Připóznaće za kolesowarske tury
Dowolnicy we Łužicy prašeja so za dale a wjace kolesowanskimi móžnosćemi. Łužiscy turistikarjo su tuž wužadani a reaguja z naprawami.
Zły Komorow (AK/SN). Dźeń a wjetšeho naprašowanja za poskitkami kolesowanja dla chce turistiski zwjazk Łužiska jězorina zajimcow sylnišo do kraja jězorow wabić. „Tohodla smy so rozsudźili nimale rozebranu brošurku k jězorinowej čarje znowa nakładować“, podšmórnje zamołwita za zjawnostne dźěło a marketing zwjazka Katja Wersch. „Kolesowarjam přichileni poskićerjo přenocowanjow, gastronomojo a přenajerjo kolesow podłu čary kaž tež poskićowarjo kolesowanskich pućowanjow móža so nětko wo zapis do njeje prócować.“
Dźe wo tarify
Kamjenc (SN/JaW). Baterijowa twornja Deutsche Accumotive w Kamjencu a dźěłarnistwo IG metal stej wčera jednanja wo tarifowych zrěčenjach zahajili. Kaž zdźěli dźěłarnistwowa sekretarka Eileen Müller wuchodosakskeje wotnožki IG metal w Budyšinje, stej sej stronje přezjednej, stejnišćo w Lessingowym měsće skrućić a na přichod wusměrić. „Předstawy wobeju partnerow pak su hišće daloko wot so zdalene“, rěka w nowinskej zdźělence. „Ćim bóle zwjesela, zo móžachmy so na to dojednać, spěšnje a bjez haćenjow jednać. Dalše tři jednanske terminy we wotstawku maksimalnje dweju do třoch tydźenjow su hižo jasne“, rjekny prěni społnomócnjeny dźěłarnistwa za wuchod Sakskeje Jan Otto.
Z restawrowanjom wudźěłkow stawizny zachować
Na wopyće w dźěłarni blidarja a hladarja pomnikow Krystofa Žura
Při hłownym wjesnym puću wosrjedź Chrósćic pokazuje tafla z napisom „Denkmalpflege Sauer GmbH & Co.KG – www.denkmalpflege-sauer.de“ (Hladanje pomnikow Žur) na to, zo je w bywšim Čornakec zežiwidłowym wobchodźe zaměstnjena blidarnja, specializowana na hladanje pomnikow. Wo wobchodźe njeje w nětčišej wulkej dźěłarni-blidarni ničo wjace widźeć. Wjacore mašiny – wšelake piły, frezawy, pačidła a dalše za blidarja wažne nastroje a dźěłowe graty – a po rumnosći składźene deski, dźěłarnju wupjelnjeja. Wóń sucheho drjewa chójny ći do nosa stupa. Zdobom čuješ tež wóń lěpka, kotryž blidarjo za swoje dźěło wužiwaja.
Z wuslědkom spokojom
Wokrjesna lutowarnja zhladuje na dobre hospodarske lěto
Budyšin (SN/BŠe). Wokrjesna lutowarnja Budyšin ma wobstajnje nowe wužadanja zmištrować. Nimale dźesać lět hižo traje doba niskich danjow. Za klientow čujomny bě nowy datowy škit. „Zo je so wuslědk danjow pjenježneje politiki Europskeje centralneje banki pomjeńšił, smy wočakowali. Tohodla smy ze zawodnym wuslědkom 4,3 milionow eurow spokojom“, zdźěli nawoda předsydstwa Budyskeje wokrjesneje lutowarnje Dirk Albers. Hladajo na ćežke wiki je so pjenježnemu institutej poradźiło filialnu syć wobchować, štož sej klienća jara wažna. Mjeztym maja wšitke filiale moderne wuhotowanje z internetnym přistupom WLANom.
Přemysłowe płoniny trěbne
Choćebuz/Podstupim (SN). Po zakónčenju wudobywanja brunicy a w slědowacej strukturnej změnje trjeba Łužica přemysłowe přestrjenje za móžnych inwestorow. Tohodla chce so dźěłowa skupina, wobstejaca ze zastupjerjow Choćebu- skeje Industrijneje a wikowanskeje komory (IHK) a towaršnosće Łužiski hospodarski region, jednotliwe daty k móžnym płoninam znosyć. Projektny team nawjedować budźe bywši měšćanosta Frankfurta nad Wódru Martin Wilke (njestronjan). „Pytamy za sylnosćemi a słabosćemi ležownosćow. Z toho wujewjeja so kajkosće, kotrež su za wotpowědne branše zajimawe“, wuswětla zastupowacy jednaćel IHK Maik Bethke.
Mjeztym su hižo zajimawe płoniny mjez druhim w Choćebuzu, na industrijnišću w Čornej Pumpje a Carnym Gozdźe našli, mnohe pak njejsu hišće přistupne. Kaž Maik Bethke měni, maja komuny a Zwjazk zamołwitosć. Komuny měli nastupajo změnu ratarskich płonin na přemysłownišća sobu rozmyslować. Financne srědki měli z programa za strukturnu změnu brać, kotrež knježerstwo přewostaji.
Škričku nadźije spušćić dyrbjeli
Miłoraz budźe wotbagrowany. To zhonichu wobydlerjo wsy w Trjebinskej gmejnje wčera wječor na njezjawnej zhromadźiznje. Koncern Łužiska energija a milinarnje (LEAG) je tam wo dalšim postupowanju informował.
Miłoraz (SN/BŠe). Nětko knježi skónčnje wěstota. Wobydlerjo Miłoraza budu přesydleni. Po rewěrowym koncepće LEAG drje bě to poprawom hižo jasne. Přiwšěm je rozprawa brunicoweje komisije škričku nadźije zbudźiła, zo smě wjes tola wostać. Komisija bě mjenujcy namjetowała, we łužiskim rewěrje jenož hač do lěta 2038 brunicu wudobywać. LEAG wuchadźeše z lěta 2045. Kaž energijowe předewzaće wčera zdźěli, budu najebać zakónčenje wudobywanja wuhlowe rezerwy pod Miłorazom do toho hišće trěbne.
Zejmuju kłobuk!
Tiket wolóži wučomnikow
Drježdźany (SN/BŠe). Wot 1. awgusta 2019 móža šulerjo powołanskich šulow tak mjenowany acubijowy tiket dóstać. To bě jedne z hłownych žadanjow mjez druhim Budyskeho wokrjesneho rjemjeslniskeho zwjazka, kotryž wojuje wo lěpše wuměnjenja za wučomnikow. Hakle loni w nowembrje předpołoži zwjazk wuslědki naprašowanja mjez wukubłancami, kotřiž mějachu cyłkownu sumu za wužiwanje bliskowobchadnych srědkow zapodać, předsydźe ZVON kaž tež wobchadneho zwjazka Hornje Łobjo, krajnemu radźe Budyskeho wokrjesa Michaelej Harigej (CDU). Kaž studija zwěsći, maja wučomnicy wob měsac přerěznje 113,70 eurow nałožić.
Nětko je sakski wobchadny minister Martin Dulig (SPD) zhromadnje z předsydami wobchadnych zaměrowych zwjazkow kaž tež ze zastupjerjemi wokrjesow a městow dalše wuwiće bliskowobchada w swobodnym staće rozjimał. Wuslědk toho je, zo ma měsačny acubijowy tiket 48 eurow płaćić, štož potrjechenych wulce wolóži. W nowym šulskim lěće zawjedu za šulerjow samo měsačny 10eurowski tiket za wólny čas.
Nowy zapis so derje přiwzał
Rakecy (SN/BŠe). „Wutrobnje witajće do kónčiny Hornjołužiska hola a haty“, je serbske nadpismo noweho hosćićelskeho zapisa regiona. Nimo wobšěrneje karty z informacijemi kolesowarskich pućow abo putniskich šćežkow su zdobom stejnišća hosćencow, cyrkwjow, muzejow, hrodow, pomnikow a parkow zapřijate. Runje tak nańdu hosćo informacije, hdźe móhli swoje elektriske koleso nabiwać abo jězdźidła reparować. Dalše ćežišćo zapisa je přehlad přebywanskich móžnosćow kónčiny. Tak su w karće priwatne dowolowe bydlenja, campingownišća, pensije abo wjesne domy za šulerjow skrótka předstajene.
Nimo toho wěnuja so turistikarjo w krótkim přinošku Serbam, hdźež wosebitosć dwurěčneho regiona wuzběhnu. Mały rěčny kućik z typiskimi rěčnymi wobrotami přełožene wot němčiny do serbšćiny zapis wobohaća. Tež wjetše wjeski a města su dwurěčnje w karće napisane. Kaž turistiski zwjazk Hornjołužiska hola a haty zdźěli su nowy hosćićelski zapis hižo na dowolowych wikach kónc januara w Drježdźanach zajimcam předstajili a dobry wothłós žnjeli.
Strowotniski centrum z přikładom
Fyzioterapija, baba, optikarka a kumštna prózdnjeńca pod jednej třěchu
Wot časa pomjenowanja Leaderoweho regiona Hornjołužiska hola a haty před dźesać lětami buchu hižo mnohe projekty zwoprawdźene. Wobłuki toho su najwšelakoriše a sahaja wot infrastruktury přez turizm hač k hospodarstwu a bydlenjam předewšěm za młode swójby, kotrež chcychu twarsku substancu na wsy zachować a dale wužiwać. Hłowne zaměry su regionalne tworjenje, žiwjenska kwalita, kooperacija a dwurěčnosć, skrućenje zhromadnosće a wuwiće přirody. Serbske Nowiny so spěchowanym wjerškam přichodnje wěnuja a je bliže předstaja.
