Budyšin (SN/BŠe). Po wotewrjenju noweho ličenskeho centruma loni ma koncern itelligence na Budyskim stejnišću znowa přičinu swjećić. Zawčerawšim zhladowaše předewzaće na 20 lět wobstaća. Zajutřišim změja sobudźěłaćerjo přiležnosć, ze swjedźenjom na minjenej lětdźesatkaj zhladować. „Budyšin je naše najwjetše stejnišćo we wobłuku digitalneho managementa Managed Cloud. Inwestujemy dale do aktraktiwneho rozrisanja za wužiwarjow našich posłužbow po cyłym swěće“, zdźěla nawoda předsydstwa itelligence AG Norbert Rotter. Region skići za to najlěpše wuměnjenja, předewšěm hladajo na zarjadnistwo, politiku, infrastrukturu a zdobywanje fachowcow. Hač do dźensnišeho dóstawa koncern wot města Budyšina wulku podpěru w zwisku z hospodarskim spěchowanjom.
Hamor (CK/SN). Třećinu wšěch wotpadkow błóta z komunalnych wodočisćernjow woža na pola. Z teje přičiny chcyło Lipšćanske předewzaće za wodu a wotpłóčki OEWA na teritoriju Hamorskeje milinarnje připrawu za sušenje błóta natwarić a do njeje šěsć milionow eurow inwestować. Za sušenje błóta chcedźa zbywacu ćopłotu milinarnje zasadźić. Granulat móhli pozdźišo w cementowej industriji zasadźić. Předstajomne je pak tež wužiwanje maćizny jako narunanske paliwo w milinarni koncerna LEAG.
Škleńcowa manufaktura Braniborska tzwr so dale a bóle zjawnosći wotwěra. Njedawno je Zwjazkowe zjednoćenstwo srjedźostawskeho hospodarstwa k rozmołwnemu kołu z jednaćelom manufaktury Torstenom Schroeterom přeprosyło. Wón dopominaše na wuwiće industrijnišća a předstaji dźensniši produkciski profil předewzaća.
Slepo (AK/SN). Gmejna Slepo chce zaměrnje dalše dróhi a puće saněrować. Tole podšmórny nawoda zarjada za planowanje, twarstwo a hórnistwo zarjadniskeho zjednoćenstwa Slepo Steffen Seidlich na njedawnym posedźenju tamnišeje gmejnskeje rady. Jednohłósnje radźićeljo rozsudźichu, wjesnjanosće wjac prawomocy spožčić. Přichodnje smě wón w zwisku z wupisanjemi předewzaćam nadawk dać, su-li najlěpši hospodarski poskitk předpołožili.
W jednotliwych padach dźe to, ponowić Běłowodźanski puć we wjesnym dźělu Mułkecach, lěsny puć w Rownom, zajězd Rownjanskeje Witaj-pěstowarnje „Milenka“, dźělny wobłuk puća w Slepom a komunalnu kolesowansku šćežku w Mułkecach. „Mamy za to financy Sakskeho krajneho zarjada za dróhotwar a wobchad. Za lěto 2018 je jich cyłkownje 56 578,73 eurow“, Steffen Seidlich rozłoži. „W techniskim wuběrku smy so dorozumili, za kotre naprawy chcemy srědki zasadźić.“ Pjenjezy su ze směrnicy wo komunalnym dróhotwarje. Naprawy, tak Steffen Seidlich wuzběhny, su nuznje trěbne.
Dźěže (UM/SN). Zhorjelski krajny rada Bernd Lange (CDU) ma, po tym zo bu w februaru blisko Krušwicy wjelk zatřěleny, 210 skóržbow na blidźe. To rjekny wón wčera wječor we wobłuku wot frakcije krajneho sejma swojeje strony organizowaneho zarjadowanja „20 lět wjelki w Sakskej“ w Dźěžach (Diehsa). Zdobom Lange zwurazni, zo statnemu rěčnistwu mjeno hajnika, kiž bě wjelka třělił, njemjenuje. „Sym jim rjekł, zo ja zamołwitosć přewozmu.“
Čorna Pumpa (JoS/SN). Łužiski region hotuje so na puć dalšeho strukturneho wuwića. Tu zahaja so mjezy přesahowacy proces Sakskeje a Braniborskeje, kotryž zwjazkowe knježerstwo podpěruje. To wobkrući wčera zwjazkowy hospodarski minister Peter Altmaier (CDU) na Łužiskim dialogu 2018 w Čornopumpskej klubowni koncerna Łužiska energija a milinarnje (LEAG). Přitomnaj běštaj tohorunja sakski ministerski prezident Michael Kretschmer (CDU) a jeho braniborski kolega Dietmar Woidke (SPD). Podłu přijězda je wšak něhdźe 500 sobudźěłaćerjow a energijowych poradźowarjow předewzaćow LEAG a Mibrag za swoje dźěłowe městna a za strukturnu změnu wuchodoněmskich brunicowych rewěrow demonstrowało. Politikarjo so z nimi rozmołwjachu a přihłosowachu jim, zo maja woprawnjene wočakowanja hladajo na přichod w domiznje. Dalši strukturny łamk měli wotwobarać.
Berlin/Wjelcej (SN/BŠe). Dźensa je so w Berlinje wuhlowa komisija prěni raz schadźowała. 23 ludźi chce nětko prawidłownje wo přichodźe brunicoweho hórnistwa w Němskej wuradźować. Mjez nimi stej zastupjerce z Łužicy. Jónu Grodkowska měšćanostka a rěčnica Łužiskeho kruha Christine Herntier (njestronjanka) a Hannelore Wodtke z wolerskeho zjednoćenstwa „Zeleny přichod Wjelcej“ tamnišeje měšćanskeje rady. „Změjemy tójšto dźěła so přesadźić“, zdźěli Wodtke do konstituowaceho posedźenja. Wona zasadźa so předewšěm za to, žane nowe brunicowe jamy njezarjadować. Dotal je planowane wobydlerjam Prožymja hakle w lěće 2020 rjec, kak tam dale póńdźe. „To je přepozdźe. Ludźo njemóža z tajkej njewěstosću dale žiwi być.“
Kórki a len słušeja k najznaćišim wudźěłkam w Błótach. Zašły tydźeń su zamołwići kołowokoło Błótowskeho towarstwa žně kórkow oficialnje zahajili. Len pak hišće chwilku trjeba. Tuchwilu rostlina kćěje a kuzła cunju lila barbu na zahonach.
Błóta (SN/BŠe). Na něhdźe 50 hektarach plahuje biozawod Frehn w błótowskim Schöneiche kórki. W aprylu běchu tam symjo wusyli, nětko su woblubowanu zeleninu hižo žnjeć započeli. Wuskutkowała je zažne žně změna wjedra kónc apryla, hdźež dóńdźe ke konstantnje ćopłym temperaturam wodnjo a w nocy. Lětuši měsac meja słuša k najćoplišim wot časa zapisowanjow wjedra. Sylne zliwki a krupy su na někotrych polach k tomu wjedli, zo su so rostliny pomałšo wuwili, štož pak bě jenož krótkodobny zjaw. Přiwšěm kórki w Błótach hižo wot kónca meje domchowaja.
Čorna Pumpa (JoS/SN). Přichod Łužicy po wudobywanju brunicy žada sej wuske splećenje hospodarstwa z politiku a wědomosću. Runje tak su wutworjenje nowych rjećazow, zwoprawdźenje inowatiwnych projektnych idejow a eficientne wužiwanje wobstejacych resursow trěbne. Wo tym wuradźowachu njedawno wobdźělnicy fachoweje konferency CLEANTECH w Čornej Pumpje, kotrejež hesło bě, łužiske inowacije zwoprawdźić.
Na derje wopytanym zarjadowanju informowachu tohorunja wo aktualnym stawje spěchowanskich programow.
Konjecy/Ralbicy (SN/BŠe). Plahowanje wowcow słuša k łužiskej kulturje. Wo tym přeswědči so minjeny pjatk sakski ministerski prezident Michael Kretschmer (CDU) w Konjecach. Na łuce jemu Konječanski plahowar wowcow Měrćin Just rysowaše, zo ma so Róžeńčanskeje wjelčeje črjódy dla dale a ćešo. Wón dźě měješe zašły čas wosebje wjele stratow rubježneho zwěrjeća dla. Zas a zaso dóstawaše nadawk, swoju pastwu hišće bóle zawěsćić. Nazornje je Just pjatk přitomnym politikarjam wšelake etapy na přikładźe płota demonstrował a jim tak tuchwilne poćežowanja wuwědomił. Dale wobžarowaše wowčer wobšěrne dlijace so financne wotrunanje. ,,To njemóže hižo tak dale hić. Trjebamy nuzne rozrisanje“, Just wuzběhny. To wšak je nětko tež ministerskemu prezidentej jasne, kiž zwurazni, zo měli wotškódnjenje nanajspěšnišo wolóžić. ,,Mamy ćišć na knježerstwo w Berlinje přiwótřić.“ Wjelk pak ma škitny status, kotryž njehodźi so zakonsce tak lochko wobeńć.