W srjedźišću njedawneho fachoweho schadźowanja we Wostrowcu steješe susodorěčne kubłanje w Sakskej. Ale tež připóznaće powołanskeho zakónčenja maćernorěčnikow je rólu hrało.
Wostrowc. Pólšćina a čěšćina w pomjeznym rumje Sakskeje trjebatej systematiske spěchowanje a wuwiće kwality wot zažneje dźěćaceje staroby. „Pobrachuje dale wědomostnje fundowany koncept, na kotrymž móhli dźěło w dźěćacych dnjowych přebywanišćach wusměrić“, podšmórny dr. Regina Gellrich, nawodnica Sakskeho krajneho centruma za zažne susodorěčne kubłanje na njedawnym schadźowanju we Wostrowcu. „Z projektom Witaj mamy w serbskim wobłuku derje praktikowany přikład. Chcemy wjele z toho wuknyć a přenjesć.“ W Mjezynarodnym zetkawanišću klóšter Marijiny doł wobjednachu temu „Po puću k rěči susoda wot wšeho spočatka w pomjeznych regionach Sakskeje“. Kubłarki, wučerki, wědomostnicy, studenća z Němskeje, Pólskeje, Čěskeje a Awstriskeje kaž tež zastupjerjo z kubłanja, kultury, politiki a zarjadnistwa so wobdźělichu.
Gratulujemy maturantam
a šulskim wotchadnikam
2015
Budyšin (BW/SN). Z powołanskimi móžnosćemi w serbskich institucijach w Budyskim Serbskim domje zeznajomichu so wčera holcy Serbskeje wyšeje šule Ralbicy. K tomu mějachu cyłe dopołdnjo chwile. Jednaćel Domowiny Bjarnat Cyž a zamołwita za serbske naležnosće Budyskeho wokrjesa Regina Krawcowa móžeštaj dohromady dźewjeć holcow witać.
Po krótkim wodźenju po Serbskim domje rozdźělichu so holcy do mjeńšich skupinkow. W Domowinskim zarjedźe nadźěłachu wone mjez druhim nowinsku zdźělenku, wobdźěłachu swójske fota a zestajichu plakat z krótkim tekstom wo tymle holčim dnju.
W Rěčnym centrumje WITAJ spřistupnichu sej powołanje lektorki a widźachu, kak serbske wučbnicy nastawaja. Nimo toho naćisnychu plakat za sportowu wučbu, zeznachu dźěło na wosebitej app wo powołanjach, spisachu krótki tekst za Płomjo a přełožichu za rěč spěchowace dźěło w pěstowarni zabawnu hru z němčiny do serbšćiny.