Budyšin (SN/BŠe). Budyske předewzaće Zahrodna technika Lehmann bu předwčerawšim z mytom „Motorist lěta 2019“ wuznamjenjene. Kaž šefredaktor nowiny Motorist Martin Brandt rozłoži, měješe jury mjez namjetami z cyłeje Němskeje rozsudźić. „Na kwalitu orientowane wikowanje a reparowanje zahrodneje techniki Budyskeho předewzaća je nas přeswědčiło“, wón wuzběhny. Nimo toho zasadźa so mějićel Lars Lehmann we wšelakorych gremijach Němskeje za regionalne předewzaća, hdźež jim rjap skruća. „Konkurenca z interneta je wulka. Je tuž jara wažne fachowych wikowarjow podpěrać“, wón zwurazni. Samo­zrozumliwje wobdźěla so na fachowych zarjadowanjach, kaž je to kongres motoristow w februaru. „Tam dźe wo to, syće wutworić, sej mjez sobu mysle a nazhonjenja wuměnjeć a so z nowosćemi na wikach zeznajomić“, Lehmann rozłoži.

Choćebuz (SN). Zasadźenske móžnosće a šansy na wikach wodźika jako alternatiwneje formy ćěrjenja busow, železnicy a pola awtomobilneje dodawanskeje industrije je wjace hač 70 předewzaćelow a wědomostnikow wčera w Choćebuskej Industrijnej a wikowanskej komorje (IHK) rozjimało. Zdobom předstajichu sep žadanjow nastupajo polěpšenje zjawneho wosoboweho wobchada we Łužicy.

Kaž IHK informuje, sadźa Łužica we wobłuku strukturneje změny na „paliwowu bańku a wodźik jako technologiju přichoda“. Za dwaj wodźikowej projektaj w Choćebuzu we wobłuku „hnydomneho programa za strukturnu změnu“ spěchowanskej připrajeni hižo předležitej.

Zamołwići su přeswědčeni, zo energijowy přewrót wodźikej jako nošakej energije cyle nowy wuznam posrědkuje.

Hóznica (JoS/SN). Wiki tak mjenowanych koi-karpow minjeny kónc tydźenja bě za rybarske předewzaće Armina Kittnera w Hóznicy (Petershain) pola Niskeje takrjec dwójne žohnowanje. Skónčnje je so zaso raz trochu wjace a wobstajnje dešćowało. A najebać dešćik je sobotu tójšto zajimcow přijěło, zo bychu sej wosebite koi-ryby a dalše eksemplary za swoje zahrodowe a hinaše haty wobstarali.

Armin Kittner je nazhonity rybar, ale wuskutki horcoty a suchoty minjeneho lěta njeje hišće tak prawje předźěłał. A hižo prašeja so wón a jeho kolegojo, što drje lětsa budźe. Prognozy za hatarjow předobre njejsu. „Hižo nětko, něhdźe šěsć tydźenjow prjedy hač loni, mamy samsny njespokojacy staw“, Kittner rozłoži. „Dokelž w zymje přewjele sněha njebě, njemóžeše tež žadyn tać, a w aprylu njeběchu nimale žane spadki. Mjeztym je přidatna woda w hatach, kotrež smy w zymje sčasom napjelnili, nimale zaso pře­trjebana.“ Nětko samo wodu z hrjebjow do hatow klumpaja. Hdyž pak tež w hrjebjach ničo njeje, je kónc.