Eduard Luhmann ze Smjerdźaceje piše:

Zo je so nětko nam wšitkim k wjeselu zakładny kamjeń za nowu pěstowarnju w Ralbicach połožił, a to hišće w přitomnosći sakskeho ministerskeho prezidenta, je wosebje zasłužba tehdyšeje star­šiskeje přirady našeje pěstowarnje. Pod nawodom knjenje Michaele Gedikoweje a knjenje Gesiny Kutteroweje je staršiska přirada w lěće 2017 wobšěrnu rozprawu wo hižo njespokojacym stawje pěstowarnje zapodała. Tuta jara wěcowna rozprawa, zestajena wot maćerjow a nanow w měsacy trajacym čestnohamtskim dźěle, je so po dorěčenju z tehdyšim předsydu wjesneje skupiny CDU Tilom Žurom, w internym zetkanju CDU ministerskemu prezidentej přepodała, z próstwu wo politisku kaž tež financielnu podpěru za nuznje trěbny nowotwar pěstowarnje.

Tuta rozprawa bě po měnjenju awtora woprawdźity a doskónčny nastork za pozdźiši wopyt ministerskeho prezidenta Kretschmera w Ralbicach. Tam je so wón jasnje za nowotwar wuprajił.

Andrea Pawlikowa ze Serbskeho muzeja ma přispomnjenje k wčerawšemu přinoškej w SN „Spěwanje a narodnu drastu pěstuja“:

Wčerawše moje wuprajenja w přinošku njeběchu posłownje citowane. Wězo njechodźachu dźěći w drasće dorosćenych, ale kaž dorosćeni, jenož w jednorišich wariantach. Spěwarski dorost „Lipy“ móhł nimo folklorneje rejowanskeje drasty modernu ze serbskimi T-shirtami a accessoirami měć. Za „Lipki“ so lipowe łopješko z kćenjom runje tak hodźi kaž kwěćelki w serbskich barbach. Snano su citaty lipoweho kćenja z historiskeje chorhoje Lipy Serbskeje móžne. Jewišćowa drasta za małych pjerachow měła praktiska a přijomna być. Tuž njech so tola wuwzaćnje z mašinu wušiwa a město trodlow canka wužiwa. Tak móžeš spěšnje wšo wupłokać. Cyle bjez wušiwanja by tež šło, mjenujcy tak, zo wužiwa so samsny kwětkaty płat za fale a rubiška, kaž je to něhdy praktikowała Cecilija Nawkec. Tón by so zdobom za hólče wokołošijne rubiško hodźał. Na kóncu pak starši a dźěći sami rozsudźa, što maja za prawe a rjane. Narodnu drastu a modu měšała njebych.

Kajki da wón nětko běše, lětuši folk­lorny festiwal Łužica 2023, předewšěm wječor w Chrósćicach? Anja Nowakowa je so žonow ze Sernjan a Smječkec ­za jich zaćišćemi a namjetami, zhla­dujo na přichodny festiwal za dwě lěće prašała.

Damaris Handrikowa ze Sernjan: ­Běše to wulkotna składnosć, wustupy wšelakich folklornych cyłkow dožiwić. Smjerdźečan rejowanska skupina a Španičenjo słušachu k mojim wosobinskim faworitam. Wjedro běše překrasne, tuž sym sej wosebje sobotu wječor dołho lubić dała. Za přichodny festiwal bych pak sej płaćizny dla přała zastupny li­sćik jenož za sobotniši wječor.

Juliana Bulankowa ze Sernjan: Nimam ničo wustajeć, wosebje sobotu w Chrósćicach dožiwichmy přewšo krasny wječor z wulkotnej atmosferu. To bě dobra składnosć, přećelow a znatych ­zetkać, kotrychž wšědny dźeń njewidźiš. Njedźelu popołdnju bych sej wjace móžnosćow zaběry runje za mjeńše dźěći přała a horcoty dla tež wjetši škit před słóncom.

Błažij Handrik piše w mjenje Serbskeho folklorneho ansambla Wudwor:

Dźakuju so wšitkim pomocnikam, staršim a rejowarjam-oldijam, kotřiž su zmóžnili, zo je so swjedźeń 14. mjezynarodneho folklorneho festiwala „Łužica“ w tak dobrej měrje radźił. Wosebje pak chcu so wuměłskimaj nawodomaj Georgijej Marinovej a Měrćinej Handrikej za jeju skutkowanje podźakować. Dalši dźak słuša hudźbnikam, kotřiž su nas w swjedźenskim ćahu z wulkim wjeselom přewodźeli.

Tež w našim drastowym fundusu je so pilnje dźěłało. We wosebitej měrje stej tam čłonam towarstwa Birgit Wawrijowa a Sabina Jurencowa pod pažu přimnyli. Wulki dźak pak tež wuprajam muskej spěwnej skupinje Přezpólni a jich hercam kaž tež čłonam Serbskeho ludoweho ansambla, kotřiž su naš program ze spěwom a hudźbu přewodźeli. Wjeselimy so na mnohe dalše zhromadne dožiwjenja.

Njech Bóh Wam waše dźěło mytuje.