše mjeno snano raz słyšeli, bjeztoho zo móhli wjele z nim započeć. A ta wěc z tymi kćěja­tymi krajinami wšak so tež tak prawje radźiła njeje. Znajmjeńša hodźi so wo tym diskutować.

měrc

Hłowna zhromadźizna Domowiny 30. měrca w Chróšćanskej „Jednoće“ wotměje so pod wosebje krutymi wěstotnymi na­prawami. Dokelž liča ze stron Serbskeho sejma z masiwnymi nadběhowanjemi, je so zarjadnistwo třěšneho zwjazka za runje tak njewšědne kaž zajimawe škitne za­dźěwki rozsudźiło. Podobnje kaž na Budyskich adwentnych wikach, hdźež nastaja betonowe štomiki, chcedźa wokoło „Jednoty“ betonowe chorhojčki w serb­skich barbach nastajić. Te móhł pozdźišo tohorunja Serbski sejm wužiwać.

februar

Po tym zo su twarske dźěła na křižowanišću před Radworskim kěrchowom za­hajili, wutworichu tam wobydlersku ini­ciatiwu. Jeje zaměr je, zo ma so po skón­čenju projekta zachować prowizoriska wobjězdka, kotraž za čas twarskich dźěłow nadróžny wobchad wokoło wsy wodźi. To by wobchadne połoženje we wsy chětro wolóžiło. Namjet su sej Radworčenjo takrjec wot wobydlerjow Pančic-Kukowa wot­hladali. Tam bychu tohorunja wobjězdku wokoło twarnišća noweho mosta zdźer­želi, štož pak so bohužel njeporadźi.

januar