České Budějovice (jh/SN). 60 ludźi z cy­łeho swěta wobdźěla so tučasnje na tři­tydźenskim rěčnym kursu w juhočěskej metropoli Českich Budějovicach. Na tam­nišej uniwersiće wuknu a polěpšeja woni swoje znajomosće čěšćiny. Nimo Američana, kiž ma w Čěskej přiwuznych, a profesora slawistiki z Japanskeje, su mjez kursistami z Alenu Šołćic z Pančic-Kukowa, Gloriju Žurec a Janom Hrjehorjom z Róžanta zdobom třo Serbja.

Budyšin (SN/MiR). Nawoda Budyskeho Powołanskošulskeho centruma za hospodarstwo a techniku Uwe Richter chce we wukubłanskim lěće 2019/2020 druhu rjadownju za wukubłanje kubłarjow a kubłarkow wotewrěć. Kaž hižo we wobstejacych rjadownjach chcedźa serbskich zajimcow wosebje spěchować. Byrnjež w šulskim lěće 2016/2017 maćernorěčnych zajimcow za wukubłanje njeměli, rěčeše předsydka sakskeje serbskeje rady Marja Michałkowa lětsa w juliju wo tym, zo „zajim tež dwě rjadowni dowola“. Uwe Richter to wobkrući. Tež lětsa mějachu znowa wjace požadanjow hač městnow. Hižo loni w aprylu bě Richter SN rjekł, zo „změja w šulskim lěće 2017/2018 dwě rjadowni“. Rjadownju zarjadować pak so dotal po­radźiło njeje. „Přičina su pobrachowacy wučerjo“, praji nawodnica Serbskeje fachoweje šule za socialnistwo Elke Jäckel. Jednu nowu wučerku na štyri hodźiny wob tydźeń maja. Wot spočatka šulskeho lěta je to přidatnje k třom tam skutkowacym serbskim pedagogam wučerka Budyskeje SWŠ Kerstin Klingnerowa. Wona podawa serbšćinu na maćernorěčnym niwowje a posrědkuje wědu wo Witaj-kubłanju.

Gütersloh/Drježdźany (dpa/SN). W Sakskej je po aktualnym přepytowanju přemało kubłarkow a kubłarjow w dźěćacych přebywanišćach. Najebać snadne polěpšenje je personalny kluč we woběmaj starobnymaj skupinomaj hižo lěta špatniši hač we wuchodoněmskim přerězku, rěka we wčera wozjewjenej studiji Bertelsmannoweje załožby. W měrcu 2017 dyrbješe so w žłobikach statistisce kóžda fachowa móc wo 6,4 dźěći starać, w pěstowarnjach wo 13. Wuchodoněm­ski po­měr wobličichu z 1:6 resp. 1:11,9. Bertelsmannowa załožba poruči poměr 1:3 za žłobiki a 1:7,5 za pěstowarnje.

„Kwalita w přebywanišćach je so po wšej Němskej polěpšiła, rozdźěl mjez krajemi pak wosta“, rjekny čłon před­sydstwa Bertelsmannoweje załožby Jörg Dräger. Hižo wot lěta 2014 je Badensko-Württembergska hladajo na personalny kluč w žłobikach (1:3,1) a w pěstowarnjach (1:7,1) w Němskej na wodźacym městnje. Sakska zaběra pola najmłódšich ze 1:6,4 poslednje městno. Přiwšěm su mjez wokrjesami wulke rozdźěle. Załožba trochuje, zo trjeba swobodny stat 17 500 přidatnych kubłarjow.

Serbska wyša šula „Dr. Marja Grólmusec“ Radwor je wotewrjena za wšěch

To prěnje, štož wopytowarjej Radworskeje wyšeje šule „Dr. Marja Grólmusec“ napadnje, hdyž po nowotwarje domskeho dźe, su durje do rjadowniskich stwow. Wone zmóžnjeja ći dohlad do rumnosćow. Delnja połojca duri ze škleńcy je zamlóčena, horni dźěl je jasny, přewidny. Tak zetkawatej so woči hosća z tymi wučerja a šulerjow. Na prěni pohlad to zamyla. Jako wopytowar so samo trochu stróžiš, hdyž takrjec njejapcy nimale w rjadowni stejiš. Wšako nochce nichtó mylić, hdyž nimo stwow dźe. „Wězo, šulerjo a wučerjo widźa, zo něchtó nimo dźe, ale mylić so njedadźa. Su so spěšnje na nowosć zwučili“, měni šulska nawodnica Hilža Štilerowa.

Tuchwilu dosć wučerjow