Budźe to hišće „horcy adwent“

štwórtk, 08. decembera 2016 spisane wot:

Sobudźěłaćerjo wulkich znatych hosćencow, kaž Mc Donalds, w Budyskim wokrjesu njetrjebaja so nadźijeć, zo wot noweho lěta wjace mzdy dóstanu hač hranicu 8,85 eurow na hodźinu.

Budyšin (SN/BŠe). Zwjazkowe zjednoćenstwo systemoweje gastronomije (BdS), ke kotrymž tež marki Burger King, Nordsee abo Mc Donalds słušeja, so w tuchwilnym tarifowym kole raznje spjećuja swojim sobudźěłaćerjam wjace mzdy płaćić. Tole zdźěli dźěłarnistwo za zežiwjenje a hosćency (NGG). Po jeho měnjenju měli přistajeni wjace pjenjez hač tuchwilnu minimalnu mzdu za swoje dźěło dóstać. Jeli dźěłodawarjo skónčnje akceptabelny poskitk njepředpołoža, budźe to za nich hišće „horcy adwent“, kaž NGG zdźěli. Dźěłarnistwo planuje protestne akcije we wjacorych městach. Přiwšěm je NGG dale zwólniwe z dźěłodawarjemi jednać.

Region wuspěšnje zwičnić

srjeda, 07. decembera 2016 spisane wot:

Marketingowa towaršnosć Hornja Łužica-Delnja Šleska chce region wuspěšnje zwičnić. Za to bě nowy logo – spóznajomna třěšna marka – nuznje trěbny. Wčera su wuslědk wubědźowanja agenturow zjawnje předstajili.

Hdźe je čěski wid?

wutora, 06. decembera 2016 spisane wot:
Turbulentne bě lěto we łužiskim brunicowym rewěrje. Tak dósta sparta noweho mějićela, čehoždla je so tež mjeno předewzaća změniło. Wot spočatka oktobra – to njeje ani hišće sto dnjow – stara so firma Łužiske hórnistwo a łužiske milinarnje AG (LEAG) wo zmilinjenje brunicy. Tak njeje LEAG jenož łužisku brunicowu spartu přewzało, ale tež tradicije. Wčera přeprosy koncern do Choćebuskeje měšćanskeje hale, hdźež wotměchu kóždolětny Borboriny swjedźeń. Nimo wjele politiskeje prominency z komunow, krajneju parlamentow Sakskeje a Braniborskeje kaž tež zapósłancow zwjazkoweho sejma bě tam tohorunja zastupjer čěskeho přede­wzaća EPH. Škoda, zo njeje so wón zjawnje słowa jimał. Hłownje bě nawoda předsydstwa LEAG dr. Helmar Rendez wo přichodźe brunicoweho rewěra rěčał. Mje pak by tež wid čěskeho koncerna zajimo­- wał. Bianka Šeferowa

Rjemjesło skići młodostnym perspektiwu

štwórtk, 01. decembera 2016 spisane wot:

Drježdźany/Budyšin (SN). Pozitiwny trend na wukubłanskich wikach we wuchodnej Sakskej dale postupuje. Tak je dotal 546 młodych žonow a 1 440 muži wukubłanske zrěčenje w Drježdźanskim komornym wobwodźe podpisało. Cyłkownje 1 986 nowych wukubłanskich zrěčenjow woznamjenja porno lońšemu plus 1,6 procentow. Tak je so dobry wuslědk zašłeho lěta znowa stopnjował. „Ličby­ pokazuja, zo so wulka próca rjemjeslniskich předewzaćow, zjednoćenstwow a rjemjeslniskeje komory wo šulskich wotchadnikow wudani. Dale a wjac powołanskich započatkarjow spóznawa, zo je na wuchodźe Němskeje dosć atraktiwnych dźěłodawarjow“, wuswětla hłowny jednaćel Drježdźanskeje rjemjeslni­skeje komory dr. Andreas Brzezinski.

Rjemjesło je w regionalnym hospodarstwje kruće zakótwjene a skići młodym ludźom jara dobru powołansku perspektiwu w domiznje.

Njech so poradźi!

štwórtk, 01. decembera 2016 spisane wot:
Wojerowske stare město ma ćeže z imagom. Předewšěm dźě ludźo Łužiskeho centera dla do Wojerec jězdźa. Lědma něchtó z Budyšina a Kamjenca by na to přišoł, w tym zwisku w tamnšim starym měsće nakupować. Mnozy Wojerowscy wobydlerjo sami přiznawaja, zo njejsu tam dołho wjac byli. Jeli pak so do stareho města tola raz dóstanu, dyrbja přiznać, zo bu tam wjele pjenjez inwestowane. Rjenje saněrowane domy su rjana idylka. Tole so často njepřipóznawa. Wojerowski cityjowy management pyta za idejemi, město wožiwić, a ma tež hižo dokładne plany. Wosebje rjemjeslniske předewzaća a tak mjenowane showowe wobchody bychu so tam hodźeli. Konkretne to předstawy, kotrež chcedźa zwoprawdźić. Nětko su samo čěskim wikowarjam stare město zbližili. Iniciatiwa, so wšelakim partneram wote­wrěć a po nowych pućach kročić, je prawa. Njech so poradźi! Bianka Šeferowa

Statistiski zarjad swobodneho stata w Kamjencu wobydlersku statistiku předstajił

Statistiski zarjad Swobodneho stata Sakskeje w Kamjencu wobliča a prezentuje najwšelakoriše statistiki. W prawidłownych wotstawkach předstaja tež tak mjenowane regionalizowane předwobličenje wobydlerstwa (re­gio­nalisierte Bevölkerungsvorausberechnung). Najaktualniše, mjeztym hižo šeste, je prezident zarjada Burkhard Müller kónc oktobra na hospodarskim forumje w Kamjencu rozłožił.

Wuslědki předwobličenja wupokazuja wosebite, nimale struchłe wuwiće sakskeho wobydlerstwa hač do lěta 2030. Wuchadźejo z aktualneho demografiskeho trenda a strukturow skedźbnja statistika na změny w ličbje a starobje wobydlerstwa. Nimo wuskutkow na cyłu Saksku, wokrjesy a města poćahuje so wobličenje tež na wsach z wjac hač 50 wobydlerjemi kaž tež za přikłady za wu­zwolene planowanske regiony. Zakład wobličenja su ličby sakskeho wobydlerstwa z 31. decembra 2014.

Ličba wobydlerjow

pomałšo woteběra

Chcedźa zhromadnje diskutować

srjeda, 30. nowembera 2016 spisane wot:

Grodk/Čorna Pumpa (SN/BŠe). Łužiski kruh chce 9. decembra w Čornej Pumpje přewjesć konferencu pod hesłom „Rewěrowy transfer Łužica“. Wěnować chcedźa so klimoškitnym zaměram a strukturnej změnje we łužiskim brunicowym regionje. Za to měło so zrozumjenje budźić. Tak nochcedźa akterojo jenož nadawki rozjimać, ale tež wo inowatiwnych šansach rozmyslować.

Na zarjadowanje přeprosył je sej Łužiski kruh sakskeho hospodarskeho ministra Martina Duliga (SPD). Ministerialny direktor dr. Wolfgang Scheremet, kiž nawjeduje wotrjad industrijneje politiki zwjazkoweho ministerstwa za hospodarstwo a energiju, chce móžnosće k docpěću klimoškitnych zaměrow rozłožić a z nimi zwisowace wužadanja na łužiski region wuswětlić. Zastupjer Europskeje komisije w Němskej Richard Nikolaus Küh­nel wěnuje so temje europski modelowy region. Z tajkim so stać dźě je zaměr zastupjerjow Łužiskeho kruha.

Něšto wjace bjezdźěłnych

srjeda, 30. nowembera 2016 spisane wot:

Budyšin (CK/SN). W nowembru bě we wuchodnej Sakskej 21 512 žonow a muži bjez dźěła, 51 wjac hač měsac do toho­.

Agentura za dźěło je drje hižo prěnje přizjewjenja bjezdźěłnosće w sezonowych powołanjach registrowała, kaž na přikład ze zahrodniskeje a krajinotwarskeje branše kaž tež z twarstwa. Přiwšěm pak wosta za počas wočakowany rozrost ličby bjezdźěłnych w nowembrje dźakowano tuchwilnemu miłemu wjedru dotal snadny. Tole rozłoži dźensa dopoł­dnja Ilona Winge-Paul z nawodnistwa Budyskeje dźěłoweje agentury.

W samsnym času před lětom bě hišće 3 411 wosobow wjace wot bjezdźěłnosće potrjechenych. Bjezdźěłnostna kwota po cyłej Hornjej Łužicy je, kaž hižo w oktobru, dale 7,5 procentow. Wona pak chabła mjez 4,1 procentom w Radebergu a 8,9 procen­tami w Běłej Wodźe. Jeničce město Zhorjelc slěduje z chětro jasnym wotstawkom jako jenički wobwod w regionje z dwucyfrowej kwotu 11,9 procentow bjezdźěłnosće.

„To je skandal!“

pjatk, 25. nowembera 2016 spisane wot:

Budyšin (SN). Pjekarjo a jich přistajeni w Budyskim wokrjesu hubjenje zasłužeja. Tole kritizuje dźensa dźěłarnistwo, zamołwite za zežiwidła a hosćency (NGG). „Mnozy z něhdźe 1 570 přistajenych dóstawaja minimalnu mzdu 8,50 eurow na hodźinu“, zdźěli jednaćel NGG Drježdźany-Kamjenica Volkmar Heinrich. Mnohe pjekarnje žadaja sej za swoje wudźěłki wjace pjenjez, přistajeni pak z toho njeprofituja.

Dźěłarnistwo NGG chce nětko ofensiwu zahajić. „Mzda na hodźinu měła jasnje postupić – na dwě městnje před komu. Štóž nětko mjenje zasłuža, njedóstanje pozdźišo dosć renty a ma so přidatnje wo Hartz IV prócować. To je skandal“, Volkmar Heinrich podšmórny. Wón pjekarjow a přistajenych namołwja wjetši ćišć wukonjeć a so krajnemu pjekarskemu zjednoćenstwu Saxonia přizamknyć, kotrež prócuje so wo mzdowe tarifowe zrěčenje. „Najwyši sakscy pjekarjo so tomu dotal spjećuja a nochcedźa wjace wo mzdach jednać. Štož při tym ignoruja, je, zo zniča tak image branše a přichod pjekarnjow“, Volkmar Heinrich wuswětli. Dawno hižo maja pjekarjo ćeže dorost nańć.

Zjawne inwesticije wabja

štwórtk, 24. nowembera 2016 spisane wot:

Rań (AK/SN). Wuwiće łužiskeje jězoriny žada sej wot komunow, zo do přichoda mysla. „Zjawnych inwesticijow do infrastruktury dla je so mnoho priwatnikow rozsudźiło sobu ćahnyć. To dźě je zaměr“, podšmórny Złokomorowski měšćanosta Andreas Fredrich na njedawnej regionalnej konferency na temu „Dokal jězba póńdźe – z rozumom k cilej“. Wot julija ma Zły Komorow status statnje připóznateho­ wočerstwjenišća.

Dołhodobne inwesticije, kaž měšćanski přistaw, za kotrež su něhdźe dwanaće milionow eurow nałožili, a wjele dalšich projektow su komisiju přeswědčili. Runje tak wažnej stej turistiska kwalita a bjezbarjernosć. Po informacijach Złokomorowskeho zarjada za hospodarske spěchowanje zličichu loni 296 000 přenocowanjow w přebywanišćach z wjace hač dźewjeć łožemi. Dalši hosćo přebywachu w mjeńšich prózdninskich domach. Cyłkownje wostawaja wopytowarjo 3,9 dnjow w měsće, z čimž Zły Komorow braniborsku statistiku nawjeduje.

nawěšk

nowostki LND